Laurence Deonna

d Laurence Deonna z Jordanie, 2004.

D Laurence Deonna (* 29. Jänner 1937 z Gämf; † 2. Augschte 2023 au deert) isch e Schwyzer Schurnalischti, Schriftstelleri, Fotograafi un Chriegsbriichterstatteri im Nooche Oschte gsii.

Lääbe un Wiirke

D Laurence Deonna, 1937 z Gämf uf d Wält chuu, isch e Doochter vum Ekonoom un Bolitiker Raymond Deonna gsii, wu dr Voorstand vum eemoolige Journal de Genève glaiutet het, un vu dr Anne-Marie Vernet-Faesch, wu wie ire Mann us em Gämfer broteschtantische Grooßbuurgerduum chuu isch. Si isch anne 1950 voor em Abituur ab dr Schuel gange, isch uf d Chunschtakademy z Bath gange un isch speeter wieder retuurchuu uf Gämf, go in ere Chunschtgalery schaffe. Zwische 1961 un 1963 isch si fir chuurzi Zyt ghyroote gsii.

In dr spoote 1960er Joor isch d Laurence Deonna zuen ere gfyyrte Chriegsbriichtserstatteri im Nooche Oschte woore. 1967 isch si yyglaade woore, iber dr Segsdäägschrieg z briichte, un het e langi Karriere as Schurnalischti im Nooche Oschte aagfange, wu si si vor allem fir s Lääbe vu araabische Fraue inträssiert het. Wel ere Biecher e noohaltiger Wääg vu dr uusfierlige Briichterstattig bote hän wie Zytige, het si in dr 40 Joor vyyl lengeri Briicht iber iri Uuslandsraise.vereffetligt. Die sin vyylmool illuschtriert woore mit iire Fotografie.

Iri Aarbete hän si nit nume uf Fraue kunzäntriert, si hän au iri Iberzyygig zaigt, ass e Hufe Broblääm in dr Wält chennte gleest wääre, wämer si mee Mie gee deet um dr Friiede. Anne 1987 isch si fir iri Artikel, Biecher un Fotografie fir d Feerderig vu dr Velkerverständigung un fir d Verbesserig vu dr Stellig vu dr Frau mit em UNESCO-Bryys fir Friideserzieig uuszaichnet woore. In dr Schwyz het si si 1989 staark gmacht fir s am Änd erfolgloos Referändum fir d Abschaffig vu dr Schwyzer Armee. Iri Roll as Fraueräächtleri cha mer am zäntraale Blatz ablääse, wu si dr Fraue in alle ire Schrifte yygruumt ghaa het.

Si isch am 2. Augschte 2023 im Alter vu 86 Joor z Gämf gstoorbe.

Uusglääseni Schrifte

Franzeesisch

• Moyen-Orient – femmes du combat, de la terre et du sable. Labor et Fides, Geneva 1970.
• Le Yémen que j’ai vu. 24 Heures, Lausanne 1982.
• Yémen. Arthaud, Paris 1983.
• La guerre à deux voix. Témoignages de "femmes ennemies". Le Centurion, Paris / Labor et Fides, Geneva 1986.
• Syriens, Syriennes (1992–1994). Zoé, Geneva 1986.
• Persianeries – Reportages dans l’Iran des mollahs (1985–1998). Zoé, Genève 1998.
• Kazakhstan – Bourlinguer en Asie centrale post-communiste. Zoé, Geneva 2001

Änglisch

• On Persian roads: glimpses of revolutionary Iran, 1985–1998. Passeggiata Press, Pueblo, Colo 1999, ISBN 1-57889-088-8.
• Syrians – a travelogue (1992–1994). Passeggiata Press, Pueblo, Colo 1997, ISBN 1-57889-040-3.
• Yemen. Three Continents Press, Boulder, Colo 1991, ISBN 0-89410-710-0.
• Travels through Kazakhstan: after the fall of the Soviet Empire. Athena Press, London 2010, ISBN 978-1-84748-695-0.

Weblink

 Commons: Laurence Deonna – Sammlig vo Multimediadateie

• Literatur vu un iber Laurence Deonna im Katalog vu dr Dütsche Nazionalbibliothek
• Yytrag über Laurence Deonna im Lexikon vom Verein Autorinnen und Autoren der Schweiz
• Laurence Deonna, Biografy un Bibliografy uf Viceversa Literatur
• Laurence Deonna Bibliografy uf worldcat.org/identities

Fueßnote

Dä Artikel basiert uff ere fräie Übersetzig vu dere Version vum Artikel „Laurence_Deonna“ vu de dütsche Wikipedia. E Liste vu de Autore un Versione isch do z finde.