Wikipedia:Wikiquette

Richtlinie

D Wikipedia bietet verschiidene Natione, Landsmannschafte, Sprochgruppe un Mänsche e Forum zum sich chännelehre. Des dunkt is guet. Mer wänn dr alemannisch Sprochruum un sini verschiidene Regione bekannter mache.

Hinter jedem Byytrag zue dr Wikipedia – eb er guet isch oder schlächt – stoht e Mänsch. Zue däm Satz jo sage isch eifacher wie au derno handle. Aber grad des isch seli wichtig bi eme Gmeinschaftsprojäkt wie dr Wikipedia. Byyträg sin vo Autore gschribe un die sin verletzt, wänn eber in eme arg grobe Ton iber dr Inhalt vun eme Tekscht oder eme Diskussionbyytra här zieht. Derzue chunnt, ass in eso eme Fall d Diskussion verlageret wird vun ere Sachebeni uf d Ebeni vu dr Persone, wu derhinter stehn. Doderdur entstoht Stryt un des isch nit ferderlig fir des Projäkt.

Uf däre Syte sin di zentrale Grundsätz ufgfiert iber dr Umgang mitenander in dr Wikipedia.

Keini persenlige Aagriff: Blyb bi Diskussione un Kritik sachlig un versuech, Dyy Gegeniber nit z verletze. Mer cha Kritik uf vylerlei Arte formuliere – wehl di frindligscht.
Gang vu guete Absichte uus. Gang dervu uus, ass d Benutzer iber Wisse verfiege, wu si do wän yybringe. Di meischte Lyt wän glych wie Du d Wikipedia verbessere. Wän eber ebis änderet, wu Du as falsch aasihsch, het er villicht gueti Grind derfir ghaa. Un wänn eber Fähler macht, gang zerscht emol dervu uus, ass er s guet meint un hilf em. Zum gegesytige Reschpäkt ghert au, ass mer Änderige nit eifach ruckgängig macht ohni e Grund derfir aazgee.
Bii fryndlig: E sachlige, wänn meglig fryndschaftlige Umgang vu dr Autore unterenander isch des, was mir in Alemannische Wikipedia wänn. Fryndligkeit isch e Zeiche vu Professionalität. Si ferderet dr Uustusch vu Informatione un Wisse.
Hilf andere. Begrieß Neji in dr Wikipedia un hilf ene, sich zrächtzfinde. Gib e fryndligi Antwort, wänn Di eber ebis frogt un sag au emol e Dankschen, wänn Dir eber ghulfe het.
Blyb rueig! E jede het emol e schlächte Tag un isch impulsiv un macht bled - schnuuf dure, gang emol an di frisch Luft, schlof villicht nomol e Nacht driber, voreb Du Antwort gisch. Deno hesch kei Stress, chasch besser reagiere un bisch nit eso verletzlig.
Mir sin alli ehreamtlig. E keine chunnt Gäld iber fir syni Arbet in dr Wikipedia. Wänn Du ebis witt, no bitt drum; Du hesch kei Aaspruch druf, ass dr Ander ebis sofort macht oder sofort Antwort git – villicht macht er jo grad e Paus. Mi sin do ne Wiki – Du bisch Autor un chasch sälber ebis mache; bii muetig! Wänn Andere Dyy Arbet nit gfallt, chenne Ihr uf dr Diskussionssyte driber diskutiere un e Kompromiss finde oder die Aktion am Änd ruckgängig mache.
Schwätz am beschte persenlig mit dr Lyt. Nimm Kontakt uf mit em Ander uf synere Diskussionssyte oder iber e E-Mail.
Loss andere Benutzer ihri Anonymität. Viil Wikipedia-Benutzer sin do unter eme Pseudonym unterwägs. Villicht chännsch dr eint oder dr ander persenlig oder Du stellsch villicht sogar Nochforschige iber d Identität vun eme andere Benutzer aa. Gib doderbyy aber uubedingt Acht uf s allgmein Persenligkeitsrächt: Vereffentlig nie dr ächt Name („Klarname“) vun eme Benutzer oder sunschtigi Hiiwys uf syni Identität, ohni ass er uusdrickli zuegstimmt het.
Trag Konflikt nit effentlig uus. Wänn zwei sich in dr Effentligkeit stryte, no lydet s ganz Projäkt derdur. Mache des unterenander uus z. B. per Mail.
Trag andere nyt noch. Wänn Du lenger bi dr Wikipedia mitmachsch, no cha s syy, ass Du emol mit eme andere Benutzer iber irgedebis gstritte hesch. Au wänn Du beleidigt bisch: trag em andere sonigi Sache nit noch. Du chasch Beleidigunge au verzeje, Du chasch au sälber „Excusez“ sage un e Stryt us dr Vergangeheit eifach syy loo. Nit alles isch immer eso gmeint gsi, wie Du s verstande hesch, villicht isch s jo eifach e Missverständnis gsi ...
Ärger iber anderi Mänsche chunnt in dr beschte Familie vor. Mir lähne aber ab, andere chleine un große Sprochgruppe im große Boge d Schand z sage. Sätz wie: "D Mongole, d Teutone, d Helvetier, d Oschtfriise wänn alliwiil rächt ha" lähne mir ab. Sachligi, unpolemischi Kritik an einzelne Persone oder Gruppe isch aber erlaubt un notwändig.