Taxi

Un taxi ye un auto con conductor (dito taxista) que se fa servir en o servicio publico de transporte de pasachers con a finalidat de tresladar una u mas personas que en forma conchunta contractan o servicio y que por un regular reyalizan trachectos curtos u de meya distancia entre centros de población. A diferencia d'os atros tipos de transporte publico, como son as linias de metro, tramvía u de l'autobús, o servicio ufierto por o taxi se caracteriza por estar de puerta a puerta. A parola taxi ye una abreviadura de taximetro (d'o griego τάξις, "tasa" y μέτρον, "mesura") porque un taxi ye un vehiclo provisto d'un taxímetro.

Forma de contractación

A contractación d'o taxi puet fer-se de diversas formas, pendendo d'os usos y reglamentacions de cada localidat:

Por telefón gritando a una central que a la vegata se comunica con os taxistas (isto se gosa conoixer como radio-taxi).
Prenendo-lo en a vía publica.
Prenendo-lo en puestos determinatos d'a vía publica, u "paradas" en as que s'estacionan os vehiclos que se troban desocupatos. En bellas ciudaz istas paradas contan con un telefón a on que se puet gritar y que ye atendito por o taxista que se trobe astí asperando pasachers.

Tarifa

A reglamentación de cada localidat determina si o pre que ha d'abonar o pasachero por o servicio ye o que alcuerde en cada caso con o conductor u si d'atra man o taxista ye obligato a percibir nomás una tarifa fixata por l'autoridat publica.

En iste zaguer caso as tarifas pueden prener diversos parametros ta a suya determinación:

Un importe fixo de salita.
Importes por tiempo u por kilometrache.
Importes que varian seguntes l'horario en que se realice o servicio, ye decir que puet haber tarifas en horario diurno, nocturno, de días festivos, etc.
Variacions seguntes o viache se realice aintre d'un determinato radio u difuera d'o mesmo (por eixemplo una tarifa puet encluyir una compensación adicional por o trachecto que ha de fer o vehíclo difuera d'o suyo radio de treballo.
Tamién puet haber una compensación adicional por cada pieza d'equipache que transporte, por levar un can (no guía), u cuan o servicio haiga estato requiesto por meyo d'o telefón u d'una emisora de radio-telefón. En bellas ciudaz os taxis disposan d'un taximetro, aparato que indica o importe a pagar seguntes a distancia recorrita, o tiempos transcorrurrito y a tarifa d'aplicación en caso d'existir mas d'una. En iste zaguer caso en bellas ciudaz os taxis levan en l'exterior un dispositivo a on que s'indica a tarifa que se ye aplicando, ta que pueda estar comprovata por a policía municipal sin que sía menester d'aturar o taxi.

Datos: Q82650
Multimedia: Taxi vehicles / Q82650