Joachim Lemelsen
![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Joachim Lemelsen | |
---|---|
26 de setiembre de 1888 - 30 de marzo de 1954 | |
Información personal | |
Embotada | |
Puesto de naixencia | ![]() |
Puesto de muerte | ![]() |
Información militar | |
Leyaltat | ![]() ![]() ![]() |
Anyos de servicio | 1907-1945 |
Rango | General der Panzertruppe |
Mandos | 29ena División d'Infantería 5ena División Panzer XLVII Cuerpo d'Exercito Motorizato 10eno Exercito 1r Exercito 14eno Exercito |
Unidat | |
Batallas/guerras | Primera Guerra Mundial Segunda Guerra Mundial *Invasión de Polonia en 1939 *Batalla de Francia *Operación Dynamo *Frent Oriental *Operación Barbarroya *Batalla de Smolensk *Batalla de Kiev *Batalla de Briansk *Batalla de Kursk *Frent Occidental *Campanya d'Italia *Linia Gotica |
Premios | Cruz de Caballero d'a Cruz de Fierro con Fuellas de Caixico |
Atras funcions |
Joachim Lemelsen, naxito de Berlín (Imperio Alemán) o 26 de setiembre de 1888 y muerto en Göttingen (Baixa Saxonia, Alemanya) o 30 de marzo de 1954,[1] estió un militar alemán, que desembolicó a suya carrera militar a o servicio en primeras de l'Imperio Alemán (con o que partecipó en a Primera Guerra Mundial) y dimpués d'a Republica de Weimar en rematar a guerra, dica que en 1933 se proclamó o Tercer Reich, continando asinas a suya carrera en a Wehrmacht, a on plegó dica o ran de General der Panzertruppe y mandó destacadas unidaz militars mientres a Segunda Guerra Mundial, dica rematar con a suya rendición a os Aliaus en Italia o 2 de mayo de 1945, cuan mandaba o 14eno Exercito d'a Wehrmacht.
Entre d'atros honors y premios, recibió a Cruz de Caballero d'a Cruz de Fierro con Fuellas de Caixico. Partecipó en importants feitos d'armas en o Frent Occidental y en o Frent Oriental.
Primeras anyadas d'a suya carrera
[editar | modificar o codigo]Joachim Lemelsen naixió d'a ciudat de Berlín, y yera fillo d'un oficial de carrera de l'Exercito alemán. Dentró en o Exercito alemán en 1907 como aspirant.[2]
Primera Guerra Mundial
[editar | modificar o codigo]Mientres a Primera Guerra Mundial Lemelsen sirvió como oficial d'artillería dica 1916, cuan lo transferioron enta o Estato Mayor d'a 52ena División d'Infantería.
En 1917 fue tranferito tafer parte d'o Estato Mayor de l'oficial que mandaba a esfensa d'a costa alemana d'a mar d'o Norte, Josias von Heeringen, mandando un batallón y estando ninvito dimpués en o Estato Mayor del VI Cuerpo d'Exercito de Reserva.
Lemelsen remató a guerra con o ran de capitán, recibindo-ie a Cruz de Fierro de primera y segunda clases y a Orden d'a Casa de Hohenzollern.
Republica de Weimar
[editar | modificar o codigo]En rematar a guerra en 1918 con la redota de l'Imperio Alemán, Joachim Lemelsen decidió continar a o servicio d'a Reichswehr, o reducito l'exercito que as clausulas d' Tractado de Versailles de 1919 autorizoron que conservase a Republica de Weimar.
En a posguerra Lemelsen tornó an l'Arma d'Artillería,[2] amprando os suyos servicios como comandant d'a Escuela d'Artillería en 1934, con o ran d'oberst,[2] y como comandant d'a Escuela d'Infantería en 1935. L'1 d'abril de 1937 puyó a o ran de generalmajor.[2]
En marzo de 1938 se li atorgó o mando d'a 29ena División d'Infantería, que posteriorment fue motorizata, prenendo parte con ista unidat en a invasión de Checoslovaquia dimpués d'os Pactos de Múnich. L'1 d'abril de 1939 puyó a o ran de generalleutnant.[2]
Segunda Guerra Mundial
[editar | modificar o codigo]En prencipiar a Segunda Guerra Mundial, Lemelsen, que mandaba a 29ena División d'Infantería,[2] partecipó en a invasión de Polonia en 1939 en o Frent Oriental, y tamién en as primeras fases d'a batalla de Francia en o Frent Occidental; sindembargo, o 28 de mayo de 1940, quen se desembolicaba a batalla de Francia, s'atorgó a Lemelsen o mando d'a 5ena División Panzer, con a que prenió parte en a luita contra la Fuerza Expedicionaria Britanica de l'Exercito britanico en Dunkerque, en a Operación Dynamo. L'1 de chulio de 1940 puyó a o ran de General der Artillerie.[2]
O 25 de noviembre de 1940 Lemelsen recibió o mando d'o nuevo XXXXVII Cuerpo d'Exercito Motorizato, y con istas tropas partecipó en a Operación Barbarroya, en a conquiesta de Smolensk y en as batallas de Kiev y Briansk. O XXXXVII Cuerpo se convertió en o XXXXVII Cuerpo d'Exercito Panzer en chunio de 1942, y con a suya nueva denominación partecipó en operacions contra os partisans rusos y en a batalla de Kursk.
Dimpués de mandar o XXXXVII Cuerpo d'Exercito Panzer en Rusia, Lemelsen pasó a mandar o Exrcito de reserva y temporalment mandó o 10eno Exercito desplegato en Italia, en 1943. Lemelsen recibió o mando d' 1r Exercito, desplegato en a costa atlantica francesa en mayo de 1944. Nomás que un mes dimpués, a consecuencia d'a cayita de Roma en mans d'os Aliaus, Lemelsen fue ninviato en Italia ta que mandase o 14eno Exercito, que mandó mientres toda a campanya d'Italia, entre chunio de 1944 y a suya rendición final a os Aliaus amán d'os Alpes en mayo de 1945.
Feito prisionero por l'Exercito britanico, fue liberato o 16 de mayo de 1948.[2] Morió en Göttingen (Alemanya Occidental) o 30 de marzo de 1954.[2]
Vinclos externos
[editar | modificar o codigo]- (de) Joachim Lemelsen en a pachina web Lexicon der Wehrmacht.
Bibliografía
[editar | modificar o codigo]- (en)/(fr) de Lannoy, François y Charita, Josef: Panzertruppen. Les troupes blindées allemandes. German armored troops. 1939-1945. Éditions Heimdal. Bayeux, 2001, ISBN 2-84048-151-0.
Referencias
[editar | modificar o codigo]- ↑ (en)/(fr) de Lannoy, François y Charita, Josef: Panzertruppen. Les troupes blindées allemandes. German armored troops. 1939-1945. Éditions Heimdal. Bayeux, 2001, ISBN 2-84048-151-0, pachina 69.
- ↑ 2,0 2,1 2,2 2,3 2,4 2,5 2,6 2,7 2,8 (Lannoy-Charita 2001:69)
- ↑ (de) 29. Infanterie-Division en a pachina web Lexicon der Wehrmacht.
- ↑ (de) 5. Panzer-Division en a pachina web Lexicon der Wehrmacht.
- ↑ (de) XXXXVII. Armeekorps (47.) en a pachina web Lexicon der Wehrmacht.
- ↑ 6,0 6,1 (en)/(fr) de Lannoy, François y Charita, Josef: Panzertruppen. Les troupes blindées allemandes. German armored troops. 1939-1945. Éditions Heimdal. Bayeux, 2001, ISBN 2-84048-151-0, pachina 138.
- ↑ (de) 10. Armee en a pachina web Lexicon der Wehrmacht.
- ↑ (de) 1. Armee en a pachina web Lexicon der Wehrmacht.
- ↑ 9,0 9,1 (de) 14. Armee en a pachina web Lexicon der Wehrmacht.