Pantherinae

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Pantherinae
Panthera tigris, o tigre, que ye a especie de panterino mas gran.
Denominacions populars
Panterins
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Carnivora
Suborden:	Feliformia
Familia:	Felidae
Subfamilia:	Pantherinae
Descripción
Pantherinae POCOCK, 1917

Os panterins (cientificament Pantherinae, en latín) son una subfamilia d'a familia Felidae de mamiferos carnivoros, una d'as dos subfamilias vivas que queda en a familia, estando-ne l'atra la d'os felins. As subfamilias Machairodontinae y Proailurinae, que tamién fan parte d'os Felidae, tienen toz os suyos miembros extinctos dende a Prehistoria humana.

Pantherinae se deseparó evolutivament d'os felins bien luego, y se tracta d'un linache filochenetico real, sin que i haiga habiu contactos destacables entre os dos grupos de felidos. A mayoría de panterins son animals de mida gran y muita potencia muscular, depredadors d'atras especies, y de conducta solitaria. Beluns son además os predadors culminals en os suyos ecosistemas.

Caracteristicas

Os panterins no tienen a larinche osificada como sí que la i tienen os miembros de Felinae. Isto fa que os panterins sían os solos felidos que realment son capables de gramar.

A trunfa d'o naso (zona humeda y despullada de pelo que toz os Carnivora tienen) comienza en l'anglo que desparte a recta d'o mueso contra la vertical, de manera que tamién a diferencia d'os felins os panterins no tienen cosa de piel despullada por alto d'o naso. A cabeza y os arcos zigomaticos solen estar mas robustos y prominents que en atros felidos.

A piel ye cubierta de picas u ocelos, que son codificaus en chens ancestrals de a subfamilia. Manimenos, una sola especie (o tigre u Panthera tigris) as tiene fusionadas en formando en rayas verticals, cosa que se crei que amaneixió secundariament en ixa especie. O lión (Panthera leo) tiene ocelos nomás entre que ye cadiello, y s'esbanden a mesura que se torna adulto.

Clasificación

A subfamilia Pantherinae se dubdivide en dos u tres cheneros, pende de l'autor: pa uns son Panthera y Neofelis os dos solos cheneros, pero en base a estudios cheneticos recients bels investigadors consideran que cal clasificar a la pantera d'as nieus a desparte d'o chenero Panthera, en un nuevo chenero que se diría Uncia.

Actualment a suya taxonomía se troba subchecta a debate.^[1]

Se veiga tamién

Referencias

↑ (en) Yu, L. y Zhang, Y. P. (2005) «Phylogenetic studies of pantherine cats (Felidae) based on multiple genes, with novel application of nuclear beta fibrinogen intron 7 to carnivores». Molecular Phylogenetetic Evolution, 35(2): 483–495