Wikipedia:Verificabilidá
 | Esta ye una política oficial de la Wikipedia. Ellaboróse por tola comunidá, y el so cumplimientu ye obligatoriu pa tolos editores. Pues camudar coses menores, como meyorar la redaición o'l formatu, pero si quies camudar coses más importantes ties que consultalo a tola comunidá. |
Tolos artículos de Wikipedia tienen de tener referencies (ye dicir, conseñar la fonte de la información) pa que'l llector pueda comprobar la exactitú, precisión y neutralidá del artículu, y buscar más información sobro'l tema. Tol conteníu de Wikipedia tien d'habese asoleyao n'otru llugar (darréu que Wikipedia nun ye una fonte primaria), y por eso siempres ye dable pal autor del artículu incluyir una referencia.
Fontes primaries y Wikipedia
En términos xenerales, pueden estremase dos clases de testos nel espardimientu de la conocencia:
- Fontes primaries: testos que presenten per primer vegada descubrimientos científicos o históricos —como observaciones de llaboratoriu, trescripciones d'esperimentos, investigaciones realizaes por aciu de trabayu de campu, encuestes, censos, trescripciones xurídiques, documentos de dómina o qu'ufierta per— primer vegada una interpretación teórica d'estos descubrimientos, amontando o reestructurando les conocencies sobro un saber.
- Testos qu'esponen de manera más o menos sistemática lo que se presenta y desenvuelve nes fontes primaries. Por casu: enciclopedies, llibros de testu, manuales, etc.
Pa ellaborar les fontes primaries precísase un complexu procesu de comprobación qu'incluye la revisión por pares espertos, la realización d'esperimentos de comparancia y otros tipos d'investigación. Esto ponse en marcha p'asegurase de qu'hai enfotu na información. Wikipedia nun apurre nin puede apurrir esi tipu de comprobación. Sicasí, sí puede sofitase nel material que ta publicáu (y, poro, comprobáu) independientemente por otres fontes d'enfotu y prestixu.
Tantu por razones d'honradez intelectual como pa facilitar la comprobación independiente de la exactitú de los artículos de Wikipedia, ye fundamental apurrir referencies que permitan comprobar los artículos. Esta política ye unu de los trés principios básicos pa evaluar el conteníu de Wikipedia, xunto col de neutralidá nel puntu de vista y el de que Wikipedia nun ye una fonte primaria. Los trés principios tán enforma rellacionaos: la neutralidá garantiza la representación afayadiza y oxetiva de la opinión de los profesionales, y la verificabilidá permite asegurase de que la representación ye efectivamente afayadiza.
Por ello, tolos artículos de Wikipedia tienen de detallar les fontes consultaes na redaición del mesmu; gracies a elles, ye posible asegurase de qu'esiste un respaldu respetable pa les afirmaciones arramaes nellos, y estenar les duldes que puedan esistir no que cinca al sesgu que pueda tener. La reproducción cuidadosa de los puntos de vista y les apreciaciones de les fontes espertes constituyen el modelu que garantiza la seriedá d'una enciclopedia.
¿Por qué dar referencies?
Apurrir referencies permite:
- Comprobar fácilmente la exactitú y precisión del artículu. Tou redactor d'un bon artículu sabe qu'atopar referencies precises pa una afirmación o teoría nun ye siempres fácil, y munches vegaes faelo lleva tiempu y trabayu considerables. Al indicar exautamente cuál ye la fonte qu'emplegasti, permites que los siguientes editores y llectores sepan exautamente ónde dirixise pa comprobar que'l conteníu del artículu correspuende coles fontes orixinales.
- Garantizar la fiabilidá del conteníu del artículu. Ensin importar el valor que pueda tener una contribución orixinal a Wikipedia, la comunidá d'editores nun puede poner en marcha'l procesu de revisión, comparancia y evaluación del que les fontes primaries disponen pa reconocer el valor de les nueves contribuciones a una disciplina. La única manera que tenemos d'evalualos ye unviándonos al consensu de los espertos sobro la tema; si la fonte cola qu'informemos ye d'enfotu, tenemos garantía de que la información ta al altor de lo qu'una enciclopedia tien de publicar.
- Asegurase de que'l conteníu del artículu nun represente namái la opinión personal del autor. Ensin importar les creencies y convencimientos personales de caún de los editores, si'l material se remite a una evaluación esterna, Wikipedia cumple col principiu enciclopédicu de reproducir oxetivamente l'estáu de la conocencia.
- Disponer d'otros recursos pal editor o llector comenenciudu. Al incluyir una seleición de fontes, los que quieran ampliar l'artículu tien una bona idea de qué tipu de material ye apropiáu, y ónde dirixise a por más.
Si sabes abondo d'una tema como pa poder escribir de memoria sobro él, entá nesi casu, lo ideal ye que compruebes los datos contra la fonte antes d'amestalos y que lo dexes claramente documentao. Anque a ti resúltete bien fácil identificar les referencies correutes, la idea ye que tolos llectores puedan atopales ensin tener que consultalo contigo na to propia páxina.
Y nun t'escaezas d'incluyir enllaces pa definir les palabres qu'incluyas nel to testu. Por casu, si tas escribiendo un artículu sobro los routers y espliques qu'estos pueden ser inalámbricos, wi-fi, tamién tendríes de poner un enllaz a Wi-Fi.
¿Cuándo dar referencies?
Al amestar conteníu
- Cita la fonte de la que llograsti la información cuando amplíes un artículu. Puedes faer esceiciones nel casu de datos bien xenerales o de conocencia pública, pero a midida que Wikipedia va creciendo esos casos son cada vez más raros, y la necesidá de documentar cada añadíu ye mayor.
- Emplega un formatu estándar pa les referencies, si sabes cómo faelo (ver cómo citar pa un manual completu). Si nun puedes facelo, incluye tola información relativa a la fonte pa que dalgún otru editor pueda dar formatu a la cita; a lo menos, ye imprescindible saber l'autor y el títulu de la publicación, pero tamién pueden ser de gran ayuda datos como la fecha, el númberu de páxina y la editorial.
- Evita les formes impersonales, como "dellos autores", "hailos que dicen" o díxose"; lo correuto ye:
- identificar espresamente quién sostuvo esa postura, y
- apurrir medios pa poder contrastalo coles sos propies afirmaciones.
Les tos propies opiniones o conclusiones son respetables, pero Wikipedia nun ye'l llugar pa espresales. Recuerda que Wikipedia nun ye una fonte primaria.
Cuando hai polémica
Les referencies son imprescindibles cuando describes les opiniones de dalguna de les partes nuna tema revesosa o polémica.
Si daquién alderica la veracidá, la precisión o la neutralidá d'un artículu, la única manera de demostrala ye dando fontes pa comprobalo:
- Presume bona fe de parte de tolos collaboradores, pero esíxe-yos (y esíxete a ti mesmu) apurrir les sos fontes en casu de discutiniu.
- La información ensin garantizar por referencies tien de treslladase a la páxina d'alderique del artículu si daquién ponla en dulda, pa faer más fácil la so recuperación si dalgún de los participantes puede apurrir fundamentos pa faer tala cosa.
Entá si nun hai discutinios nun momentu dau, ten previsión; escurque eventualmente daquién dulde de lo que s'escribió, y quiciabes l'autor nun tea disponible nesi momentu p'añadir la referencia. Ye meyor esclariar l'orixe de la información dende'l principiu, pa garantizar la so estabilidá en Wikipedia. Ello ye que añadir referencies a información apurrida por otros autores ye una perbona manera d'ayudar a da-y solidez al proyectu.
Pa más información, visita la páxina Verifiability (n'inglés)