Eugène Boudin
|
Eugène-Louis Boudin, gubeon yoltkiraf gu Eugène Boudin tiyir darelitevaf lingesik, i aptacik va piludaf patectoy is biranakila. _-_The_Beach_at_Trouville_-_NG_2372_-_National_Galleries_of_Scotland.jpg) La Plage à Trouville ( Piluda koe Trouville, 1884 ) Blirizva[betara | va krent betá]Normandaf jotugal[betara | va krent betá]Eugène Boudin bak 1824 koe Honfleur tis molt ke Normanda poke Le Havre. Gadikye tir kazaf birelik dene Le Havre-Hamburg birasarva, isen gadikya tir mawakwik koe kazatota. Eugène va katalikevafa bema nobar. Viele yasa bak 1835 va Le Havre koirubar, pune jotafe Eugène tir santandafe ise gan gadikye wetce raves birelik koe kuja wale Le Havre is Honfleur zo rundayar. Bata kotavera va birafa blira tiyir trelafa. Mali 1836 in wetce papleketik dene rubiasik ke Le Havre az Lemasle xutas eluxiasik zo uner. Bata tegira puver numazen bak 1844 in do Jean Acher gesianik va pilkafa gundafa kazatretca redur. Dolta gan yambik ( sutesik is lingesik is lexusik ) zo nobar. Zovdaropafa yamba jekur numen ine toz zovdar. Jean-François Millet ( 1814-1875 ) dere tis normandik va ine bristur. Thomas Couture ( 1815-1879 ) tise sposaf is tarkapan cultimevaf tavesik plataer enide in di gruralinger. Raverugal[betara | va krent betá]Bak 1846 Boudin tir tolsantoldaf. Va intaf pak ke kazabo xaadar enide va lingeropa varon di ektudar. Den Dotafa Zovdasa Bema ke Le Havre va int bender. Blitison, va ordafa nakila is yalestaca is abic delt mu lizukaf glastikeem linger. Bak 1848 koe Belga is Nederlanda koyar nume va vlaanderaf feliapik isu nederlandaf kosmar. Rotire ke Eugène Boudin gan konak turestik al zo tcaluter. Adolphe-Hippolyte Couveley ( 1802-1867 ) blodik ke tcila ke Le Havre, dere tis lingesik va biranakila bas dotaf pirdot ke Le Havre ta vayas filav mu in vezur. Zobera ke Thomas Couture is Constantin Troyon ( 1810-1865 ) is Alphonse Karr suterotik ( 1808-1890 ) va seotara va tandeaf filav vas 1200 franc talolk tori barda jupayar. Boudin va yona trutca kevayon tandeon miv gowarzer aze pu tcila ke Le Havre stakser. Bak teveaksat ke 1851, mil jotaf lingesik va Paris artlapir aze dene lingexo ke Eugène Isabey ( 1803-1886 ) voxis Louvre tcila wetce ksudasik va int bender. Valey ksudaks va vlaanderaf feliik ke Louvre tcila, Boudin tukotratason va rob va yalestaca wan linger. Aneyara va lan martig[betara | va krent betá]Mali 1855 Boudin gikoyapar. Va jonvielera koe Paris is Honfleur goater. Koe Honfleur, va mawa koe Saint-Siméon yoridavesk lizukedur voxe va Breiza dere worar : Saint-Quay-Portrieux is Douarnenez is Tréboul. Inafa kobara va in me tuvalear nume va jontika trutca vilar voxe va kubla adre vanfir : lingera va biradom ik tota ik molt. Taneafa wonara ke Boudin bak 1857 koe Paris dilizer. Bak mil ilanacek, va mon bar-sanoya trutca kaatoesa va lizukaf patectoy botcozon doler. Bak 1858 koe dolta ke Gravier eluxiasik koe Le Havre, va yikye wonase va ozaks kakever. Bantan tir Claude Monet klaaf gu san-anyustda. Turestara ke Boudin va Monet di tir gotusa. Boudin va jotaf ozasik divstar enide lingeson kare fum koe vema ke Le Havre zo wir numen Claude Monet va lingeropa bam gildar. « Va in obrapason disuké nume vere tec italk sollipawer : al gildayá, al doplekuyú dacoba lingeropa rotiyir. » Gazik va kelt[betara | va krent betá]Bak 1859 bal tandeafa wonara grustayana gan Yambaf Cultim, Boudin taneatomon divaykar. Va breizafa ordafa nakila atoer, i va Sainte-Anne-la-Palud trutca sumpasa va Baudelaire ( 1821-1867 ). Milugale va Gustave Courbet ( 1819-1877 ) kakever. Bat toloy yambapik tid siakraf gu biraf patectoy ke Boudin. Courbet koe Honfleur kosmayan tuke Boudin dace jonvieler lize va jontika trutca linger. Boudin do Monet va Johan Jongkind ( 1819-1891 ) dere nobar, i va xollandaf lingesik tis dareik ke liteva. Zobera ke manyon korobik va yambik tuelvar voxe inafa joya va wawafa blira anton tiskar. Kiren kiewatca gaver.  Sur la plage, coucher de soleil ( Moe piluda, titawaltara, 1865 ) Voxen titi 1860-e sanda cava ke birafa kolavara awir. Oluikeem is parisaf glastapikeem va normandafa krimta idulugalon ginobad. Deauville is Trouville vanpid pabupuno koyutaxo. Boudin va lumamafa trutca bam toz skur, i va trutca fumon lingena kaatoesa va gozara is keyaksera is tegira ke batyon tufakirik. Kore saneg va mana kiewotafa lingerinda vol gildar, pune malyopasik va jotaf lingesik kreme katcalad ise permud. Maneke Boudin va tufa toz klokar nume bak 1863 suter : « Jinafa weltikyama moe piluda zo albad numen yontan espud da lan femint bankane co zo gosaver. » Lana inafa trutca tid feliaf grabom, dum bata ticawaltara gesiasa va koyutasik keyakses moe piluda is katcalaf vayaks va sielafi afi. Kelt ke Boudin va mafelara ke lokiewaf lingesik di askid isen Jean-Baptiste Corot ( 1796-1875 ) va in gu « gazik va kelt » yoltayar. Bak taneaksat ke 1863 Eugène Boudin va Marie-Anne Guédès kurer, i va ayikya kakeveyena koe Hanvec breizafa dota mone Brest. Kurera koe Breiza dilizer voxen tolonga ko Paris mali toleaksat di blir. Litevik inton afanas[betara | va krent betá]Boudin va intafa lingesikafa kobara batvielu lajublidar. Malyopasik katcalad isen dace Zola runrojusa va Claude Monet va in kalsisker. In va taneafa litevafa wonara bak 1874 paker, voxen me torigir da tir bewik ke bat lizor. Igeltuca re nover da koe Belga is Nederlanda is Italia koyar. Koe Paris belon giwonar. Bak 1886 Paul Durand-Ruel ( 1831-1922 ) sposaf yambadolekik va wonara koe New York grustar, i va wonara rungrupetesa va litevik koe Tanarasokeem. Konaka trutca ke Boudin zo rebad. Bal tamefa wonara ke Paris bak 1889, toloya inafa trutca va moavafa diema seotad. Awalkera ke kurenik bak mil ilanacek va in vanolapar. Soe inafa ironokafa sanda ke blira di zavzar warzepesa. Va fentugal vagee Franca gitiskir ise diveon kobar. Bak 1895 va Venezia worar. Ba 08/08/1898 koe inafa garia ke Deauville mulufter. Grabomeem[betara | va krent betá] La Plage à Trouville ( Piluda koe Trouville, 1893 )  Barques et estacade à Trouville ( Tiv is kotataxo koe Trouville, 1890-1897 ) Kas kakevera ke Eugène Boudin is lingeropa tir enga ke xuyava ok adruca ? Metan va bata bibera rodulzer. Voxen jotaf eluxadoltik ke Honfleur nope eba tiyir uzeras va lingesik lustes va ugol ik dace wonas koe intafe dolexe. Cuisaf biraf patectoy aname in is towarapa ke lingeropa sizi decemda va arak di askid. Kubla ke Eugène Boudin vas etekara ke inaf pestalen butc is anameda batinde benaykar. Va in van tana lodezlafa lingerinda ke izva star. In doleson va abic delt is loote yalestaca banugale karolapana bokar. Voxen kiewatca tuke piludafa nakila ke normandafo birafo koyutaxo pabupuna gan parisaf oluikeem isu glastapikeem di tir. Vola ke urmaf koyutasik valeve dataf kelt ton Jacob van Ruisdael awid, solve piluda is bira va titafa bareaca ke trutca anton kereled, koe afifa is remawisa vanama. Martig tickir litevaf kore yambik tir volke ban akles lizor ke bane sare. Ilkuca ke Boudin tir tixolarsafa is morarsafa nume va in kimar voxen va tanaf kontepes lum gu grabomeem miledje daskir. Prostewa ruyer da to Corot va in gu « gazik va kelt » askiyir, voxen Boudin miv suter da mancoba tiyir inafa erava. « Jinafa rietava tiyir skura va keltap... voxen lingesik drager numazen kelt levliker. Voxen tetce jontiktan folid da lingeropa tir fakafa. » Inafa griva va vayara va afi vas tela ke Claude Monet abdifir, milinde ura va trutcatum lingesa va mil patectoy ba gedraf gemelt ke afizcek ik cadim, dimzilitison va arapeniwera ke afi. Azenton gu kseva, loadalaf grabom gan nideks ke lukopte is faltalukopte is varkuke ke piluda is gantakoraf alpoz zo felid. Bak 1890-e sanda, tazuk solelawed, kaliafa lingesa vorda va lizira tiaved isen ksevaf mudor tugedrawer. Lingesik dum Claude Monet ponkik van mevolara towar. Yona trutca[betara | va krent betá]
Dere rupec[betara | va krent betá]Stragela[betara | va krent betá]
|
| ||||||||||||||||||
.jpg)
