Klaus Johannis
Klaus Werner Johannis (rumänisch: Iohannis, geboan am 13. Juni 1959 z' Hermannstadt) is a rumänischa Politika. Er gheat zu de Simbiaga Saksn, a deitschschprochign Mindaheit in Simbiagn. Seit 2014 is a da President vo Rumänien.
Da Johannis war friara Schuirat und is anno 2000 Owabuagamoasta vo Hermannstadt worn, obwoi de Saksn do blos mehr a guats Prozent vo de Einwohna ausmachan. Er hot's gschafft, dass Hermannstadt 2007 z'sam mit Luxemburg Kultuahauptstod vo Eiropa worn is. Nochdem a dreimoi wiedagwejt worn is, is a im Juni 2014 Vorsitznda vo da Nationalliberaln Partei (PNL) worn und hot fias Staatspresidentnamt kandidiat. Sei eigntliche Oaganisation, as Demokratische Forum vo de Deitschn in Rumänien (DFDR), is nämli koa anerkannte Partei und hätt koan Kandidatn aufstejn derfa.
Beim eastn Wojgang am 2. Novemba 2014 is a no 10 Prozent hintam Ministapresidentn Victor Ponta gleng, awa a Stichwoj is notwendi worn.[1] De war am 17. Novemba, und da Johannis hot 54,5 Prozent vo de Stimman kriagt[2], obwoi Teile vo da ortodoxn Kiach gsogt ham, ma soiat doch an guatn Ortodoxn wejn (da Johannis is ois Saks a Protestant)[3]. Am 21. Dezemba 2014 is a vaeidigt worn.
Oans vo de Hauptanlign vom Johannis is de Bekämpfung vo da Korruption in Rumänien.
Beleg
[Werkeln | Am Gwëntext werkeln]- ↑ Stichwahl um Rumäniens Presidentenamt: Ponta oder Iohannis (HTML) Frankfurter Rundschau. Abgerufen am 11. Juli 2015.
- ↑ Hohe Erwartungen an eine Wende in Rumänien (HTML) Frankfurter Allgemeine. "2014-12-21. Abgerufen am 11. Juli 2015.
- ↑ Unter Ponta wird sich Rumänien autoritären Staaten annähern (HTML) Tagesanzeiger. "2014-11-14. Abgerufen am 11. Juli 2015.