Bagyong Ondoy

An Bagyong Ondoy (nginaranan sa luwas kan Filipinas na Bagyong Ketsana) iyo an ikaduwang pinakagrabeng bagyo tropikal sa laog kan panahon nin pagbabagyo, taon 2009. Ini nagdara nin destrosong nag'abot $1.09 bilyon, 747 an binawian buhay. An unos na ini iyo an ika-16 na bagyo tropikal sa laog kan taon 2009 asin ikaduwa sa kusog sa mga bagyong nag'aragi sa sinabing taon igdi sa Filipinas. Masabi pa, ini an bagyong nagratak na husto sa Kamanilaan na nadaog pa sa isog an Bagyong Yoling (Bagyo Patsy) kan taon 1970. An bagyo Ondoy grabe an tubig na binagwak sa Manila asin paralibot na nagresulta sa hararom na baha na an tubig nagsinap-sinap na sa mga barisbisan asin ikaduwang eskalon kan mga harong, mala ta 288 katawo an nalamos, pirang ribong harong an narogba.

Sa halaga nin kwarta, ginagaom na dai mababa sa Php 23 bilyon an kawa'ran sa pagkaraot kan mga infraestruktura asin sa agrikultura asin dai pa kabali diyan an mga pribadong pagsasadiri na nakadamay sa pag'agi kan bagyo.

An bagyo naghugmak kan Septyembre 26, 2009 sa pagdolonan kan Aurora asin Quezon dara an sentrong duros na 105 kph asin may hogobohob na duros na 135 kph, dangan nagbaktas sa Central Luzon nin dose oras asin nagpawara sa may kosa kan Zambales. Ini nagkawsa nin mahiwas na perwisyo gibo kan mahibog na bagwak nin uran na nagresulta sa harararom na baha asin pagturumpag kan mga naglumoy na daga.

Pagluwas sa Filipinas ini rinadas pa an parte kan Byetnam, Kambodya asin Laos.

Mga panluwas na takod

• [1] Archived 2016-03-10 at the Wayback Machine. NASA- Hurricane Season 2009. Kinua 05-08-14
• [2] By the Numbers: Ondoy, Habagat 2012, 2013. Kinua 05-08-14
• [3] Storm Ondoy Makes Landfall Causes Widespread Flooding. Kinua 05-08-14