Sisal

Para sa tataramon na panprogram, hilingon an SISAL. Para sa banwaan, hilingon an Sisal, Yucatán.

An sisal (Agave sisalana- Espanyol, henequin; Maya, ki) sarong tinanom na pigpapadakul huli sa komersyal na kagamitan niya asin ini mas maray nagtatalubo sa mga haros mga pakdot na lugar. An awat kan mga dahon kaini pigpoproseso orog na sa paghaman nin mga lubid o pisi na panggakot o pambanting. Ginigibo man ining kable, torsido, sako, tela, kutson, papel, karton, tsinelas, kupya, kaagan, kararaw, sildok, alpombra, olonan, handikraft asin dakul pang usar na gamit sa harong o sa mga industriya.

An agave sisalana, sarong species nin Agave na tubong tal sa bandang habagatan kan Mehiko asin tinatanom naman sa iba-ibang parte kan kinaban.

Mga karahayan sa paggamit sisal

An awat sisal dati iyo an nangengenot na gamit na pambugkos sa mga trabaho sa agrikultura huli kan kunot, tibay, asin katagalan kaini. Orog na ta ini may abilidad sa paghunat ta bakong matapo' asin matagal sa tubig askad maski ini pirming palbag sa dagat. Alagad, an importansya kaini medyo naapektuhan pagruluwasan kan mga bagong gamit na lubid na gibo sa polypropylene. Totoo, igwa naman mga bagong teknolohiya na nagbunga nin mga bagong produkto gibo hale sa sisal.

Ini halimbawa ginagamit nang pampakusog na hapin sa mga lanob asin mga kun ano-ano pang usar kaini sa industriya nin automobil. An maluyang grado kan awat kaini nagagamit sa industriya nin papel huli sa halangkaw na laog nin cellulose asin hemicellulose. An medium na grado kan awat inuusar sa industriya nin lubid sa paggibong pisi, pambulto asin pambugkos na mga pisi na an mga siring mahiwas an pag'usar sa agrikultura asin sa industriya maritimo. An pinakahalangkaw na grado kan awat nauusar sa paghaman nin mga torsido gamit sa industriya nin alpombra.