Daniel Kahneman

Daniel Kahneman, ganet d'ar 5 a viz Meurzh 1934 e Tel Aviv, a zo ur psikologour (psikologiezh anaoudel peurgetket) hag ekonomour amerikan hag israelian. Kelenner emeritus e Skol-veur Princeton eo.

Kuitaet o doa e dud Lituania e penn kentañ ar bloavezhioù 1920 evit dont da Frañs.

Tremenet en deus e vugaleaj e Pariz. Deuet eo a-benn ar familh Kahneman da chom kuzh e-pad an Eil Brezel-bed. Mervel a reas an tad e 1944 diwar an diabet. E 1946 e tivizas ar familh mont da Balestina da chom.

E 1954 en doe Daniel Kahneman e ziplom eus Skol-veur Hebraek Jeruzalem gant psikologiezh da zanvez pennañ ha matematikoù da eil.

Ober a reas e amzer-soudard e servij psikologiezh arme Israel a-raok mont da Skol-veur Kalifornia e Berkeley da studiañ psikologiezh. Doktor e voe e 1961.

Mont a reas da labourat e Skol-veur Hebraek Jeruzalem.

Kelenner "gweladenner" eo bet e Skol-veur Michigan e 1965-66 hag e Cambridge e 1968-69. E 1968-69 eo bet imbourc'her er Center for Cognitive Studies ha mestr-prezegenner war ar psikologiezh e Skol-veur Harvard.

D'ar c'houlz-se e krogas da genlabourat gant Amos Tversky. E 1977-78 edont o daou er Center for Advanced Studies on Behavioral Sciences e Standford.

E 1978 e kuitaas Skol-veur Hebraek Jeruzalem evit hini Kolombia Vreizhveuriat (British Columbia). Mont a reas Amos Tversky da Standford memes bloaz.

Etre 1971 ha 1979 o deus skrivet seizh pennad asambles o sevel ar pezh a voe anvet "teorienn ar pellweladoù" (prospect theory) a zegasas ar Priz Nobel da Zaniel Kahneman. Danvez o labour a oa al liammoù etre skiantoù an emzalc'hioù hag an dibaboù ekonomikel (behavior economics); al liammoù etre klask an eurvad (hedonism) hag ekonomiezh ivez.

Richard Thaler a labouras ganto hag a gemeras harp war o labourioù evit skrivañ Toward a Positive Theory of Consumer Choice (War du un deorienn pozitivel eus dibaboù ar bevezer) e 1980.

Skrivet en deus Daniel Kahneman daou bennad gant Anne Treisman, e wreg abaoe 1978, e 1982.

Mervel a reas Amos Tversky e 1996.

E 2002 e voe roet Priz Nobel an Ekonomiezh da Zaniel Kahneman.

Resevet en deus ur priz gant an American Psycholgy Association e 2007.

Skridoù

Daniel Kahneman hag Amos Tversky, Prospect Theory: An Analysis of Decision under Risk, Econometrica, vol. 47, no 2,‎ Meurzh 1979, p. 263-291
Daniel Kahneman, Jack Knetsch ha Richard Thaler, Experimental Tests of the Endowment Effect and the Coase Theorem, Journal of Political Economy, vol. 98, no 6,‎ Kerzu 1990, p. 1325-1348
Daniel Kahneman (rener) hag Amos Tversky (rener), Choices, Values and Frames, Cambridge University Press,‎ 25 a viz Gwengolo 2000, 860 p. (ISBN 978-0521627498)
Daniel Kahneman, Edward Diener ha Norbert Schwartz, Well-Being : the Foundations of Hedonic Psychology, Russell Sage Foundation publications,‎ 2003
Daniel Kahneman, Thinking, Fast and Slow, Allen Lane, dastumad "AL TPB »,‎ 3 a viz Du 2011, 1e éd., 512 p. (ISBN 978-1846146060)
Daniel Kahneman, Système 1 / Système 2 : Les deux vitesses de la pensée, Flammarion, dastumad « Essais »,‎ 2012, 545 p. (ISBN 2081211475 et 978-2081211476)

Mammennoù

Menegiñ a ra Jacques Généreux labourioù Daniel Kahneman en e levr "Jacques Généreux explique l'économie à tout le monde" (p 270) ; Le Seuil ; 2014 ; ISBN 978-2-02-109782-5