Cuccu

U cuccu
Cuculus canorus
Classificazioni scentifica
Regnu	Animalia
Divisioni	Chordata
Classa	Aves
Ordini	Cuculiformes
Famiglia	Cuculidae
Genaru	Elyomis
Nomu binuminali
Cuculus canorus Linnaeus, 1753

Cuculus canorus canorus + Acrocephalus arundinaceus

Cuculus canorus bangsi + Phoenicurus moussieri

U cuccu cumunu (Cuculus canorus) hè un tipu d'aceddu chì faci parti di a famiglia di i Cuculidae.

Discrizzioni

U cuccu hè un aceddu di taglia media appartinendu à a famiglia di i Cuculidae. U cuccu hè abbastanza maiori, essendu longu 30-35 cm. A coda hè longa, ronda è grisgia. L'apartura alari hè di 55-60 cm. U cuccu pesa 70-160 g. U cuccu hè grisgiu-turchinu sottu è à u liveddu di a vola. I ghjovani sò bruni è russicci. U cuccu ghjugni in Auropa versu a fini di marzu. D'inguernu, si stà in Africa o in Asia.

U nomu cuccu veni da u cantu di 'ssu aceddu.

Biulugia

U cuccu magna bruga è mignocula. A femina faci parechji ova (unu par nidu) in i nida di parechji spezii d'aceddi più chjuchi com'è a cardalina, a capinera, a codizennula, ecc. In ogni nidu, u cuccu femina sceglii un ovu, u si manghja eppo dopu u caccia è u rimpiazza pa u soiu. U piulaconu di u cuccu nasci più prima cà l'altri è si sbarrazza tandu di u restu di a cuvata. Cusì ferma solu in u nidu.

U cuccu si nutrisci d'insetti, di bruga, di molluschi è di ragna.

Ripartizioni

U cuccu cumunu hè una spezia migratrici chì si trova in parti assà di l'Auropa, di l'Asia è di l'Africa. Passa l'istati in i righjoni timparati di l'Auropa è di l'Asia, po migra versu l'Africa subsaariana pà passà l'invernu. Si pò truvà dinò in certi parti di l'India è di l'Asia di u sudestu.

In Corsica

U cuccu hè cumunu in Corsica.

In parechji paesi di u sartinesu, ci era à tempi antichi un usu, sicondu u quali si punia una quistioni à u cuccu ed eddu rispundia. Par esempiu, in Laretu di Tallà, s'è calchissia vulia sapè quant'edda aia da aspittà prima di marità si, dicia tandu:

Cuccu, cuccheddu d'arba turchina

Quantu aghju da stà

Anni fantina.

È ti docu pinna è calamaru

Quantu aghju da stà

Anni à barcà lu mari.

eppo aspitaia chì u cuccu cantessi. S'eddu cantaia una volta, vulia dì: un annu. S'eddu cantaia dui volti, vulia dì: dui anni. Trè volti: trè anni, è cetara.

Tassunumia

U nomu scentificu di u cuccu cumunu hè Cuculus canorus. Esistini uni pochi di sinonimi pà 'ssa spezia, in particulari Cuculus glandarius è Cuculus major. 'Ssi noma sò stati apradati in u passatu, ma u nomu attualmenti accittatu hè Cuculus canorus.

Cunsirvazioni

U cuccu cumunu hè una spezia rilativamenti sparta è a so pupulazioni hè cunsidarata com'è stabuli. Eppuri, certi pupulazioni lucali poni essa minacciati par causa di a distruzzioni di u so ambienti naturali. Hè impurtanti di prisirvà i zoni buscosi è l'ambienti apprupriati pà assicurà a sopravvivenza di 'ssa spezia affascinanti.

Citazioni

U cuccu hè citatu à spessu in a litteratura è a cultura corsa. Par esempiu in i sprissioni:

• un vechju cuccu.
• castrà i cucchi.
• cuntenti com'è un cuccu.
• un annu hè cuccu, un annu hè falcu. Si dici ancu: faci u cuccu è u falcu.
• in u pruverbiu: L'ottu d'aprili, u cuccu si devi sentire. S'eddu un si senti, hè mortu o per murire. Si dici ancu: U cuccu S'ellu un canta lu diciottu, o ellu hè persu o ellu hè mortu.
• in i Canti d'aceddi di Monsignori Di La Fuata: In Arghjachjusa lu cuccu scucculeghja; è in a puisia intitulata "U cuccu":

Aval capiscu: lu cuccu poni l'ova

In drent'à u nidu di quali eddu ni trova

È chì hà fattu quiddu nidu

Li si teni è li si cova.

Riferimenti

• Della Foata, Paulu Matteiu, 1973, "Poesie Giocose in lingua vernacula della pieve d'Ornano"
• J.-C. Thibault & G. Bonaccorsi, The birds of Corsica, British Ornithologists’ Union, Check-list n°17, 1999
• J.-C. Thibault, Connaître les oiseaux de Corse - Acelli di Corsica, Ed. Albiana, 2006

Da veda dinò

• u fiori di cuccu

Altri prugetti

• Cuculus canorus annantu à Wikimedia Commons.