Vitriolu
| |||||
|---|---|---|---|---|---|
| |||||
| Parietaria officinalis | |||||
| Classifica scentifica | |||||
| Regnu | Plantae | ||||
| Divisioni | Magnoliophyta | ||||
| Classa | Magnoliopsida | ||||
| Ordini | Urticales | ||||
| Famiglia | Urticaceae | ||||
| Genaru | Parietaria | ||||
| Nomu binuminali | |||||
| Parietaria officinalis Linnaeus, 1753 | |||||
| |||||
U Vitriolu (Parietaria officinalis) hè una spezia di pianta chì faci parti di u genaru Parietaria.[1]
Discrizzioni
[mudificà | edità a fonte]
U vitriolu hè una pianta arbacea vivaci, alta sinu à 70 cm. U picciolu hè erettu, brunu-rossu, cilindricu, pilosu. I casci sò uvali, lanceulati annantu à u bordu sanu, alterni, picciulati, incù i pela à uncinu micruscopichi in sottu. In cuntrariu à l'urticuli, ùn urinani micca.
I fiora sò minusculi, unisissuati, verdi è accolti in glumeruli à l'ascedda di i casci. Ani un perigoniu divisu in quattru tepali uvali. Ci sò trè tipi di fiora in l'infiuriscenza : masciu, femina è ermafruditu. U vitriolu fiurisci da maghju à uttrovi. Ancu mentri u periudu di fiuritura, 'ssa pianta hè guasgi senza adori.
U fruttu hè un acheniu uvali.
Distribuzioni è ambienti
[mudificà | edità a fonte]A so aria di ripartizioni si stendi à i zoni sottutrupicali di l'emisferu nordu. A parsona u trova faciuli à u cantu di i stradona, longu à i mura di petra asciutta, ma dinò longu à i sebbi è in i boschi.
Prubità
[mudificà | edità a fonte]A pianta cunteni tanninu, flavonoidi è nitratu di putassiu. Hà i prubità diuretichi, emullienti, sudorifichi, depurativi è espetturanti.
Tassunumia
[mudificà | edità a fonte]Etimulugia
[mudificà | edità a fonte]Parietaria disignava dighjà in latinu una pianta chì criscìa annantu à i mura, forsi una parietaria. U termini era una sustantificazioni à u feminicciu di l'aghjittivu parietarius, chì significheghja, "di pareta", "di muru" ed hè dirivatu da paries, -etis (pareta, vechju muru) ; officinalis voli dì ufficinali, veni à dì in vendita in l'ufficini di i spiziali. U termini veni da u latinu officina (atteddu, ufficina) è faci rifirimentu à i prubità diuretichi di a pianta.
Sinunimia
[mudificà | edità a fonte]Parechji sinonimi di Parietaria officinalis sò:
- Parietaria erecta
- Helxine dioscoridis
- Parietaria officinalis erecta
In Corsica
[mudificà | edità a fonte]U vitriolu hè prisenti è cumunu in Corsica. Hè ancu chjamatu a vitriola o a ghjambirossa[2].
Hè mintuvata a vitriola in u pruverbiu corsu: "Urticula, urticula maladetta, vitriola benedetta". Sicondu Arnestu Papi, hè un' "Allusioni fatta à u pastori chì si grattaia par via di l’urticula incù a vitriola ; l’arristò subitu a gratta".[3]
I prubità diuretichi di u vitriolu erani cunnisciuti da tempi antichi. Ci conta Paulu Simonpoli[4] chì: "Hè bona per i reni. Si strappa a pianta cù a cultella o di mane è si caccia e foglie. So i pedi chi so aduprati in tisana. Sta tisana di culore rossu face urinà". È dinò: "Si pudia dinò buleghjà a vitriola è a radica di rimigna per fà sta tisana per urinà."
Citazioni
[mudificà | edità a fonte]A vitriola hè citata in a canzona Senti U Niolu di I Muvrini:
Una chjesola, un campusantu A vechja scola stà chjosa accantu A vitriola ci nasce annantu Una chjesola, un campusantu
Bibliugrafia
[mudificà | edità a fonte]- Conrad, Marcella, I corsi è e piante salvatiche, avà è innanzi, 1981, Adecec
- Paulu Simonpoli, E piante salvatiche - Cunniscenze è usi, 1982, Parcu Naturale di Corsica Archiviu 2012-01-11 at the Wayback Machine
Noti
[mudificà | edità a fonte]- ↑ 'Ss'articulu pruveni in parti da l'articulu currispundenti di a wikipedia in talianu è in francesu.
- ↑ Simonpoli (1982), p. 245.
- ↑ http://ernestpapi.free.fr/Agricultura.%20Agriculture.htm Pruverbii, detti è sprissioni: Agricultura
- ↑ Simonpoli (1982), p. 245.