Julija Putinceva
|
C'l artìcul chè 'l è scrit in
Miranduléś |
La Julija Putinceva (Mósca, 7 ad Śnar dal 1995, Юлия Путинцева in Rus) l'è na tenìsta dal Kazakistan, paéś sarnî da lē in dal Maǵ dal 2012 a 'l pòst dla Rùsia. L'è élta 163 cm e la péśa 59 chilo. La dróa al bras dèstar a la tira 'l arvèrs a dū maṅ.
L'è stada la nùmar utànt'òt dal mónd al 29 'd Avrìl dal 2013. A gh piaśrév cgnósar al cantànt Eminem.
In dla sò caréra l'à śugâ òt finàli ITF vinsénd-an siē.
L'è famóśa par la sò manéra śgarbàda ad cumpurtàr-'s in camp, sigànd da spés di come on! (andém!) quànd la fà punt lē (anc quànd l'al fà cun di śbali ad chi atri) e alvànd al pugn par cargàr-as, pèś dla Marion Bartoli. Dòp al sò incóntar pardû sèg in dal qualificasiòṅ dal turnèo ad Bruxelles dal 2013, la Coco Vandeweghe in sal Twitter l'à dit ad lē: «La fava di pugnét in si fai dópi e in si nàstar e pò quànd la partìda l'è finìda la gh'à abû al curàǵ ad dir-um ch'a sòṅ na śugadōra ch'la fà vgnir al lat a i śnòć méntar sò pàdar al piciàva al maṅ!»[1].
Caréra
La rusa la s fà cgnósar in dal sircùit vinsénd tri turnèo ITF in dal 2011 e pò 'n àt'r incóra in Austràglia in dal Favràr dal 2012. In Avrìl la śōga al WTA ad Cupenàghen in dua la pèrd a 'l secónd tùran da la Jelena Janković par 3-6 1-6. In Maǵ la fà suo anc 'n ITF ad sènt-mila dòlar a Cagnes sur mer tacànd baténd la Nastassja Burnett in dal qualificasiòṅ e pò la Patricia Mayr-Achleitner in finàl par 6-2 6-1. In Utóbar e in Nuvémbar la in pèrd pò dū a Nantes (2-6 3-6 da la Monica Niculescu) e a Dubai (1-6 6-3 4-6 da la Kimiko Date-Krumm, dòp avér batû di òs dûr cuma la Bojana Jovanovski, l'Elina Svitolina e la Kristýna Plíšková). Al ròsp al n gh và minga śò e lē la riva a dir dla giapunéśa ch'«'l è stâ cuma pèrdar da mè nunóna».
La taca al 2013 muciànd sù dū secónd tùran a Hobart e a Melbourne. Chè la bat la Christina McHale par 6-1 6-7 6-2 ma pò la céd par na cria a la Carla Suárez Navarro 6-1 6-7 2-6. A Doha la pèrd subìt (4-6 2-6 da la Mona Barthel), a Dubai invéci la bat la Laura Robson 6-4 2-6 7-6 prima ad lasàr strada a l'Agnieszka Radwańska 5-7 3-6. A Madrid la fà sudàr dimóndi a 'l inìsi la Serena Williams (6-7 1-6) e la fà listés anc in dal secónd tùran a Bruxelles quànd la và a bàtar in sal 2-1 par lē in dal tèrs sét cóntar la Roberta Vinci che però pò la vins 6-3 5-7 6-2. La stmana dòp a 'l Roland Garros la pasa 'l prim tùran cóntar l'Ayumi Morita ma pò la vèṅ spasàda via da la Sara Errani par 1-6 1-6.
Culegamènt estéran
Nòti
- ↑ Vandeweghe: „la Putintseva la m à uféś!“ Ubitennis.com, 21 ad Maǵ dal 2013