Turtlein

St’artéchel ché ’l é stê scret int la koinè Emijana.

I turtlein i en na fata ed pasta pina, tépegh dla zôna str’ed Buloagna e Môdna.

Risèta bulgnaixa

Turtlein mudneix, zbuintê in padèla.

Turtlein bulgneix, cun draint la murtadèla.

Int na padleina, dê un scôt a la lounza cun l’anbroala. Quand ej s en arsurê, mitî·j·li insèm a parsot e murtadèla e tridê incôsa (par dou vault se al pin al v piêx fein). Azuntê·j al bagnulein ch’aj srà zvansê int la padleina, al toaral, la fourma, la nux muschê gratê, poavar es un scrópal ’d sêl. Armixdê pulid incôsa cn el man fein che ’l inpast an al dvainta mulxein e unifourum e lasê·l arpuxêr un pôch.

Tirê cn al matarèl una spoja sutila, tajê·la a quadret, apugê un baluchein ed pin int ciascdon quadrèt e asrê·l par maud ch’al dvintes cum un blîghel (s’a j·n’l avî mè fat, andê mô a vèdar cum al s fà de n’arzdoura bulgnaixa). Pió cein i en, dmèj al é.

Fê bójar seinch minud i turtlein int un boun braud, mej s’al fos ed capoun ch’al iva razê int un’aldamêra. (Se pau av gnes in maint ed magnêr·j sot o a la pana, par me al srev avair la grasia diveina e bucêr·la int al canêl. Mo fê pur vuêter!)