Heraclio Fournier González

Heraclio Fournier González
	;
Bizitza
Jaiotza	Burgos, 1849ko martxoaren 2a
Herrialdea	Araba
Heriotza	Vichy, 1916ko uztailaren 28a (67 urte)
Hobiratze lekua	Santa Isabel hilerria
Familia
Seme-alabak	ikusi Paula Fournier Partearroyo;
Hezkuntza
Hizkuntzak	gaztelania
Jarduerak
Jarduerak	ekintzailea eta inprimatzailea

Heraclio Fournier González (Burgos, Espainia, 1849ko martxoaren 2a – Vichy, Frantzia, 1916ko uztailaren 28a) kartagilea izan zen, Arabako Naipes Heraclio Fournier enpresaren sortzailea. Izan ere, Arabako hiriburu Gasteizen egin zuen bere ibilbide nabarmenena.

Biografia

Heraclio Fournierren aitonak, Francois Fournierrek, Frantzia utzi zuen, eta 1785erako Burgosen aurkitzen zen. Heraclio 1849an jaio zen, Burgosen. Han ere ibiliak ziren haren anaiak karta sortak egiten, ”Fournier Hermanos” marka erabiliz.

1870eko maiatzaren 1ean Heraclio Fournier Nieves Partearroyorekin ezkondu zen eta bikote honek lau alaba izan zituen. Urte honetan Gasteizera bizitzera etorri zen, eta hemen egin zituen, Plaza Berriko 5. zenbakian, lehenbiziko inprimaketa lanak, gaur egun El Globo liburu denda dagoen lekuan. Bulegoko gauzak, txartelak eta era guztietako inprimakiak saltzen jardun zuen.

Produkzioa gehitu zenean, leku handiagoaren beharrak, hiriko beste lantegi batzuetara aldarazi zuen negozioa; eta, han, kartak egiteko eta diseinatzeko prozesuak hobetuz joan zen. 1887an, Sur kalean jarri zuen fabrika, tren geltokiaren ondoan.

1875. urte aldera, Heraclio Fournierrek karta sorta bat diseinatzeko agindu zien Marrazketa Eskolako Emilio Soubrier irakasleari eta Ignacio Diaz Olano margolariari. Urte batzuk geroago, hain zuzen ere 1889an, Augusto Riusek zenbait ukitu eman zizkion karta sorta horri eta ia gaur egun dugunak duen itxura hartu zuen. Enpresaren karta sorta enblematikoenetakoa da. Urte horretan bertan, hau da, 1889an, Heraclio Fournierrek brontzezko domina jaso zuen Parisko Mundu Erakusketan, bere karten diseinu eta kalitatearengatik.

Berritzailea izan zen, bai teknikaren bai lan baldintzen arloan: karten kalitatea hobetzeko inprimatze prozesu berriak ikertu zituen, telefono lineak eta lurrun makinak jarri zituen eta “Sociedad de Socorros a Enfermos” izeneko elkartea sortu, langileak, haietako asko emakumeak, artatzeko.

1916an, hil ostean, Félix Alfaro Fournier bilobak hartu zuen fabrikaren zuzendaritzaren erantzukizuna, bai eta marka hedatzearen ardura bereganatu eta lortu ere; izan ere, estatuko karta merkatuaz jabetu zen eta nazioartean ere ezagun bihurtu zituen oso Fournier karta sortak. Felix Alfarok egun Arabako Fournier Karta Museoa erakusten den karta sorta bilduma ere hasi zuen. Museo hori egun Arabako Foru Aldundiaren mendekoa da.

Urteak joan urteak etorri, Viuda e Hijos de Heraclio Fournier izena hartu zuen enpresak; ondoren, Hijos de Heraclio Fournier; eta geroago, Heraclio Fournier S.A.; gaur egun, Naipes Heraclio Fournier S.A. du izena, eta jokorako kartak egiten jarraitzen du mundu osorako, Goiainen, Araban.

Bibliografia

(Gaztelaniaz) ALFARO FOURNIER, Félix: Los Naipes. Museo Fournier, Vitoria-Gasteiz, Heraclio Fournier S.A., 1982.
(Gaztelaniaz) ALFARO FOURNIER, Félix: Los Naipes II. Museo Fournier, Vitoria-Gasteiz, Heraclio Fournier S.A., 1988.
(Gaztelaniaz) SUÁREZ ALBA, Alberto: A Vitoria Barajas, Vitoria-Gasteiz, Diputación Foral de Álava, 1991.
(Gaztelaniaz) Museo Fournier de Naipes de Álava. Catálogo. Tomo III, Vitoria-Gasteiz, Diputación Foral de Álava, 1994.
(Gaztelaniaz) Museo Fournier de Naipes de Álava. Catálogo. Tomo IV, Vitoria-Gasteiz, Diputación Foral de Álava, 1997.
(Gaztelaniaz) AGUDO RUIZ, Juan de Dios: Los naipes en España, Vitoria-Gasteiz, Diputación Foral de Álava, 2000.
(Gaztelaniaz) DEL SANTO NOGAL, Gregorio: La Saga de los Fournier en Burgos en el siglo XIX, La Sota, Madrid, ASESCOIN, 2016.

Kanpo estekak

Datuak: Q22305124