Nazioarteko Batzorde Elektroteknikoa

Nazioarteko Batzorde Elektroteknikoa
Datuak
Izen laburra	IEC eta CEI
Mota	standards organization (en)
Herrialdea	Suitza
Jarduera
Kidetza	Joint Committee for Guides in Metrology (en)
Agintea
Egoitza nagusi	Geneva;
Osatuta	ISO/IEC JTC 1 (en)
Historia
Sorrera	1906
	webgune ofiziala;

Nazioarteko Batzorde Elektroteknikoa —ingelesez: International Electrotechnical Commission, IEC, frantsesez: Commission électrotechnique internationale— irabazteko asmorik gabeko gobernuz kanpoko normalizazio erakunde bat da. Elektrizitate, elektronika eta hauekin erlazionatutako teknologien alor guztietan Nazioarteko Estandarrak prestatu eta argitaratzen ditu.

NBEren —IEC— estandarrek hainbat teknologia besarkatzen dituzte, tartean energia elektrikoaren sorkuntza, garraio eta banaketa, etxetresna elektriko eta bulegoko ekipamenduak, bateriak, erdieroaleak, zuntz optikoak, nanoteknologia, eguzki-energia, itsas-energia, eta beste asko. Hainbat araudi Estandarizaziorako Nazioarteko Erakundearekin —ISO— batera garatzen dira: ISO/IEC arauak.

NBE, kide diren estatu bakoitzeko normalizazio erakundeek osatzen dute. 2015ean 83 kide ditu, 60 kide titular —full members— eta 23 bazkide —associate members—,^[1] kide bakoitza bere estatuaren ordezkari delarik. Espainiar kidea NBEn AENOR da.

NBE 1906an sortu zen, 1904an Saint Louisen (Missouri) egindako Nazioarteko Biltzar Elektrikoan onartutako erresoluzio baten ondoren. Lehen presidentea Lord Kelvin izan zen. Egoitza Londresen izan zuen, 1948an gaur eguneko egoitzara, Genevan, aldatu zelarik. 1938an erakundeak lehen hiztegi internazionala argitaratu zuen, International Electrotechnical Vocabulary —Nazioarteko Hiztegi Elektroteknikoa—, terminologia elektronikoa bateratzeko asmoarekin. Asmo hau denboran zehar mantendu da, Nazioarteko Hiztegi Elektroteknikoa sektoreko enpresentzat erreferente garrantzitsua delarik.

NBEren ekarpenen artean neurri-unitate batzuen garapen eta hedatzea aipatu daiteke, bereziki Gaussa, Hertza eta Weberra; baita lehen unitate sistema estandarraren proposamena, Giorgi sistema, zeina denborarekin Nazioarteko Unitate Sistema bilakatuko zen.

Erreferentziak

↑ (Ingelesez) IEC members. IEC webgunea. (2015eko uztailaren 24an ikusia).

Ikus, gainera

Kanpo estekak

(Ingelesez) Nazioarteko Batzorde Elektroteknikoaren webgunea
(Ingelesez) Electropedia, IECren hiztegi online dohainekoa, 20.000 termino elektriko eta elektronikorekin.

Datuak: Q193858

[1] (Ingelesez) IEC members. IEC webgunea. (2015eko uztailaren 24an ikusia).

[1]