Transaminasa

Transaminasak entzima mota bat dira, amino taldearen transferentzia-erreakzioak katalizatzen dituztenak. Amino talde hori (-NH₂) aminoazido batetik zetoazido batera pasatu ohi da, ekuazio honen arabera:

Aminoazido (1) (-NH₂)rekin + α-zetoazido (1) ⇔ α-zetoazido (2) (-NH₂)rekin + Aminoazido (2)

Transaminasek, beraz, aminoazidoen metabolismo-erreakzioetan jarduten dute zeregin oso garrantzitsua burutuz.

Bi dira transaminasa nagusiak: GOT eta GPT.

GOT edo glutamato-oxalazetato transaminasa (AST edo aspartato transaminasa ere deitua) gibelean, bihotzean, giltzurrunetan, entzefaloan eta giharretan dago. Erreakzio honetan parte hartzen du:

Aspartato + α-zetoglutarato ⇔ Oxalazetato + Glutamato

GPT edo glutamato-pirubato transaminasa (ALT edo alanina transaminasa ere deitua) gibelean dago batez ere. Beste erreakzio honetan parte hartzen du:

Alanina + α-zetoglutarato ⇔ Pirubato + Glutamato

Transaminasen kontzentrazio normala odolean tarte honetan dago: GOT: 5-35 mU/ml; GPT: 5-40 mU/ml

Kopuru hauek nabarmen igotzen dira zenbait zelula kaltetzen direnean (gibelekoak, adibidez). GPTaren balore altuek kalte hepatikoa adierazi ohi dute (hepatitis, zirrosi...). GOTaren kopuru altua gibeleko gaitzez gain miokardio-infartuaren ondorioz ere ager daiteke.

Kanpo estekak

Datuak: Q424288