Capital (política)

Una capital (del latín caput, capitis, cabeça) de nación es la ciá ondi residin el gobielnu central, los menistérius i tolos olganismus supremus del alministraeru los estaus. Nun sintiu ampriu, es la ciá mas emportanti nun ámbitu social, curtural, económicu u d'algotra naturaleza.

Urbanismu

Se llama capital al centru urbanu (puebru, villa, ciá). Siendu hucheá asina pol su caratel económicu-alministrativu, normalmenti agrupandu várias competéncias pala su mehol hestión. Sigún los paisis, las capitalis puein desistil en deferentis nivelis u herarquias.

Capitalis Autunómicas en España

En España, dessistin várias, prencipiandu pola capital del Estau, ondi s'alcuentran la sé del gobielnu el pais i el Hefi e Estau. Aluspués están las Comuniais Autúnomas u Autunomias, qu'án asumiu compenténcias en deferentis aspetus (fiscalis, sanitárias...), disponiendu ca una e la su capital. Posteriolmenti desistin otras dos entiais: unas son las províncias, encluias éstas endrentu ca Comuniá i otras las comarcas, estas úrtimas ogañu sigún la Comuniá se les da un carátel mas emportanti, disponiendu asinmesmu tamién de la su capital cumu centru alministrativu.

Es común que la capital seya tamién el centru curtural i económicu la su hurisdición u que seya la ciá mas puebrá, peru nu sempri es asina. Pol sabulugal, Méria es la capital d'Estremaura, peru ogañu es la tercel ciá la Comuniá en númiru d'abitantis. Chascus semehantis se repitin pol tol mundu. Es mu dificultosu cámbeal una capital de sé, ya qu'en primel lugal, los abitantis estarian en desalcuerdu ena su mayoria, i en segunderu, tomarui añus cámbeal sés d'eucáncia, palramentus u congresus, sés bancárias... ya establecius nun lugal.

La capitaliá ena estória: Uropa

Aluspués el disolveeru el Empériu Romanu i las envasionis hermánicas, l'Arta Eá Meya preséncia el asiahamientu el Empériu Carolínhiu, el Califatu e Córduba, los Estaus Pontifícius i el Empériu Biçantinu. Tós ellus posein capitalis endiscutibris (Aquisgrán, Córduba, Roma, Biçánciu). Sigrus mas tardi, el disolveeru d'esas cuatru entiais es evienti; mentris tantu el concetu e capital nu es huncional pala Baha Eá Meya, ni siquiá pa Londris u París. Inque eran las ciais de referéncia las mas puerosas monarquias feudalis: Ingraterra i Fráncia, los sus reis estaban sempri viahandu polos sus reinus, atendiendu a las guerras u cualisquiel asuntu pulíticu u dinásticu, i albondas vezis ni la controlaban, sobri tó cola "Guerra los Cien Añus" i aluspués la "Guerra las Dos Rosas". Tapocu es vália pal chascu mas estremu: Roma (con el Cisma d'Ocienti, el Papa estaba en Aviñón u enclusu en Peñíscola).

España

Corona d'Aragón

Nu se puei izil qu'aiga una capital de la Corona d'Aragón. Barcelona es la "ciá condal", es izil, la sé del Condi e Barcelona, entítulu que llevaba consigu el de la mayoria e condaus catalanis (nu tós, Condau d'Urhel era endependienti). Dendi la uñión de Cataluña i el reinu d'Aragón (Ramón Berenguer IV i Petronila) es tamién la ciá ondi abitualmenti s'alcuentra el rei d'Aragón, i ondi se centraliçó el Archivu la Corona d'Aragón, peru las estitucionis de dambos dos reinus nu se mesturarun. El coronaeru cumu rei d'Aragón ena Seo de Çaragoça (pa Pedro IV «cabeça el reinu d'Aragón, el cual reinu es la muestra prencipal desinación i entítulu») quiciás huera el atu mas aparatosu, peru la hura e los fuerus de ca reinu era lo que hazia encetal efetivamenti el reinau en ca unu. El concetu e capital ena Eá Meya, sin Corti remanenti, es pocu huncional. El sistema feudal nu lo nesezita, es argu ralu a él. Ai Cortis (es izil, palramentus) en Aragón i Cataluña (éstas úrtimas con Heneraliá, es izil, comisión tentiga), peru puian reunilsi en cualisquiel lugal (u nu, lo que lo hazia compricau). La reconquista e Mallorca i Valéncia, i el encorporaeru e los reinus italianus (Nápolis i Sicília) comprica la estrutura estitucional, pos furrulan con total autunomia, compartiendu únicamenti el rei, i a vezis ni esu, pos era corrienti deviilus entri várius hermanus, inque alogu se diban reuñificandu un pocu pol açal i un pocu pol promoción del titulal dun reinu a otrus. Nel "Compromisu e Caspe" (1410) se reunierun nesta ciá aragonesa representantis de tres de los reinus de la Corona d'Aragón pa lihil a Fernando d'Antequera u e Trastámara cumu rei. Cola uñificación de los Reis Católicus i sobri tó colos Habsburgo los reis suelin estal lehus (Felipe II ya fiha una capital tentiga en Madril en 1561) i anombran virreis, residiendu ena Corti un Consehu d'Aragón.

Corona de Castilla

Burgus era caput castellae (cabeça Castilla, cumu enantis hue Amaya, sigún el puema e Fernán González), peru esa diniá solu le servia pa palral primeru enas Cortis, desputándusi la prelación con Toleu. Las carabas eran vivísimas, i los acabihó el rei cola famosa frasi: Pol Castilla é palrau yo, palri altonci... (la ciá que huera).

Valladolís puei consieralsi capital hudicial, pola desisténcia nella e l'Audéncia, estitución única hata la conquista e Graná, ondi se hundó algotra (con el nombri e Chancilleria i competéncias al sul de Tahu, mentris que la competéncia sobri la Corti allí ondi estuviera pretenecia a la Sala d'Arcadis). Peru nu era capital lehislativa, pos las Cortis se convocaban en Alcalá de Henares, Toro, Mairil, u ondi le conviniera al rei. Tapocu era la resiéncia única e los reis, que conservaban la Corti muabri, bien huera vesitandu la redi e palácius riales u alcáçaris (una ruta paralela a las cañás de la Mesta que diba pol Segóvia, Mairil, Toleu, Córduba, Sevilla...) u bien vesitandu vasallus, a costa los cualis se mantenian, pol virtú la regalia d'aposentu. Con el rei Carlos I d'España, qu'emburaca a la su mairi (Juana la Chirulata, Juana la Loca en castellanu) en Tordesillas i a los papelis de trohi en Simancas, ai una ciá emperial, qu'es Toleu, quicias polque hue la capital de los Comunerus i la que mas tardi s'entriegó, i una capital romántica qu'es Graná, ondi costruyó un paláciu renacentista en meyu el castillu e cuentu d'adas de l'Alhambra pala su boa con Isabel de Purtugal; nu ostanti, nu estuvu albondu tiempu en denguna, hizu una milenta viahis pol Uropa i se vinu a espenal a Yusti, cuandu ya nu era rei. Hue el rei Felipe II d'España el que assitió la capital en Mairil, ondi assitió tola burocrácia, i crió un cercuitu anual polos rialis sítius d'El Escorial i Aranjuez. El duqui e Lerma se llevó unus añus la capital a Valladolís, pa controlal al rei Felipe III d'España mas cerca los sus própius feudus (Lerma en Burgus) i pa que los comerciantis mairileñus le sobornaran p'arrecuperal la Corti. Quandu el rei Felipe V d'España manda costruil La Granja de San Ildefonso (en plena vertienti segoviana la sierra Guadarrama) polque Mairil nu le petaba, i se pasa dos añus entristeciu en Andalucia, la burocrácia i l'almenistración sobrevivin perfetamenti en Mairil sin rei.

Razonis de la capitaliá en Mairil

La razón de ligil Mairil puu sel qu'abia siu comunera, i el espropiaeru dunas tierras dun emportanti comuneru proporcionó tierras a las siempri chicas propieais rialis la "Casa de Campo", convirtiéndulas nun estensu caçaeru al lau el Arcáçal. Amás Mairil nu tinia obispu (ni lo tuvu en tol Antigu Réhimin), colo que nu hue capital religiosa: lo sedrian Santiagu de Compostela pal norti (ondi cobraba el votu e Santiagu), Sevilla pal sul (encluyendu América) i Toleu, la más rica, pal centru, sé de la que dependia Madril, enclusu eno que toca a tribunal la Enquisición. Tapocu abia preséncia d'aristócratas cerca, siendu los mas cercanus los Mendoza e Guadalajara. Naidi era escapás d'assitial-se al socuellu el rei, i los que s'acercaran queaban craru qu'era polque venian cumu cortisanus. Es lo que tamién acabijó haziendu un sigru aluspués Luis XIV: dilsi a Versalles.