Petroni

Gai Petroni Arbitri (par latin Gaius Petronius Arbiter, muart tal 66) fo un scritôr e poete roman antîc.

La vite

Di Petroni no si sa un fregul, ma i studiôs crodin che Tacit fevelas di lui cuant che al scrivè di un ciert Gai Petroni, che al guviernà cun judizi la Bitinie e, gjavant fûr la premure che al doprave chês voltis che fidavin impegns publics, al avodà ogni dì a vivi a la beade, oziant e poltronant cun indiference tal mont mondan de capitâl; si jere fat cussì il non di arbitri dal gust e Neron, che i jere leât un grum, lu scoltave simpri. Po Tigelin, il prefet dal pretori, invidiôs, lu incolpà di vê tramât cui Pisons par fâ fûr l'imperadôr e Petroni fo condanât a muart; cence scomponisi, chel acetà, inmaniant il suicidi cun serenitât e cu la solite indiference: cussì al murì, daspò vê fat un biel banchet, cjacarât seren e mandât a Neron une liste par ricuardâi dutis lis sôs porcariis.

Il Satyricon

Petroni scrivè il Satyricon, un dai pôcs romançs de leterature latine. A contâ la istorie al è propite il protagonist, Encolpi, un zovin omosessuâl che, sbatecolât di ca e di là par mil aventuris, al va atôr pal mont cul so copari viodint lis porcariis e i vizis dal timp. La istorie je une parodie dai tipics romançs di aventuris eleniscj, che a fevelavin di zovins inamorâts, ma un mascli e une femine e tant plui costumâts, che a vevin di frontâ une schirie di berdeis e imbrois atôr pal mont par rivâ a tornâ a stâ insiemit e vivi beâts. La inspirazion, oltri che di là, i sarà vignude ancje des Faulis milesiis di Aristit di Milêt, une vecje ricolte di contis licenziosis voltade par latin di Sisene, e des saturis menipeis, che, come il romanç di Petroni, jerin une misture di prose e di viers. Petroni met in sene l'ambient de Rome dal timp, cence un fregul di gust ni di morâl e dute plene di parasits, pedolis rifats, fatuitât e vizis, metint adun une schirie di ritrats unevore vîfs, doprant un stîl che al jere gnûf dal dut te leterature latine, chel dal realisim: al imitave la maniere di fevelâ di ducj i diviers stamps di omp, fasint jentrâ te sô prose, robe che prin di lui nol veve fat nissun, ancje la lenghe plui basse. Il protagonist, che al cîr di dâ a diviodi di jessi un studiât, si sfadie a doprâ un registri solen e sustignût, ma nol rive e al finis par fevelâ cence un fregul di gracie, te lenghe de plebe, cun tant di erôrs.

Bibliografie

Paolo Fedeli, Storia letteraria di Roma, Napoli, Ferraro, 2004
Ettore Paratore, Storia della letteratura latina, Bologne, Sansoni, 1957

Leams esternis

Petronio, treccani.it