Cavíidos

A dos cavíidos (Caviidae) é unha familia de mamíferos da orde dos roedores, suborde dos histricomorfos e infraorde dos histricognatos, que inclúe especies de variado tamaño, algunhas delas singularmente grandes en relación á maioría dos integrantes da orde, como a capibara (Hydrochoerus hydrochaeris), que ás veces é clasificada dentro dunha familia propia, a dos hidroquéridos (Hydrochoeridae), aínda que ultimamente tende a ser situada dentro dos cavíidos, incluso compartindo subfamilia (a dos Hydrochoerinae) coas dúas especies de cobaias das rochas (xénero Kerodon).

Características

Coa excepción das maras, que teñen un aspecto máis similar ao do coello, os cavíidos teñen o corpo curto, pesado e coa cabeza grande e rectangular, paralepipédica, e unha cola moi pequena ou ausente. Posúen catro dedos nas extremidades anteriores e tres nas posteriores. O seu tamaño varía desde o das pequenas cobaias, de 22 cm de lonxitude corporal e 300 g de peso, até a capibara, o máis grande dos roedores, de 106 a 134 cm de lonxitude e peso corporal de 35 a 66 kg. Formas aínda máis grandes existiron no plioceno, como Phugatherium, que era do tamaño dun tapir.

Son herbívoros, comendo pastos duros ou follas tenras, dependendo da especie. A fórmula dentaria é similar á de varios outros roedores: 1.0.1.3 / 1.0.1.3. As femias paren a dúas ou tres crías, que nacen xa cubertas de pelo e son plenamente activas, despois dun período de xestación de 50 a 90 días na maioría das especies, ou de 150 días na capibara. Na maioría das especies son sexualmente maduros aos poucos meses de naceren, aínda que nas capibaras a madurez sexual non se alcanza até os 18 meses. (Estas, e outras diferenzas coa capibara é o razón pola que algúns autores separan esta especie a unha familia propia).

A organización social varía amplamente no grupo. Moitos coellos de Indias son promiscuos, e non forman grupos sociais de longa duración, aínda que nalgunhas especies os machos manteñen haréns de dúas ou máis femias. En contraste, as maras son monógamas, e forman garderías coloniais temporais coloniais para coidar as crías de varias nais. As capibaras viven en grupos de ao redor de 10 individuos, ás veces moitos máis, cada un cun só macho dominante e varias femias e machos xuvenís.

Taxonomía

Descrición

A familia foi descrita en 1817 polo naturalista alemán Johann Fischer von Waldheim, residente daquela en Rusia, nun traballo publicado nas Mem. Soc. Imp. Nat. de Moscova, 5: 372.

Clasificación

A familia dos cavíidos está dividida en tres subfamilias, sete xéneros e vinte especies:

Familia Caviidae

• Subfamilia Caviinae
  • Xénero Cavia
    • Cavia aperea
    • Cavia porcellus
    • Cavia anolaimae
    • Cavia fulgida
    • Cavia guianae
    • Cavia intermedia
    • Cavia magna
    • Cavia nana
    • Cavia tschudii

• Xénero Galea
  • • Galea musteloides
    • Galea monasteriensis
    • Galea spixi
    • Galea flavidens
  • Xénero Microcavia
    • Microcavia australis
    • Microcavia niata
    • Microcavia shiptoni

• Subfamilia Dolichotinae
  • Xénero Dolichotis
    • Dolichotis patagonum
  • Xénero Pediolagus
    • Pediolagus salinicola
• Subfamiia Hydrochoerinae
  • Xénero Hydrochoerus
    • Hydrochoerus hydrochaeris
  • Xénero Kerodon
    • Kerodon rupestris
    • Kerodon acrobata

Véxase tamén

Bibliografía

• McKenna, Malcolm C. & Bell, Susan K. (1997): Classification of Mammals Above the Species Level. Nova York: Columbia University Press. ISBN 0-231-11013-8.
• Nowak, Ronald M. (1999): Walker's Mammals of the World. 6ª ed. Baltimore, Maryland, EE. UU.: The Johns Hopkins University Press. ISBN 978-0-8018-5789-8.
• Rowe, D. L. & R. L. Honeycutt (2002): "Phylogenetic relationships, ecological correlates, and molecular evolution within the Cavioidea (Mammalia, Rodentia)". Molecular Biology and Evolution 19: 263-277.
• Woods, C. A. & Kilpatrick, C. W. (2005): "Infraorder Hystricognathi". En Wilson, D. E.; Reeder, D. M. Mammal Species of the World: A Taxonomic and Geographic Reference 3rd ed. Baltimore, Maryland, USA: The Johns Hopkins University Press. ISBN 978-0-8018-8221-0, pp. 1552–1555.

Outros artigos

• Roedores
• Histricomorfos
• Histricognatos

Ligazóns externas

• Caviidae na ADW. Con ampla información, imaxes e referencias bibliográficas (en inglés).
• Caviidae na EOL.
• Caviidae Arquivado 03 de marzo de 2016 en Wayback Machine. en Fossilworks.