Ricardo Núñez Lissarrague

Ricardo Núñez Lissarrague
	;
Biografía
Nacemento	16 de xullo de 1904 ; Betanzos, España
Morte	14 de xuño de 1998 (93 anos); Palma, España
Actividade
Ocupación	director de cinema, guionista, actor, produtor de cinema
Período de actividade	1927 -

Ricardo Núñez Lissarrague, nado en Betanzos o 16 de xullo de 1904 e finado en Palma de Mallorca o 14 de xuño de 1998, foi un actor, guionista, produtor e director de cine galego.

Biografía

Nado no seo dunha familia acomodada do Betanzos de principios do século XX, Ricardo trasladouse a Madrid en 1923, onde abriu unha cafetería chamada Atocha. Asiduo ás tertulias artísticas do café "María Cristina", alí descubriuno o actor e director Florián Rey, que o contratou para actuar na película muda El pilluelo de Madrid. Esta colaboración abriulle as portas para participar noutras películas do citado director, como Águilas de acero e La hermana San Sulpicio, filme que o fixo saltar á fama xunto a Imperio Argentina.

A aparición do son no cine supuxo un gran reto para Ricardo: o de camuflar o seu marcado acento galego. Superado este hándicap, e logo dalgunhas aparicións menores, púxose ás ordes do director Benito Perojo para rodar Susana tiene un secreto, Se ha fugado un preso e Rumbo al Cairo, converténdose nunha das estrelas do cine español do momento.

Ao estalar a guerra civil española, Ricardo colaborou en varias películas de apoio á República. Logo da derrota da República, viuse obrigado a exiliarse a Arxentina en 1939, onde se estreou como director coas longametraxes Madre Alegría e Fuego Sagrado. Igualmente, produciu varias películas para Benito Perojo, como Chiruca ou La copla de la Dolores, de novo con Imperio Argentina como protagonista.

A revolución que estalou na Arxentina en 1955 provocou o regreso de Ricardo Núñez a España, onde dirixiu "La chica del barrio" e ata catro películas máis. No seu penúltimo traballo como director, "Lo que cuesta vivir", realizou un cameo aparecendo como taxista.

A partir de 1962 centrouse no seu labor de guionista e produtor, procurando illarse da popularidade e levar unha vida tranquila ata o seu pasamento á idade de 93 anos.

Filmografía

Como actor

Lo que cuesta vivir (propia, 1958)
Nuestro culpable (1938), de Fernando Mignoni
En busca de una canción (1937), de Eusebio Fernández Ardavín
Rumbo al Cairo (1935), de Benito Perojo
Es mi hombre (1935), de Benito Perojo
Crisis mundial (1934), de Benito Perojo
Se ha fugado un preso (1934), de Benito Perojo
Sol en la nieve (1933), de León Artola
Alalá (1933), de Adolf Trotz
Corre, mulilla (1933), de Benito Perojo (curtametraxe)
Susana tiene un secreto (1933), de Benito Perojo
El hombre que se reía del amor (1933), de Benito Perojo
Las noches de Port Said (1931), de Leo Mittler
La aldea maldita (1930), de Florián Rey
48 pesetas de taxi (1930), de Fernando Delgado
Fútbol, amor y toros (1929), de Florián Rey
La Hermana San Sulpicio (1927), de Florián Rey, xunto a Imperio Argentina
Águilas de acero (1927), de Florián Rey
El Pilluelo de Madrid (1927), de Florián Rey

Como director

Detective con faldas (1962)
Lo que cuesta vivir (1958)
Tremolina (1957)
Malagueña (1956)
La chica del barrio (1956)
Fuego Sagrado (1950)
Madre Alegría (1950)

Como produtor

Cuentos de las sábanas blancas (1977), de Mariano Ozores
El alma se serena (1970), de José Luis Sáenz de Heredia
Miss Cuplé (1959), de Pedro Lazaga
Lo que cuesta vivir (propia, 1958)
Tremolina (propia, 1957)
Malagueña (propia, 1956)
Lo que fue de La Dolores (1947), de Benito Perojo
Villa rica del Espíritu Santo (1945), de Benito Perojo
Martingala (1940), de Fernando Mignoni
Nuestra Natacha (1936), de Benito Perojo

Como guionista

Escándalo en el internado (1966), de Marino Girolami
Lo que cuesta vivir (propia, 1958)
Tremolina (propia, 1957, en cooperación con Mauricio Torres)
Madre Alegría (propia, 1950)

Véxase tamén

Bibliografía

Mosquera Camba, José Luis (1986). "Ricardo Núñez, una vida para el cine". Anuario Brigantino. ISSN:.

Ligazóns externas

Ricardo Núñez Lissarrague na Internet Movie Database