Lubjenc (hora)

Lubjenc; Mehltheuerberg
wysokosć	384 m
kraj	Sakska, Němska
masiw	Łužiske hory
kamjenizna	dwubłyšćinkaty a łužiski granodiorit
Lubjenc (hora) na karće Sakskeje

51.14222222222214.481944444444

Koordinaty: 51° 8′ 32″ S, 14° 28′ 55″ W

Lubjenc (němsce Mehltheuerberg) je 384 m^[1] wysoka hora w Sakskej. Je najsewjerniša hora w Łužiskich horach.^[2]

Přirodne poměry

Hora leži na sewjernej kromje němskeho dźěla Łužiskich hor a jeje dźěla Wuchodne Łužiske hóry. Ze sewjera nawjazuja Hornjołužiske hona. Pod juhozapadnej nohu Lubjenca leži wjes ze samsnym mjenom Lubjenc, kotraž přisłuša k Budestecam, wjeršk a wjetšina hórky pak leži na teritoriju gmejny Kubšicy. Geologiske podłohi twori we wjeršku łužiski granodiorit a podkładźenje skłoninow potom dwubłyšćinkaty granodiorit.^[3] Cyła hora słuša k přitočnišću Sprjewje a Sewjerneho morja.

Stawizny

Horu su wot srjedźowěka ratarsce wužiwali. Wulke dźěle prěnjotnje hustych lěsow buchu wutupjene, zo by rólna póda nastała. Prěnjotny lisćowy lěs, kotryž njebu do hospodarskeho jehlinoweho lěsa přeměnjeny, wobchowa so wot wysokosće 300 m, na južnej a wuchodnej skłoninje hač wot wysokosće 370 m. W sedle mjez Lubjencom a susodnej horu Žmórcom wjedźe Kumwałdski wikowanski puć, kotryž zwjazuje Kumwałd z Budyšinom. Alternatiwne pomjenowanje wjerška Ferdinandshöhe (Ferdinandowa wyšina) pochadźa wot něhdyšeho wobsedźerja knježeho dwora Pielitz. Na wjeršku steji wopomnjenski kamjeń porosćeny z blušćom.

Žórla

↑ Topographische Karte Sachsen 1:10 000 (němsce) Staatsbetrieb Geobasisinformation und Vermessung Sachsen. Wotwołane dnja 29. nowembra 2024.
↑ FDZ Naturräume in Sachsen (němsce) Wotwołane dnja 29. nowembra 2024.
↑ Geologische Karte Sachsen 1:50 000 (němsce) Staatsbetrieb Geobasisinformation und Vermessung Sachsen. Wotwołane dnja 29. nowembra 2024.