«Sweet Love», ամերիկացի R&B երգիչ Քրիս Բրաունի երգն է։ Այն թողարկվել է 2012 թվականի ապրիլի 10-ին՝ որպես նրա «Fortune» (2012) կոչվող հինգերորդ ստուդիական ալբոմի երկրորդ սինգլ։ Երգը գրվել է Քրիս Բրաունի, Քորի Մարկսի, Գրեգ Քրթիսի, Polow da Don-ի, Ջեյսոն Փերրիի և Թոմի Դոյլ կրտսերի կողմից։ «Sweet Love»-ը R&B բալլադ է, որի բառերում Քրիս Բրաունը իր սիրեցյալին խնդրում է մերկանալ և սիրով զբաղվել։
Երգը հիմնականում դրական արձագանքներ է ստացել երաժշտական քննադատների կողմից, ովքեր բարձր են գնահատել երգի սեքսուալ բառերը։ Երգը զբաղեցրել է 89-րդ հորիզոնականը Billboard Hot 100 հիթ շքերթում, իսկ Billboard Hot R&B/Hip-Hop Songs հիթ շքերթում 25-րդ հորիզոնականն է զբաղեցրել։
«Sweet Love» երգի հեղինակներն են Քրիս Բրաունը, Քորի Մարկսը, Գրեգ Քրթիսը, Polow da Don-ը, Ջեյսոն Փերրին և Թոմի Դոյլ կրտսերը։ Polow da Don-ը և Ջեյսոն Փերրին նաև զբաղվել են երգի պրոդյուսերական աշխատանքով։ Աուդիո միքսինգով զբաղվել է Ջեյսեն Ջաշուան, ում օգնել է Թրեյհի Հարիսը։ Գրեգ Քրթիսը նվագել է ստեղնաշարային գործիքները։ 2012 թվականի մարտի 28-ին Բրաունը իր Թվիթթերի էջի միջոցով հայտարարեց, որ «Sweet Love» և «Till I Die» երգերը լինելու են «Fortune» ալբոմի հաջորդ երկու սինգլները և հաջորդելու են «Turn Up the Music» երգին, որը ալբոմի առաջին սինգլն է[1]։ Նույն օրը «Sweet Love» երգը հայտնվեց համացանցում[2]։ Երգի շապիկի պատկերը լուսանկարվել է սև/սպիտակ գույներով և համացանցում տեղադրվել է մարտի 30-ին[3]։ Շապիկի վրա պատկերված է Բրաունը, ով կրում է կոստյում և նստած է հատակին՝ երեք կանանց ոտքերի առջև[3]։ Երգը որպես ալբոմի երկրորդ սինգլ թողարկվեց ապրիլի 10-ին[4]։ Ապրիլի 13-ին այն արդեն մի շարք երկրեներում հասանելի դարձավ թվային ներբեռնման համար iTunes-ում[5]։ Նույն տարվա հուլիսի 26-ին համացանցում տեղադրվեց երգի ռեմիքս տարբերակը, որում իր մասնակցությունն ունի նաև ամերիկացի երգիչ Ար Քելլին[6]։
