Communa (Francia)
In Francia, le communa es, a nivello institutional, simultaneemente un collectivitate territorial, es dicere, un autoritate administrative decentralisate beneficiante de personalitate juridic e que ha affaires proprie, distincte del affaires del stato, e un circumscription administrative, es dicere, un division administrative prive de personalitate juridic, territorio de exercitio de un servicio decentralisate del administration statal o de un de su representantes. Cata un de iste organos es characterisate per un identitate (un nomine, un territorio e un population) e per competencias que es delegite a illes per le lege. A nivello geographic, le communa es un division elementari del territorio national que anque pote servir como division de gestion o cognition del territorio.
Como collectivitate territorial, le communa consiste in un assemblea deliberante, le consilio municipal, e un executivo, le maire, electe per le consilio municipal. Electe per suffragio universal directe, le consilio municipal ha competencias extensive pro administrar le communa. Le modalitates de election varia secundo le population e le stato particular del communa, como in le casos de Paris, Lyon o Marseille. Le 1 de januario 2022, 34 955 collectivitates territorial es subordinate al categoria del communas, secundo le direction general de collectivitates local (DGCL), includente 34 826 in Francia metropolitan (incluse Corsica) e 129 in le departmentos e regiones ultramarin (incluse Mayotte).
Como circumscription administrative, le communa constitue le organo elementari de exercitio del stato sur le territorio national. Le maire, a parte su functiones como executivo del collectivitate, exerce de facto certe prerogativas que pertine al competencias del stato. A iste effecto, ille es responsabile specialmente del stato civil, del revision e tenentia del listas electoral, del organisation del electiones, como tamben del censimento pro le servicio national. Al plus, ille ha attributiones specific in materia de policia e securitate civil. Le 1 de januario 2022, 35 038 circumscriptions administrative es subordinate al categoria del communas.
Como division geographic del territorio, le communa servi como unitate fundamental pro multe statisticas, como le censimento del population. Ille anque pote esser subdividite in divisiones infra-communal: fractiones cantonal, quartieres, sectiones, etc.
Historicamente, le communa francese es le herede del paroecia del Ancian Regime o del "communitate" (circumscription fiscal que portava anque le nomine de "paroecia fiscal", in le urbes con duo o plus campaniles, o de "collecta"). Al initio del seculo XXI, le communa pote corresponder a un pluralitate de spatios human: spatio rural con un centro (village o vico), urbe isolite o parte de un agglomeration multicommunal.
Su superficie e su population pote variar assatis. In 2021, Paris es le communa con le population le plus grande con 2 133 111 habitantes, durante que septem communas non es habitate e le communa habitate le minus popule, Rochefourchat, ha solmente un habitante. Al 1 de januario 2021, 29 576 communas, lo que representa 84,6% de illos, ha minus de 2 000 habitantes; illes constitue 22,6% del population del pais.