The Social Network
The Social Network ("La Sociala Reto") esas usana biografiala dramato-filmo di 2010 direktita da David Fincher e skribita da Aaron Sorkin.
Adaptita de la libro da Ben Mezrich di 2009 The Accidental Billionaires, la filmo naracas la fondeso di la sociala reto-situo Facebook, e la rezultinta lego-procesi. En ol pleas Jesse Eisenberg kom la fondinto Mark Zuckerberg, kun Andrew Garfield kom Eduardo Saverin, Justin Timberlake kom Sean Parker, Armie Hammer kom la jemeli Cameron e Tyler Winklevoss, e Max Minghella kom Divya Narendra.
Nek Zuckerberg, nek irga altra employato di Facebook partoprenis la projeto, ma Saverin esis konsultanto por la libro da Mezrich. La filmo editesis en Usa da Columbia Pictures ye 1ma oktobro 2010.
The Social Network ganis multa kritikala laudo; kritikeri laudis olua direkteso, cinematografeso, aktori, redakteso e muziko. La filmo aparis en 78 listi de la maxim bona filmi di 2010; ek ti, en 22 listi la filmo esis numero un. La filmo anke selektesis da la National Board of Review kom la maxim bona filmo di 2010.
Che la 83ma Academy-Premii, la filmo recevis ok nominesi, inkluze por Best Picture, Best Director, e Best Actor por Eisenberg, e ganis tri: Best Adapted Screenplay, Best Original Score, e Best Film Editing. La filmo anke recevis premii por Best Motion Picture - Drama, Best Director, Best Screenplay, e Best Original Score che la 68ma Golden Globe-Premii.
En 2016, on votis ol 27ma inter la 100 filmi egardita kom le maxim bona dil 21ma yarcento da 117 filmo-kritikeri de cirkum la mondo. En 2019, la revuo Esquire votis ol kom la maxim bona filmo dil yardeko 2010.
Naraco
[redaktar | redaktar fonto]En oktobro 2003, 19-evanta studento che Harvard-Universitato Mark Zuckerberg abandonesas da sua amikino Erica Albright. Retroveninta a sua dormeyo, Zuckerberg skribas insultanta artiklo pri Albright en sua LiveJournal-blogo, e lore kreas interna retosituo titulizita Facemash per "hack"-ar aden la datumbazi di Harvard por furtar fotografuri di femina studenti, e permisanta situo-vizitanti evaluar elia atraktiveso. Pos ke trafiko al situo paneigas parti del komputoro-reto di Harvard, Zuckerberg punisesas per sis monati de edukala probeso. Tamen, la populareso di Facemash atraktas l'atenco dil Harvard-seniori e jemeli Cameron e Tyler Winklevoss e lia komerco-partenero Divya Narendra. La trio invitas Zuckerberg laborar pri Harvard Connection, sociala reto qua enfokigis l'exkluziva naturo di Harvard-studenti e vizis rendevui ("dating").
Pos konsentar laborar pri la koncepto da la jemeli Winklevoss, Zuckerberg propozas a sua amiko Eduardo Saverin ideo pri Thefacebook, enreta sociala reto-situo qua esus exkluzive por studenti dil "Ivy League". Saverin provizas $1000 por "semino"-financizo, qua kapabligas Mark konstruktar la retosituo, olqua rapide divenas populara. Kande li saveskas pri Thefacebook, la jemeli Winklevoss e Narendra iracas, kredanta ke Zuckerberg furtis lia ideo, dum intence ne informar li per lentigar developo dil retosituo Harvard Connection. Li plendas a la prezidanto di Harvard, Larry Summers, qua esas refuzema e vidas nula valoro en o diciplinal agado, o la retosituo Thefacebook ipsa.
Saverin e Zuckerberg renkontras la studentino Christy Lee, elqua pregas li "Facebook me", frazo qua favore impresas ili amba. Dum ke Thefacebook plupopulareskas, Zuckerberg extensas la reto al usana universitati Yale, Columbia e Stanford. Lee aranjas ke Saverin e Zuckerberg renkontros la kunfondinto di Napster, Sean Parker, qua prizentas "miliardo-dolara" viziono por la kompanio qua favore impresas Zuckerberg. Il anke sugestas eskartar "The" de Thefacebook, tale simpligante la nomo a Facebook.
Tra la filmo aparas ceni de lego-procesi kontre Zuckerberg e Facebook. La jemeli Winklevoss asertas ke Zuckerberg furtis lia ideo, dum ke Saverin asertas ke lua Facebook-acioni neyuste dilutesis kande la kompanio korporacioneskis.