Sharon Tate

Sharon Tate
Mynd af Sharon Tate árið 1967 fyrir kvikmyndina Valley of the Dolls.
Upplýsingar
Fædd	Sharon Marie Tate 24. janúar 1943 Dallas, Texas, Bandaríkjunum
Dáin	9. ágúst 1969 (26 ára) Los Angeles, Kaliforníu, Bandaríkjunum
Ár virk	1961–1969
Maki	Roman Polanski (g. 1968)
Helstu hlutverk
Sarah Shagal í The Fearless Vampire Killers (1967) Odile de Caray í Eye of the Devil (1967) Jennifer North í Valley of the Dolls (1967) Freya Carlson í The Wrecking Crew (1968)

Sharon Marie Tate Polanski (24. janúar 1943 – 9. ágúst 1969) var bandarísk leikkona og fyrirsæta. Á sjöunda áratugnum birtist hún í ýmsum smáhlutverkum í sjónvarpi og var oft ljósmynduð fyrir tískublöð og önnur tímarit. Litið var á hana sem efnilega Hollywood-stjörnu eftir að henni var vel tekið í nokkrum gaman- og dramahlutverkum í bandarískum kvikmyndum undir lok áratugarins.

Þann 9. ágúst 1969 var Tate myrt ásamt þremur vinum sínum á heimili eiginmanns síns, kvikmyndaleikstjórans Romans Polanski. Morðingjarnir voru meðlimir Manson-fjölskyldunnar og höfðu verið sendir til að vinna ódæðisverkið af leiðtoganum Charles Manson. Tate var ólétt af barni þeirra Polanski og komin átta og hálfan mánuð á leið þegar hún var myrt.

Æviágrip

Sharon Tate fæddist þann 24. janúar 1943 og ólst upp sem „hermannsbarn“ þar sem faðir hennar var liðsforingi í Bandaríkjaher. Strax á barnsaldri vakti hún mikla athygli fyrir fegurð sína og vann ýmsar fegurðarkeppnir bæði sem táningur og sem ungbarn. Frá 1960 til 1962 bjó Tate ásamt fjölskyldu sinni í Veróna á Ítalíu, þar sem faðir hennar hafði verið staðsettur áfram herliði sínu. Þar varð Tate vitni að upptökum á nokkrum bandarískum kvikmyndum í grenndinni og hlaut aukahlutverk í nokkrum þeirra. Með þessu var vakinn áhugi hennar á því að hefja leikferil.

Tate flutti til Hollywood árið 1962 til þess að freista þess að hefja feril í kvikmyndum. Þar kynntist hún kvikmyndaframleiðandanum Martin Ransohoff, sem ákvað að ráða hana og reyna að gera úr henni kvikmyndastjörnu. Fyrsta kvikmyndin sem Tate lék í fyrir Ransohoff hét Eye of the Devil og fjallaði um svartagaldur og trúarmorð. Í næstu mynd sinni fyrir Ransohoff, Don't Make Waves, lék Tate á móti stórleikaranum Tony Curtis.

Árið 1967 lék Tate eitt aðalhlutverkið í kvikmyndinni The Fearless Vampire Killers og komst þar í kynni við pólska kvikmyndaleikstjórann Roman Polanski. Tate og Polanski urðu ástfangin og gengu í hjónaband þann 20. janúar 1968. Þau áttu í ástríðufullu sambandi en Polanski átti einnig í samböndum við aðrar konur á meðan á hjónabandi þeirra stóð og hélt því fram að það væri andstætt eðli hans sem karlmanns að halda trúnað við aðeins eina konu. Tate á að hafa sagt um hjónabandið: „Við erum með gott fyrirkomulag. Roman lýgur að mér og ég læt sem ég trúi honum“.

Tate varð þunguð af barni þeirra Romans síðla árs 1968. Hún var komin rúma átta mánuði á leið í ágúst árið 1969 og bjó á þeim tíma ásamt Polanski í lúxusíbúð í Benedict Canyon í Los Angeles. Þann 8. ágúst var Polanski á kvikmyndahátíð í Evrópu en Tate ákvað að vera heima frekar en að þiggja boð á frumsýningu á kvikmynd í Las Vegas. Tate hafði boðið til veislu í íbúðinni en aflýst henni á síðustu stundu og því mættu að endingu aðeins þrír kunningjar hennar heim til Tate þetta kvöld: Fyrrum kærasti hennar, hárgreiðslumeistarinn Jay Sebring; vinur Polanski frá Póllandi, Wojciech Frykowski; og kærasta Frykowski, Abigail Folger.

Kvöldið 8. ágúst brutust þrír meðlimir Manson-gengisins, þau Tex Watson, Susan Atkins og Patricia Krenwinkel, inn í íbúðina og myrtu alla viðstadda í húsinu, þar á meðal Tate ásamt ófæddu barni hennar. Auk fólksins í íbúðinni myrtu þau einnig ungan mann, Steven Parent, sem hafði orðið var við ferðir þeirra stutt frá húsinu. Charles Manson hafði skipað fylgjendum sínum að fremja morðin til þess að uppfylla skilyrði fyrir kynþáttastríði sem hann taldi að ætti að brjótast út milli hvítra og svartra Bandaríkjamanna. Húsið hafði hann valið þar sem það hafði áður tilheyrt kunningja hans, Terry Melcher, syni leikkonunnar Doris Day. Tate baðst griða og grátbað morðingja sína að leyfa sér að minnsta kosti að eiga barnið áður en hún dæi en Manson-gengið fór ekki að bónum hennar. Susan Atkins hélt henni niðri eftir að allir kunningjar Tate höfðu verið drepnir og Tex Watson stakk Tate til dauða með hníf.