Chibi Maruko-chan
Chibi Maruko-chan (ちびまる子ちゃん) yaiku serial anime kang kaangkat saka manga populèr karyané Momoko Sakura lan uga jeneng undangané paraga mligi awujud bocah cilik wadon umuré sangang taun kelas 3 SD. Kisahe nyritakake komedhi urip saben dina bocah SD miturut pengalaman pengarange nalika isih cilik. Chibi Maruko-chan uga didadèkaké serial drama kanthi paraga cilik Ei Morisako (génerasi pisanan) lan Ayaka Itoh (génerasi kapindho).[1]
Sinopsis
[besut | besut sumber]Sawijining dina Hiroshi (bapake maruko) menang undian hadhiahe mobil, dhèwèké ngajak sakulawargane lumaku-lumaku nanging namung ibune kang ora mèlu amarga mabuk dharat. Pungkasane kang mangkat, mung wong papat thok (bapake, simbah kakung, maruko, lan mbakyune), embuh kenapa saben dalan mobile arep nabrak trus mula sakabehing kang ana ing jero mobil jantunge arep copot. Apa manèh simbah kakunge kang eling nalika isih nom tau nglakoni tes kesamaan banyaknya detak jantung lan nadhi kang dipercaya yèn jumlahe padha antarané dhetak jantung lan nadhi mula kang dites bakalan urip nganti tekan 24 jam manèh. Sanajan arep nabrak, akhire tekan ing pecinan. Nanging, wis adoh-adoh tekan pecinan, ing kana mung madhang mi. Mbakyune Maruko shock banget nganti tekan omah. Tekan omah, kaya lumrahé urusane Maruko langsung mara paturasan, banjur mbakyune ditakoni ibune, "Mau kepriye?" Mbakyune mangsuli "mi". Saben ditakoni ibune wangsulane kayak ngono trus. Sawisé kedadeyan iku, mobile iku mung dienggo Hiroshi lunga mancing.[2]
kulawarga Maruko-chan
[besut | besut sumber]
- Momoko "Maruko" Sakura (さくらももこ, Sakura Momoko)
- Paraga utama ing komik Chibimaruko-chan duwé jeneng asli Momoko Sakura kaya déné jeneng pengarange, yaiku bocah wadon kelas 3 SD kang urip ing kulawarga kanthi ékonomi menengah mangisor. Dhèwèké kesed, seneng blangkrahan, bijine èlèk trus, lan kerep telat mangkat sekolah mula kerep nyusahake ibune, apa manèh nalika nggugah tangi. Sipate béda karo mbakyune kang sregep, pinter, sarta pandhiriyane kalem. Kayadene bocah saumurane, dhèwèké ora seneng yèn diwènèhi tugas omah lan kerep pilih-pilih panganan. Saliyané iku, dhèwèké putu kasayangane simbah kakunge. Maruko duwé kepinginan dadi pengarang manga nalika gedhé besok.[3]
- Hiroshi Sakura (さくらひろし, Sakura Hiroshi)
- Bapake Maruko, wong kang egois lan yèn ngendika tembunge pedhes lan sakarepe dhéwé, tau tukaran karo Maruko amarga prakara Natto. Caritané bapake ngecap Maruko kang ora seneng yaiku mung ngisin-isinake Jepang thok. Anggota kulawarga liyané nganggep ngendikane bapake kelewatan banget, saliyané iku isih akèh prakara kang ndadèkaké Maruko utawa anggota kulawarga liyané tukaran karo dhewele. Hobine mung mancing lan ngombé ombenan kang marakake mabuk.[4]
- Sumire Sakura (さくらすみれ, Sakura Sumire)
- Ibune Maruko, kerep nyeneni Maruko amarga dhèwèké nakal. Sumire yaiku ibu kang dhisiplin nanging tolerir. Dhèwèké tlaten banget karo pengeluaran kulawarga lan ngupayakake éntuk barang-barang kabutuhan kanthi rega kang murah banget. Nalika isih nom, jeneng asline yaiku Kobayashi Sumire.
- Sakiko Sakura (さくらさきこ, Sakura Sakiko)
- Yaiku mbakyune Maruko, béda banget karo Maruko kang kesed, bandhel, kerep éntuk biji èlèk. Sakiko wong kang sregep, kalem, lan pinter. Dhèwèké kerep éntuk perhatiyan saka ibune kang ndadèkaké Maruko iri. Sakiko yaiku murid kelas 6 SD kang padha karo sekolahé Maruko.
- Tomozou Sakura (さくら友蔵, Sakura Tomozō)
- Simbah kakunge Maruko, Maruko yaiku putu kasayangane. Simbahe iki kerep banget katon bareng karo Maruko, embuh nonton TV utawa lumaku-lumaku. Tomozou duwé sipat kang dramatis banget nalika nanggepi kaanan lan gampang kaasut omongane wong liya.
Kanca-kancane Maruko
[besut | besut sumber]| No. | Jeneng | Katrangan |
|---|---|---|
| 01. | Tamae Honami (穂波たまえ, Honami Tamae) | Sahabate Maruko. Dhèwèké bocah kang pinter lan mèlu apa kang dilakoni Maruko. Maruko ngundange kanthi jeneng Tama-chan. |
| 02. | Kazuhiko Hanawa (花 轮 和 彦 , Hanawa Kazuhiko) | Kanca sakelase Maruko kang sugih banget lan manggon sementara ing omah pengasuhe Simbah Hediji. Ibune kerep lunga menyang luwar kutha utawa luwar nagari mula dhèwèké arang banget ketemu ibune. Saben dinane, dhèwèké dijemput mobil limusin. |
| 03. | Sueo Maruo (丸 尾 末 男 , Maruo Sueo) | Maruo yaiku kanca sakelase Maruko kang dadi ketua kelas. Dhèwèké mesthi péngin disenengi kanca-kancane. Dhèwèké nganggo kacamata kandel banget amarga sregep sinau lan maca buku. Garis ireng mesthi metu ing raine saben wektu, apa manèh nalika dhèwèké katon bungah banget, mula katon medeni ing kanca-kancane. Dhèwèké wedi banget yèn ana kang ngrebut posisiné minangka ketua kelas lan kerep nyedhaki kanca sekelase kang kanton pinunjul lan ngapik-apiki supaya ora nibakake posisiné. |
| 04. | Noritaka Hamazaki (浜崎憲孝(はまじ), Hamazaki Noritaka (Hamaji)) | Hamaji yaiku murid paling nakal ing kelase Maruko, sanajan Hamaji dadi wakil ketua kelas. |
| 05. | Tarō "Butaro" Tomita (富田太郎(ブー太郎), Tomita Tarō (Butarō)) | Bocah lanang ing kelase Maruko kanthi rai piglike lan ing pungkasan mesthi ngomong "Buu," tembung anamatopoeia Jepang nalika babi ndengus. Dhèwèké kanca cedhaké Hamaji lan ing ngendi-endi mesthi karo Hamaji. |
| 06. | Hanako Migiwa (みぎわ花子, Migiwa Hanako) | Hanako kedanan Hanawa lan ora seneng ing sakupenge bocah wadon liyané amarga Hanawa naksir Maruko, dhèwèké galak karo Maruko. Hanako sinau ing kelas 3 ing limang taun pungkasan amarga bijine èlèk lan saben taun ora munggah kelas. Dhèwèké yaiku présidhèn kelas wadon lan kaya déné Maruko niyat banget mertahanake posisiné. |
| 07. | Shinji Sekiguchi (関口しんじ, Sekiguchi Shinji) | Sanajan ora tau katon, nanging Shinji bocah kang nyenengake. Dhèwèké tau ngajari Maruko numpak pit. |
| 08. | Kimio Nagasawa (永沢君男, Nagasawa Kimio) | Omahe dibakar nalika ana kacilakaan kang ndadèkaké kulawargané kere. Ing episode iki mesti ngatonake gandheng cenenge karo geni Nagasama. Mula iku, Maruko mesthi ora pedhuli karo dhèwèké, lan kabèh wong mesthi ngece dhèwèké. Kimio ora tau ngomong karo wong liya, kajaba Fujiki, sahabate. |
| 09. | Shigeru Fujiki (藤木茂, Fujiki Shigeru) | Bocah kang kalem lan kanca cedhaké Nagasawa-san. Dhèwèké manggon ing omah dhéwé amarga wong tuwané mangkat menyang kantor ésuk banget lan kondure tengah wengi. |
| 10. | Shouta Yamada (山田笑太, Yamada Shouta) | Dhèwèké ora tau mandheg guyu, emboh iku lucu apa ora. Ing kelas, dhèwèké éntuk paraban "bocah idiot" (クラスのバカ男子) |
| 11. | Kenichi Ono (大野けんいち, Ono Kenichi) | Dhèwèké kanca cedhaké Sugiyama Satoshi. Bocah loro iku seneng banget karo bal-balan. |
| 12. | Satoshi Sugiyama (杉山さとし, Sugiyama Satoshi) | Kanca cedhaké Kenichi. Bocah loro iku seneng guyonan, nanging serius nalika kerja. Bocah loro iku dadi tim kang apik amarga tulung tinulung. |
| 13. | Toshiko Tsuchihashi (土橋とし子, Tsuchihashi Toshiko) | Toshiko yaiku bocah wadon kang anutan lan sopan. Dhèwèké mesthi pedhuli karo wong liya. Toshiko uga kanca cedhaké Maruko lan Tamae. |
| 14. | Misuzu Fuyuta (冬田美鈴, Fuyuta Misuzu) | Dhèwèké naksir Kenichi Ono. Misuzu bocah kang rada aneh. Dhèwèké seneng nggambar raine wong kang aneh banjur gambarane iku diwènèhake marang wong kang digambar. |
Cathetan sikil
[besut | besut sumber]- ↑ "夢の音色" Chibi Maruko-chan, Januari 18, 1989, volume 4, halaman 135.
- ↑ Hahn, Joel."Kodansha Manga Awards"[pranala mati permanèn] Comic Book Awards Almanac. Retrieved 2009-05-25.
- ↑ ComiPress "Historic Shōjo Manga Circulation Numbers". Retrieved 2008-01-06.
- ↑ Nick India-Chibi Maruko Chan Accessed May 25, 2009
- ↑ Kanca-kancane Maruko[pranala mati permanèn] (dipununduh tanggal 30 Maret 2011)