Alexius Leonov

Alexius Archippi filius Leonov (Russice Алексей Архипович Леонов, tr. Aleksej Archipovič Leonov; in pago Listvjanka nunc regionis Kemerovensis natus die 30 Maii 1934, Moscuae mortuus die 11 Octobris 2019), cosmonauta Sovieticus, fuit primus qui actiones extravehiculares in spatio cosmico perfecit. Bis (annis 1965 et 1975) titulo Herois Unionis Sovieticae, Praemio Publico URSS (anno 1981) nonnullisque aliis lauris ornatus est. Etiam notus est ut pictor et auctor nonnullorum librorum.

Biographia

Alexius Leonov, cuius munus militare anno 1953 incepit, anno 1955 in Schola Militari Navigationis Aereae Educationis Initialis Gubernatorum Aeroplanorum Decima in urbe Kremenčug (Kremenčuk) regionis Poltavensis et anno 1957 in Schola Militari Navigationis Aereae Gubernatorum Aeroplanorum in urbe Čuguev (Čuhujiv) regionis Charcoviensis RSS Ucrainicae studia sua complevit, gubernator aeroplani militaris factus.

Anno 1960 in caterva prima cosmonautarum Sovieticorum acceptus, 18 et 19 Martii 1965 cum Paulo Beljaev volatum cosmicum in astronave Voschod-2 fecit, quo tempore e nave sua in spatium cosmicum primus e hominibus exiit. Anno 1968 studia in Academia Militari Aerea Ingeniaria in honorem Nicolai Žukovskij vocata complevit. Diebus a 15 ad 21 Iulii anni 1965 ut praefectus astronavis Sojuz-19 cum Valerio Kubasov volatum suum secundum cosmicum fecit atque volatum communem cum Apollone, astronave Civitatum Foederatarum, perfecit.