Basin de Tarim
La Basin de Tarim es un basin endoreica en Xina norde-ueste, con un area de sirca un milion km2. Locada en la rejion de Xinjiang, lo es comun nomida Xingjiang sude, con Xingjiang norde es sinonim con Dzungaria (o Beijiang). La borda norde es la cadena de Montes Tian Shan, e sua borda sude es la Montes Kunlun e la Plato Tibetan. la Deserto Takelamagan domina la plu de la basin. La nom istorial en Uigur per la Basin de Tarim es Altishahr, con la sinifia "ses sites".
La neva sur K2, la monte du de la plu grande en la mundo, flue en glasias cual move a su a la vales do los fonde. La acua fondeda formi rios cual flue su la montanias e en la Basin Tarim, nunca ateninte la mar. Ensircada par la deserto, alga rios nuri la oasises do la acua es usada per iriga, e alga otra rios flue a la pantanes e lagos salosa.
La abitores la plu temprana de la basin ia es posible la tocarianes, de ci sua lingua es la grupo la plu este de la linguas indoeuropean. Momias con cualias european ia es trovada en locas variosa en la Basin de Tarim, como Louan, la compleso de tombas a Xiaohe, e Qawrighul. Esta momias ia es suposada tocarian, e esta popla pote ia abita la area de a min 1800 aec. Los es probable relatada a la popla cual la xines ia nomi la yuezhi (月氏).
Un otra popla en la rejion estra la tocarianes ia es la sacas, un colie de tribus indoiranian ci ia parla dialetos variosa de iranian este como hotanes, scitian, e saca, cual ia abita la stepes de ucraina a xina.
Sirca 200 aec, la yuezhi ia es invadeda par la xiongnu. La xiongnu ia es un federa de tribus de la area de Mongol. Sua etnico no es conoseda, ma lo ia es probable un misca, con mongoles o turcicas como xefes. La xiongnu ia atenta invade Xina ueste, ma ia fali ultima e ia perde controla de la rejion a la xines. La xines de la dinastia Han prende controla de la Basin de Tarim de la xiongnu a la fini de la sentenio prima.
Pos un defeta major par la xiongnu, en la sentenio 2 aec, la yuezhi fende en du grupos: la yuezhi major e la yuezhi minor. Los ia introdui la alfabeta brami, la lingua pracrit per governa, e budisme, e ia prende un rol sentral en la transmete par la Via Seda de budisme a Asia este.
La cuxanes, un federa de grupos potiosa iranian e tocarian ci ia concista la rena indoelinica de Bactria, ia estende a retro a la basin en la sentenios 1 e 2 ec, do los fundi un rena en Kashgar e competeda per controla de la area con nomadas e la xines.
En la dinastia Tang de Xina (618-907 ec), la rejion ia deveni su la controla de la xines denova. Protejeda par la Deserto Takelamagan e la montes encluinte de la nomadas de la stepes, elementos de la cultur tocarian ia survive asta la sentenio 7 ec. A la comensa de la sentenio 9, migrantes turcica ia ariva de la Hania Uigur de Mongol. Los ia asorbe la tocarianes per formi la etnico cual es oji la uigures.
De sentenio 8 tarda a la sentenio 9, controla de la rejion ia vasila entre la Impero Xines de la Tang e sua competores la Impero Tibetan. Per la sentenio 11 temprana, la rejion ia deveni su la domina de la popla turcica e muslim de la Hania Cara-Canid, cual ia resulta en la converti de la popla a islam, e la adota de cultur turcica. La uigures budiste ia aseta converti su la menasa de la spada.
En la sentenio 18, la teritorio ia cade su la rena de la dinastia Qing de Xina, cual ia deveni la Republica de Xina de oji. La majoria de abitores es uigur, e lo pare ce la plu de uigures no es felis con la governa xines. La governa de Xina es aora usante metodos sever per "reeduca" la popla. Multe otra nasiones ia condena esta atas como sin compatia, e demanda ce la governa xines para sua trata de la uigures.