Etnico

Ante sirca 1970, la popla corouai de Papua ia es un popla noncontatada par membros de sosias moderne; sola sirca 3000 persones es membros de sua etnico

Un etnico es un categoria de persones ci identifia con lunlotra, fundida sur similarias como antesedentes comun, lingua, dialeto, istoria, relijio, mitos, rituos, nasion, cultur, cosina, arte, vestes, raza, aspeta fisical,etc. La parola es derivada de la parola elinca ἔθνος. Etnico es comun usada como sinonomin con nasion o popla, ma lo ave alga sinifias unica.

Etnicia es un cualia eritada. Per esemplo, grupos derivada de la mesma popla istorial comun continua parla linguas relatada e comparti un jenetica. Lo es posible ce un person o grupo departi de un etnico e deveni parte de un otra par cambia lingua, adota un otra cultur, o cambia relijio. Sola etnicos cual astentua omojenia o puria razal como criterios esensal no aseta tipal membros nova.

La etnicos la plu grande en la eda moderne es composada de miliones de persones (la han de Xina es la plu grande), e la etnicos la plu peti es limitada a des o dudes individuas (multe poplas nativa). Etnicos grande pote es sudivideda entre plu peti sugrupos como tribus o clanes, cual tra tempo pote deveni etnicos separada par endogamia o isola fisical de la grupo orijinal. A la otra lado, etnicos cual ia es orijinal separada pote fusa en un etnico. Tra divide o fusa, la forma de un identia etnical separada es nomida etnojenese.

Herodoto ia dona un descrive famosa de cual cosas defina la etnico "elinica" en sua eda:

• desende compartida (ὅμαιμον - homaimon, "de la mesma sangue")
• lingua compartida (ὁμόγλωσσον - homoglōsson)
• locas santa e rituas de sacrifia compartida (θεῶν ἱδρύματά τε κοινὰ καὶ θυσίαι)
• costumes compartida (ἤθεα ὁμότροπα - ēthea homotropa)

Teoristes moderne usa criterios simil:

• etnolinguistica - lingua, dialeto, alfabeta compartida, per esemplo canadianes franses
• etnonasional - identia nasional o governa compartida
• etnorazal - aspeta fisical fundida sur orijines jenetical, per esemplo americanes african
• etnorejional - un senti de parteni a un loca distinguida, resultante de isoli relativa jeografial, per esemplo la popla de un isola spesifada
• etnorelijial - asosia compartida con un relijio, ramo, o seta, per esemplo iudis

Natural, en multe casos plu ca un de esta criterios es usada par un etnico spesifada.

La sosiolojiste Max Weber ia sujeste ce etnicos es künstlich (artifis, un "contrata sosial") car los ia es fundida sur un crede sujetal en un Gemeinschaft (comunia) compartida. Ance, esta crede en un Gemeinschaft compartida no ia crea la grupo; la grupo ia crea la crede. Plu, la forma de la grupo ia resulta de un motiva per monopoli potia e prestijia. Esta ia es oposante a la teorias naturaliste de la tempo, cual ia crede ce la diferes sosial, cultural, e condual entre poplas orijina de cualias e tendes eritada, derivada de desende comun, alora nomida "raza".

Modos diferente per comprende etnicia ia es usada par siensistes sosial diferente cuando atentante comprende la natur de enticia como un fator en vive e sosia umana. Jonathan M. Hall ia oserva ce la Gera Mundal du ia es un punto de cambia en la studia de etnicos. La efetos de la razisme de la nazis ia descoraji interpretes esentialiste (pd jenetical) de etnicos e razas. Etnicos ia deveni definada, seguente Weber, como cosas sosial e no biolojial. Sua coere ia es atribuida a mitos, desende, familia, orijin, lingua, relijio, costumes, e nasion compartida. Donce, etnicos es aora videda como mutable en loca de stable, construida en interata e no scriveda en la jenes.