Fosena

Fosenas es un grupo de mamales adatada a la mares, simil como delfines, tota de cual ia es clasida su la familia Phocoenidae, parvorder Odonoceti. Ma los es plu relatada a narvales e belugas ca delfines vera. Lo es 7 spesies esistente, tota entre la plu peti de la Odonoceti. Fosenas es distinguida de delfines par sua dentes plata e formida como palas, diferente de la dentes cono de delfines, e la manca de un beco clar (an si alga delfines manca ance la beco clar).

Fosenas estende en longia e pesa de la fosena de California con 1.4 m e 54 kg, a la fosena de Dall con 2.3 m e 220 kg. Alga spesies ave dimorfia sesal, con femas plu grande ca mases. Los ave corpos idrodinamical e du membros cual ia evolui a pinas. Fosenas usa ecoloca como sua sistem xef de sensas. Alga spesies es bon adatada per tufa a profundas grande. Como tota setaseos, los ave un strato de gras su la pel per manteni caldia en acua fria.

Fosenas es abundante e trovada en multe ambientes, incluinte rios (fosenas sin pinas) acuas costal e plano continental (fosena comun, de California), e mares alta (fosena de Dall, fosenas con oculos), covrente tota temperatures de acua de tropical (Golfo California - de California) a polal (Gronland - fosenas comun) Fosenas come xef pexes e calamares. Enfantes es tipal parida en la primavera e la estate, e depende de la madre asta la primavera seguente. Jeneral, femas pari un enfante cada anio. Fosenas produi clicas ultrasonal, cual es usada per naviga (ecoloca) e comunica sosial. No como delfines, fosenas no forma grupos sosial grande.

Fosenas ia es e es ancora xasada par alga paises. Plu menasas inclui catura suprafluente en redes,l compete per comedas de pexerias, e contamina maral, spesial de metales pesosa e cloridos organica. La fosena de California ia deveni cuasi estinguida en la sentenio 20. Alga spesies de fosenas ia es mantenida nonlibre e enseniada per rexerca, educa, e presentas.

Familia Phocoenidae – Foseno
- Jenero Neophocaena
  - Neophocaena phocaeniodes – fosena sin pina dorsal (asia sude)
  - Neophocaena asiaeorientalis – fosena sin pina dorsal (asia este)
- Jenero Phocoena
  - Phocoena phocoena – fosena comun
  - Phocoena sinus – fosena de California
  - Phocoena dioptrica – fosena con oculos
  - Phocoena spinipinnis – fosena spinosa
- Jenero Phocoenoides
  - Phocoenoides dalli – fosensa de Dall

Fosenos estinguida
- Jenero † Numataphocoena
  - Numataphocoena yamashitai
- Jenero † Septemriocetus
- Jenero † Piscolithax
  - Piscolithax aenigmaticus
  - Piscolithax longirostris
  - Piscolithax boreios
  - Piscolithax tedfordi
- Jenero † Haborophocoena
  - Harborophocoena toyoshimai