Impero Brites
La Impero Brites ia es composada de la dominas, colonias, protejeda, autoria, e otra teritorios renada o dirijeda par la Rena Unida e sua statos presedente. Lo ia orijina con la poseses ultra mar e locas de comersia instituida par England entre la sentenio 16 tarde e la sentenio 18 temprana. A sua culmina, lo ia es la impero la plu grande en istoria e, per plu ca un sentenio, lo ia es la potia global xef. Per 1913, la Impero Brites ia governa plu ca 412 milion persones, 23% de la popla mundal a la tempo, e per 1920, lo ia covre 35.5 milion km2, 24% de la area intera de tera. Como un resulta, sua lega political, legal, linguistica, e cultural es multe vasta. A la culmina de sua potia, la espresa "la impero supra cual la sol reposa nunca" ia es usada per descrive la Impero Brites, car sua estende sirca la globo ia sinifia ce la sol ia es sempre brilia supra a min un de sua teritorios.
En la eda de descovre en la sentenios 15 e 16, Portugal e Espania ia comensa la esplora european de la globo, e en la prosede ia institui imperos grande ultra mar. Desirosa de la ricia grande ce esta imperos ia jenera, England, Frans, e Nederland ia comensa institui colonias e redes de comersa de sua propre en la Americas e Asia. Un serie de geras en la sentenios 17 e 18 con Nederland e Frans resulta en England e, seguente la uni entre England e Scotland en 1707, Britan Grande, la potia colonial dominante en America Norde. Lo ia deveni alora la potia dominante en la sucontinente indian pos la concista par la Compania de India Este de Bengal Mugal a la Batalia de Plassey en 1757.
La autonomia de la Des-tre Colonias en America Norde en 1783 pos la Gera de Autonomia American ia causa ce Britan ia perde alga de sua colonias la plu vea e la plu poplida. La atende de Britan ia turna pronto a Asia, Africa, e la Pasifica. Pos la defeta de Frans en la Gera de Revolui Franses e la Geras de Napoleon (1792–1815), Britan ia emerji a la potia xef marinal e imperial de la sentenio 19. Sin compete a mar, la domina brites ia es plu tarda descriveda como la Pax Britannica ("pas brites"), un periodo de pas relativa en Europa e la mundo (1815–1914) en cuando la Impero Brites ia deveni la ejemonia global e ia adota la rol de polisia global.
En la sentenio 19 temprana, la Revolui Industrial ia comensa transforma Britan; donce, per la tempo de la Esibi Grande en 1851, la pais ia es descriveda como la "laboreria de la mundo". La controla de la Impero Brites estende per inclui la plu parte de India, partes grande de Africa, e multe otra teritorios tra la mundo. En ajunta a la controla formal cual Britan ia ave sur sua propre colonias, sua domina de multe de la comersia de la mundo ia sinifia ce lo ia controla vera la economias de multe rejiones, como Asia e America Latina.
En la sentenio 19, la cuantia de popla de Britan ia crese a un rapida dramosa, acompaniada par urbani rapida, cual ia causa stresa sosial e economial sinifiante. Per xerca mercatos e fontes de materias cru nova, la governa brites su Benjamin Disraeli ia inisia un periodo de estende imperial en Egipte, Africa Sude, etc. Canada, Australia, e Zeland Nova ia deveni dominas autogovernante.
Per la comensa de la sentenio 20, Deutxland e la SUA ia comensa defia la vantaje economial de Britan. Seguente tensa militar e economial entre Britan e Deutxland ia es causas major de la Gera Mundal 1, en cual Britan ia depende multe de sua impero. La gera ia pone multe constrinjes sur la militar e la recursos umana de Britan. An si la Impero Brites ia ateni sua estende teritorial la plu grande pronto pos la gera, Britan ia es no plu la potia industrial o militar suprapasante en la mundo.
En la Gera Mundal 2, La colonias brites en Asia este e sude-este ia es ocupada par Japan. An si Britan e sua alias ia vinse a la fini, la dana a la prestijia brites ia aida aselera la declina de la impero. India, la posese de Britan la plu valuada e poplosa, ia ateni autonomia como un parte de un move plu grande de descoloni en cual Britan ia dona autonomia a la plu de teritorios de la impero. La Crise de Suaiz ia confirma la declina de la potia de Britan como un potia global. La transfere de Hongkong a Xina en 1997 ia marca per multe la fini de la impero. 14 teritorios ultra mar resta su la domina brites. Pos autonomia, multe colonias pasada ia junta la Comunia de Nasiones, un asosia libre de statos. La Rena Unida es aora un de 16 nasiones de la Comunia cual comparti un monarca, corente rea Elizabeth 2.