Leteratur per enfantes

Leteratur per enfantes inclui naras, libros, jornales, e poesias cual es intendeda per enfantes. On pote clasi leteratur per enfantes en du modos: par jenero e par la eda intendeda de la lejor.

Leteratur per enfantes pote es trasada a naras e cantas, parte de un tradision parlada cual adultes ia comparti con enfantes ante cuando publici esiste. La developa de leteratur per enfantes temprana, ante la inventa de primi, es difisil per trasa. An pos cuando primi ia deveni sperdeda vasta, multe naras clasica ia es orijinal creada per adultes e, plu tarde, revisada per un escutores plu joven. De la sentenio 15, multe leteratur ia es spesial dirijeda a enfantes, comun con un mesaje moral o relijiosa. Leteratur per enfantes ia es formida par fontes relijiosa, como la tradisiones puritan, o par vistas plu filosofial o siensal, seguente la influes de Charles Darwin e John Locke. La sentenios 19 tarde e 20 temprana es conoseda como la "Eda Oro de Leteratur per Enfantes", car multe libros clasica per enfantes ia es publicida alora.

La lista de autores de leteratur per enfantes es multe longa. Estas es entre la plu famosa:

• Jan Amos Komensky (1592–1670): autor txesce de Orbis Pictus, la libro pitural prima spesial per enfantes.

• Charles Perrault (1628–1703): un autor franses ci ia funda la narada de fes. Se naradas inclui Capeta Roja, La bela dorminte , Gateta con botas, e Senerela.

• La frates Grimm (Jacob Grimm, 1785–1863, e Wilhelm Grimm, 1786–1859): academistes deutx, la plu bon reputada per colies de naretas folcloral e fables. Los ia renara tal naradas como Blancaneva, Rapunzel, e Hansel e Gretel.

• Hans Christian Andersen (1805–1875): un autor e poesior dansce, la plu bon conoseda per se naras de fes, tal como La rea de la neva, La fe peti de mar, La vestes nova de la imperor, e La pateta fea.

• Carlo Collodi (1826–1890): la autor italian de Pinocchio, a comensa publicida en forma serial en La jornal de enfantes (italian: Il Giornale dei Bambini), ce ia es la jornal prima per enfantes.

• Johanna Spyri (1827–1901): un autor suiz de enfantes, la plu bon conoseda per Heidi.

• Lewis Carroll (1832–1898), la nom real de ci es Charles Lutwidge Dodgson: prete engles e autor de leteratur per enfantes, mundal famosa per Alisia en la pais de mervelias , e Tra la miror.

• Oscar Wilde (1854–1900): un autor eres, la operas per enfantes de ci inclui La prinse felis e Otra naradas (1888).

• L. Frank Baum (1856–1919): un autor american famosa per La sorsor merveliosa de Oz e se seguentes.

• Laura Ingalls Wilder (1867-1957): un autor american, ci ia scrive la serie La casa peti de libros enfantal fundada sur se enfantia en un familia abrivia a ueste. El ia scrive la parte prima de Casa peti en la foresta grande a eda 65 anios. La Medalia de Laura Ingalls Wilder, es la premio de la Asosia American Bibliotecal ce es nomada pos el, e de cual el ia es la resetante prima de premio, en 1954.

• Arthur Ransome (1884–1967): un autor brites de ci la serie de libros enfantal Rondin e amazones nara la aventures en la Lake District, la Norfolk Broads e a mar navigante,pexante e campinte. Alora ia segue Swallowdale, Pato Peter ,Vacanse invernal,Coot Club, Posto de pijon , Nos no ia intende vade a mar, Acuas secreta,La Ses grandes.

• Hugh Lofting (1886–1947): un autor brites, instruida como injenior sivil, ci ia crea Dotor Dolittle.

• Dodie Smith (1896–1990): un autor brites e la creor de La sento dalmatianes e un plu.

• Enid Blyton (1897–1968): un autor brites de tal libros La sinco famosas e La arbor majiosa distante. On onora el como la autor la plu bon vendeda en la istorio de leteratur enfantal. Se libros ia es traduida a 90 linguas diferente e ia vende plu ce 400 milion copias.

• C. S. Lewis (1898–1963): 95 million copias de se serie de La naras de Narnia ia es publicida tra mundo de pos la comensa en 1950 de La leon, la sorsoresa e la gardaroba .

• Jean de Brunhoff (1899–1937) e Cecile de Brunhoff (1903–2003): Jean de Brunhoff ia es un scrivor e desinior franses reputada per La elefante Babar ce ia apare prima en 1931. La naradas ia es recontada orijinal a se fio par sua sposa Cecile. Jean ia mori de tuberculose a la eda de 37, ma Cecile ia vive asta 99 anios.

• Erich Kostner (1899–1974): un autor e satiriste deutx. Se libros per enfantes inclui Emil e la detetores, La sala de clase volante e La dia 35 de maio o La monta de Conrad a la mares sude.

• E. B. White (1899–1985): un autor american la naras enfantal de ci, La rede de Charlotte, Stuart peti, e la La trompeta de la sinie ia es considerada algas de la plu influos de sentenio 20.

• Antoine de Saint Exupéry (1900–1944): un scrivor e volor franses de ci libros inclui La prinse peti. El ia desapare durante la Gera Mundal Du, durante un vola supra la fronteras deutx.

• Dr. Seuss(1904–1991): es un autor american ci ia revolui la libros per lejores joven, comensante con La gato en la xapo, un narada rimada sin sensa . Seuss ance ia scrive Ovos verde e carne de porco, Como la Grinch ia fura la natal e Un pex, du pexes, pex roja, pex blu.

• Robert L. May (1905–1976): es un autor american de Rudolph la reno con la nas roja.

• Hergé(1907–1983): ia es Georges Prosper Remi, un autor e desinior beljes de naras enfantes, ci ia crea la serie de banda cartonal La aventures de Tintin. La titulos la plu famosa ia es La spada de re Ottokar, La secreta de la barcon Unicorno, prisonidas de la dio Sol, Viaja a la luna.

• Astrid Lindgren (1907–2002): es un autor svensce de libros enfantal, la multe titulos de ci inclui la libros de Pippi Longstocking, ce ia es traduida a 85 linguas e ia es publicida en 100 paises.

• Leo Lionni (1910–1999): es un autor e desinior de libros per enfantes la libros de ci inclui Pex es pex, Nicolas,' ' Do ia es tu ja ?, La arbor de alfabeta, Un color de se mesma e La sonia de Matthew. Lionni ia reseta la Medalia de Oro de Funda American de Artes Grafica e ia es la ganior onorada de Premio de Caldecott per la ves cuatro per se naras Diton per diton, Frederick (nara), Swimmy, e Alexander e la mus mecanical.

• Roald Dahl (1916–1990): un autor brites de La BFG, Matilda (nara), Charlie e la fabriceria de xocolada e Senior volpe merveliosa. Se libros ia gania premios e ia vende 90 milion copias , incluinte 1 milion libros vendeda anial en la Rena Unida.

• Beverly Cleary (nase en 1916): un autor american ce ia ave plu ce 30 libros publicida en 14 linguas. Se carateres la plu famosa inclui Henry Huggins, Ribsy, Beezus e Ramona Quimby, Ramona la corajosa e Ralph S. Mus.

• Shel Silverstein (1930–1999): un autor american , de ci operas inclui colies de poesietas per enfantes como Cade a supra, Un lus en la suteto, e Do la paseria fini.

• Lois Lowry (nase en 1937): un autor american ci ia gania multe onoras leteratural e ia reseta a du veses la Premio Newbery en 1990 per Numeri la stelas, e en 1994 per La donor.

• Judy Blume (nase en 1938): un autor american de Es tu ala, o Dio? Lo es me, Margaret e la serie de Superfudge.

• Jane Yolen (nase en 1939): un autor fema american respetada e bonconoseda e ci es un de la autores la plu produinte per enfantes a presente. Se libros es traduida frecuente e ia gania multe premios.

• Sharon Creech (nase en 1945): un ganior de premios e autor fema american de Pasea en du lunas e La vagor.

• Jacqueline Wilson (nase en 1945): la autor de la serie bonamada Tracy Baker es un de la autores famosa de brites. Se libros ia gania multe premios prestijiosa e a asta 20 milion copias ia es vendeda.

• Charles Ghigna (Padre Ganso) (nase en 1946): un autor e poesior american de enfantes de plu ce 5000 poesias e 40 libros ganiante de premio. Se poesios apare en sentos de jornales per enfantes e adultes estendente de Luminadas per enfantes Criceta (jornal) a Harper's e la New Yorker.

• Philip Pullman (nase en 1946): un autor brites bonreputada per se trilojia fantasial Sua materias oscur e la serie Sally Lockhart.

• Laura Numeroff (nase en 1953): es vaste conoseda per se serie Si tu dona un... incluinte Si tu dona un biscoto a un mus, Si tu dona un mufin a un alce, e Si tu dona un torteta a un porco.

• Christopher Paul Curtis (nase en 1954): un autor african-american. Per sua libros el ia gania la Premio Newbery e la Medalia de Coretta Scott King. Se titulos poplal inclui Bud, Not Buddy e La familia Watson vade a Birmingham (1963).

• Rene Villanueva (nase en 1954): autor filipino e ganior de un premio, ci ia scrive libros e teatrales per enfantes. El es la nominada sola de Pilipinas per la Premio Hans Christian Andersen.

• Kate DiCamillo (nase en 1964): ganior de Onora Newbery per se Winn Dixie e de Medalia Newbery per se La nara de Despereaux

• J. K. Rowling (nase en 1965): un autor fema brites ci es la autor de libros per enfantes la plu bon reputada e la plu susedente a presente. Como la autor de la serie la plu susedosa Harry Potter, se libros ia es vendeda en plu ce 300 milion copias tra la mundo e es traduida en plu ce 63 linguas. El es la autor bilionor prima (en dolares de SUA ).

• Eoin Colfer (nase en 1965): un autor eres mundal famosa per la serie Artemis Fowl e es considerada la plu bon vendeda par la jornal la New York Times. Ance amada per se La lista de desiradas, La supernaturaliste , e la serie Lejende de ... .

• Lemony Snicket (nase en 1970): la autor american de la serie poplal libros per enfantes, Un serie de avenis nonfortunosa.