Ortodoxisme
En la usa clasica cristian, la parola "ortodox" refere a un colie de dotrinas cual ia es crededa par la cristianes temprana. Un serie de consilios ecumeniste (pd nonramal) ia es conduida tra un periodo de alga sentenios per atenta formali esta dotrinas. La deside la plu sinifiante de esta consilios ia es lo entre la dotrina homousian de Atansio e Eustatio (cual deveni trinisme) e heterousian de Ario e Eusebio (nomida arianisme). La dotrina de la trinia, cual ia defini Jesus como e Dio e om en la canones de la consilio de Efeso de 431 ec, ia susede en la eglesia e ia es refereda como ortodoxia en la plu de contestos cristian. Natural, la minoria de cristianes, la nontriniste, oposa esta termas.
Seguente la Fende Grande de 1054, la eglesas ueste e este ia continua vide se como unica ortodox e catolica. Augustino ia scrive en "Sur la relijio vera": "Relijio pote es trovada sola entre los ci es nomida cristianes catolica o ortodox, per dise, gardas de veria e seguores de coreta." Tra tempo, la eglesa ueste ia comensa identifia con la eticeta "catolica", e la eglesa este con la eticeta "ortodox", an si esta eticetas no es sempre aplicable. Plu temprana, ortodoxisme de la este ia fende de cristianisme calsedonian pos la consilio de Calsedon (452 ec), la resulta de alga diferes en cristolojia, e la eglesas ortodox ia reteni la eticeta.
La eglesa ortodox la plu grande es la Eglesa Ortodox Este (ofisial: la Eglesa Catolica Ortodox), con sirca 200 a 260 milion membros. Lo opera como un comunia de eglesas autosefalo, pd, cada governada par sua bispos en sinodos local, an si sirca dui de los abita en Rusia. La eglesa no ave un autoria sentral de dotrina o governa simil a la bispo de roma]] (la Pape), ma la Patriarcia Ecumeniste de Constantinopoli es reconoseda par tota como primus inter pares (prima entre egales) de la bispos. Como un de la instituis relijiosa la plu vea en la mundo, la Eglesa Ortodox Este ia ave un rol importante en la istoria e cultur de Europa este e sude-este, la Caucasos, e Asia sude-ueste.