SETI

La xerca per intelijentia estrateran (engles: Search for Extraterrestrial Inteligence = SETI) es un projeta comensada en la desenio 1960. Sua ativia xef es la scane de la sielo con radiotelescopios per trova un sinial estrateran. Asta aora los no es susedente.

Vista jeneral

Un visita de astronautas a un planeta estra la sistem de nosa sol es presente nonposible con la medios de nosa tecnolojia. Ma nos pote construi un sistem de comunica con enviadores e resetadores per trova siniales de orijina estrateran. Ma SETI no es un projeta fasil. Nosa galasia, la Via Letin, ave un diametre de sirca 100 mil anios de lus e conteni sirca 300 mil milion stelas. La xerca de la tota sielo per siniales debil e distante es un taxe nonfasil cual nesesa un estende grande.

Sur la cuantia probable de la sivilias estrateran, vide la formula de Drake.

Restrinjes de la campo de xerca

On ave alga restrinjes usable per fasili la xerca. Nos suposa la seguentes:

La vive esiste sur un funda de carbono.
La vive nesesa acua.

Un otra restrinje importante xef per la xerca con radiotelescopes es:

la restrinje per stelas simil a nosa sol.

Stelas vera grande ave un periodo de esiste tro corta per la developa de vive. Stelas vera peti ave enerjia tro peti e nesesa un orbita planetal vera prosima de la stela. Sirca 10% de la stelas de nosa galasia es simil a nosa sol. Sirca 1000 tal stelas esiste con distantia asta 100 anios de lus de nosa sol. Esta stelas es la ojetos prima de nos xerca. Donce nos no sabe esce esta restrinjes es vera usable.

Cualias de un sinial suposada

Un sinial de radio per envia interstelal debe es plu forte ca la radia de la stela, car lo usa probable un largia de banda vera streta. Per trova tal siniales, la siensistes debe xerca la sielo intera per un cuantia grande de frecuentias. Los ance no sabe cual cualia tal siniales pote ave. Un segue complicada de pulsa ta es un proba de un orijina artifisial.

Un otra demanda es esce on pote desifra un tal sinial. Per redui la fortia de la enviador la estrateranes usa probable un sinial vera consentrada. Trova un tal sinial es nonposible si nos no es en la dirije coreta. A esta caso nos debe espera ce los sabe nosa esiste e dirije la sinial direta a nos.

Istoria de SETI

En 1960, Frank Drake ia fa la esperimenta prima en la rexerca de SETI moderna. El ia usa un radiotelescopio en la oserveria de Green Bank per esamina la stelas Tau Ceti e Epsilon Eridani prosima a la frecuentia de 1,42 gigaherzes.
1961: La confere prima de SETI en Green Bank.
1974: On ia envia un mesaje de radio de 1679 bitios a la monton de stelas M13 (con distantai de sirca 25 mil anios de lus) de la oserveria de Arecibo. La numero 1679 es la produida de la numeros primal 23 e 73. En esta modo, la resetores pote comprende la mesaje como un imaje con esta dimensiones. La imaje mostra scemas de la telescopio, de umanas, de la DNA de umanas e elementos cimical importante.
1979: La universia de Berkeley ia comensa un projeta de xerca con un analisador per 100 frecuentias a la mesma tempo.
1982: La universia de Havard ia comensa usa un un analisador per 131 mil frecuentias.
1985: La projeta META (Megachannel Extra-Terrestrial Array) ia usa un analisador per 8 milion frecuentias.
1992: NASA ia comensa finansi la projeta SETI. Ma ja pos un anio la projeta ia fini par causa un deside de la congresa de la SUA. La projeta ia es continuada par la projeta Phoenix cual ia es privata finansiada.
1999: On ia comensa la projeta SETI@home. Esta projeta usa la capasia de vera multe computadores en la interede.
2005: La universia de Berkeley ia comensa construi un campo de 350 radiotelescopios, cual los vole usa ance per la xerca per intelijentia estrateran usante la frecuentias entre 0,5 e 11,2 gigaherzes.

SETI vidal

De alga anios, on xerca ance sinias vidal. On suposa ce sivilias estrateran pote usa radia vera forte de laser per comunica interestelal. Studias ia mostra ce un laser de nosa tecnolojia con un miror con diametre de 10 metres pote envia un sinial con fortia 1000-uple plu ca nosa sol.