Anne Frank
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Annelies Marie (Anne) Frank (12 junie 1929 - mieërt 1945) waas e joeads maedje det is gebaoren in Frankfurt in Duutsjlandj. Nao zienen doead haet 't internasjenaal bekandjheid verworve mit 't oetbringe van zie daagbook, worin 't zien ervaringe tiejes de Duutsje bezètting van Nederlandj inne Twieëdje Werreldkrieg haet opgeteikendj.
Anne Frank verhoesdje in 1933 same mit zien femielje nao Amsterdam, naodet 't gezag vanne nazi's in Duutsjlandj waas versterk wore. Mitte Duutsje bezètting van Nederlandj, die begós in 1940, zoot de femielje vas: doordet de vervölging vanne joeadse bevölking toenoom, góng de femielje in julie 1942 óngerduken in 'n achterkamer van 't kentoeargeboew vanne vader, Otto Frank. Nao twieë jaor is de femielje, same mit anger luuj die dao ouch óngergedaoke zote, verraojen en verveurdj gewaore nao e kóncentraasjekamp. Anne Frank laefdje nag veur zeve maondj lang naodet 't woort opgepak en stórf toe aan tyfus in Bergen-Belsen; slechs e paar daag naodet zien zöster, Margot Frank, waas gestorve. Ziene vader, d'n ènsigste van die groep dae 't haet euverlaef, koom nao de krieg trögk nao Amsterdam, wo d'r haet óntdèk det 't daagbook van Anne Frank waas bewaardj gebleve. In 1947 woort det daagbook oetèntelik oetgebrach es Het Achterhuis.
't Daagbook, det Anne Frank op zienen dertieëndje verjäördaag kreeg, besjrief ziene laevesloup van 12 juni 1942 toet 1 augustus 1944. 't Is nao hieël väöl spraoken euvere ganse werreld euvergezatj woren en is ei vanne meis-gelaeze beuk, worop versjillendje toneelstökker en filme zeen gebaseerdj gewaore. Anne Frank is ei vanne bekandjste slachoffers vanne Holocaus.