Sjteil

Dit artikel is gesjreve (of begós) in 't Tegels. Laes hie wie v'r mit de versjillende saorte Limburgs ómgaon.

---

Sjteil (Nederlands: Steyl) is ein dörp in de Nederlands-Limburgse gemeinte Venlo, ten weste van Tegele aan de Maas, met good 3.000 inwoeners.

Sjteil is verdeild in Aad Sjteil en Niej Sjteil.

Sjteil waar oorsjprónkelik ein gehuch (rectoraot, gen zelfstjendige parochie) bi-j Tegele. De bleuj begós wie 't ingerich woort as vluchplaats veur tegestjenders van 't rezjiem van Otto von Bismarck in Pruses. In 1875 stichde pater Arnold Janssen ein seminarie in Sjteil, wat ónger zien leiding toet ein ech kloësterdörp zoe oetgreuje: hae stichde dreej kóngregaties (die alledreej nag bestjaon) en nao zienen doëd volgde nag ein veerde (nów opgehaeve). De missiepaters van Sjteil woorte alöm bekind en in 't dörp vingk me 't Missiemuseum, met vuël veurwerpe oet oetheimse kulture die de missionarisse metgebrach hadde. In 1933 woort Sjteil 'n zelfstjendige parochie. Wies 2001 huërde Sjteil bi-j de gemeinte Tegele.

Veur ein dörp van dezen ömvangk kwaam de vastelaovendsviering in Sjteil vruug op geng: in 1883 begós 't Kaetelgerich: ein volksgerich woëbi-j luu oet 't dörp die zich misdrage hebbe te kieke gezatte waere.