Taam peerd

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Friesen hings

't Peerd (Equus caballus) is e evehoveg zoogdier oet de femilie Equidae. 't Bies is naoventrint eine meter viefteg tot twie meter vaan sjofhuugde (peerdsjes oonder 145 cm neump me ponnies). De bieste koume neet mie in oersprunkeleke wèl populaties veur; alle peerd zien of gedomesticeerd of weer verwèlderd. 't Przewalskipeerd, wat tot veur kort nog wel in 't wèld veurkaom, is 'n apaarte soort. Mennekespeerd heite hingste, vruiwkes mere, klein veules en castrate roene.

Peerd zien vaanaof de prehistorie door lui ingezat, veur versjèllende doele: es ploogdier, es rijdier, es trèkdier veur kare en in de oorlogveuring. In de twintegste iew heet 't peerd aon belaank verlore, en allewijl is 't veural sport-, expositie- en vrijetiedsdier. Ouch weurt 't nog wel door pelitie en ordedeenste ingezat.