Barbara Strozzi
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
| Barbara Strozzi | |||
| |||
| Gebore | 6 augustus 1619 (duip) | ||
| Gesjtorve | 11 november 1677 | ||
| Landj | Rippubliek Venetië | ||
| Sjtielperiood | vreugbarok | ||
| Belankrieke genres | madrigaol, cantaat | ||
| Invlood van | Claudio Monteverdi, Francesco Cavalli | ||
| Invlood op | |||
| Lies van componiste | |||
Barbara Strozzi (ouch bekind es Barbara Valle) waor 'n Italiaanse zengeres en componiste vaan wereldleke vocaole meziek, die ze zelf zong en publiceerde. Häör madrigaole en cantate in vreugbarokke stijl waore bij häör leve väölgevraog. Ze waor same mèt Giacomo Carissimi de belaankriekste componis vaan häören tied in dees genres, en huurt tot de wienege vrouweleke componiste veur 1900 die de canon vaan de meziekhistorie höbbe gehaold.
Leve
[bewirk | brón bewèrke]Strozzi häöre geboortedaag is oonbekind; ze woort op 6 augustus 1619 geduip in de Sint-Sophiakèrk in Venetië. Woersjijnelek waor ze de oonwèttege dochter vaan diechter en librèttis Giulio Strozzi en dee zien hoeshèlderse Isabella Garzoni; Giulio adopteerde Barbara es zien dochter. Häöre pa erkós 't muzikaol talent vaan Barbara en riechde zelfs 'n academie op boe ze in kós zinge. Ouch häör sjöppend talent veel op, en Giulio leet häör studere bij stadsgenoet Francesco Cavalli.
Vaan de res vaan häör leve is neet väöl bekind. Ze kreeg veer oonwèttege kinder, die mesjiens deils of gans vaan d'n operamecenas Giovanni Paolo Vidman (Widmann) waore. Ze waor mesjiens ouch courtisaan, al kin dat evegood laster vaan häör manneleke vakgenoete zien. Nao d'n doed vaan Vidman, dee in zien testamint niks aon Strozzi of häör kinder had euvergelaote, oonderheel ze ziech mèt de publicatie en oetveuring vaan häör composities en vaan diverse investeringe.
Strozzi storf op 58-jaorege leeftied in Padua. Me nump aon tot ze in of um de Heremietekèrk begrave is. Wie ze gei testamint bleek te höbbe, eisde häöre zoon de èrfenis op.
Werk en stijl
[bewirk | brón bewèrke]Strozzi häör euvergelieverd werk besteit gans oet vocaole meziek in de monodische stijl (seconda prattica) dee in de vreuge barok in de mode waor: Meziek mèt allein 'ne bas en ein melodiestum (in dit geval 'n zaankstum). Wel ligk 't veur de hand tot hei en dao instrumentaol tössespeule woorte geïmproviseerd; mesjiens deeg Strozzi dit bij häör konzèrs zelf mèt de luit. De werke aoseme de geis vaan häöre liermeister Cavalli, meh zien melodischer en vocaol väöleisender. Neet al häör werke sjijne veur eige gebruuk te zien gewees: e kwart vaan häör composities vreug 'n aander stumtyp es sopraon.
Alle bekinde meziek vaan Strozzi is wereldlek, op eine bundel mèt geisteleke lejer nao. De tekste veur häöre meziek kaome in 't begin vaan häöre pa, later vaan diverse aander diechters en mesjiens ouch vaan häörzelf.
- Gepubliceerde meziek
- Il primo libro di madrigali, per 2–5 voci e basso continuo, op. 1 (1644)
- Cantate, ariette e duetti, per 2 voci e basso continuo, op. 2 (1651)
- Cantate e ariette, per 1–3 voci e basso continuo, op. 3 (1654)
- Sacri musicali affetti, libro I, op. 5 (1655)
- Quis dabit mihi, mottetto per 3 voci (1656)
- Ariette a voce sola, op. 6 (1657)
- Diporti di Euterpe ovvero Cantate e ariette a voce sola, op. 7 (1659)
- Arie a voce sola, op. 8 (1664)
Bronne
[bewirk | brón bewèrke]Dit artikel is gooddeils vertaold oet 't corresponderend Ingelstaoleg artikel.