Cent
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
'ne Cent (diminutief: centsje of centeke; aofgekort: c of ¢) is 't hoonderste deil van ein munteinheid, zoewie ein-hoondersten euro of ein-hoonderste frang. 't Woord kump vaan 't Latien: centum, ofwel "hoonderd". Bekans alle munteinhede zien es gevolg vaan decimalisatie in hoonderd kleiner einhede verdeild. De naom daovaan is daan ouch dèks "cent" (zoewie in mèt d'n Euro en de gulde), mer weurt soms ouch "centime" (zoewie de frang), "centavo", "sen" of get vergeliekbaars geneump. Umtot väöl munteinhede in cente verdeild zien, moot me ze oondersjeie door te spreke euver 'nen dollarcent of 'nen eurocente.
Door infaltie weure cente dèks ummertouw minder weerd. Sommege munteinhede, zoewie de Mexicaonse peso, zien zoe weineg weerd gewore tot me de cente gaaroet neet mie gebruuk. D'n eurocent weurt um dezelfde reie in sommege EU-lidstaote neet mie gebruuk. Zoe is Finland al gauw nao de inveuring vaan d'n euro gestop mèt 't hawwe vaan eigenste (Finse) 1 en 2 eurocente. Op 7 fibberwarie 2014 besloot de regering vaan 't Belsj um indbedrage door de kasseer te laote aofroonde. Verpliech is dit evels neet, mer 'ne winkel weurt d'r neet um bestraof. Soms kind me de eurocente ouch achterlaote in 'n duuske veur e good buut, wie 't Roed Kruus. Ouch in Nederland weurt bekans ummertouw aofgeroond nao vief eurocent. In aander lidstaote weurt wél nog gebruuk gemaak van d'n inkelen eurocent. De Europees Kemissie is evels al langer in oonderzeuk nao de meugelekheid um bedrage in de gansen Eurozone aof te roonde, neet allein in Belsj, Finland en Nederland.
Op de gemeinzaome kant vaan d'n Eurocent steit 't ciefer "1" mèt daoneve d'n Eerd, boe-op Europa ziechbaar is en e groet deil vaan Afrika en Eurazië. Aofhaankelek vaan d'n tied boe-in d'n Eurocent is gehawwe, zien de lidstaote vaan de EU op dat momint duusterder gekläörd es de res vaan 't Europees kontinint. Oonder de d'n Eerd door zien zès diagonaol lijne doorgetrokke die de twelf stare vaan de Europese Unie (EU) verbinde, zoewie ouch aofgebeeld op de veendel vaan de EU. De twaalf stare stoon veur de twaalf origineel lidstaote vaan de EU. Op d'n aandere kant steit get wat specifiek is veur de lidstaot boe deen Eurocent is gehawwe.