Django Reinhardt

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Django Reinhardt (Liberchies (Belsj), 23 jannewarie 1910 - Samois-sure-Seine (Frankriek), 16 mei 1953) waas 'ne Belzje gitaris. Hae haw zienen eige stiel worin d'r elemènten oete jazz combineerdje mit ziene segeunderachtergróndj; hie-oet óntstóng de gipsy jazz.

Reinhardt grujdje op op e woonwagekamp bie Peris. Mit ziene jóngere broor lieërdje d'r gitaar, banjo en fjoeal spele. Bie 'ne brandj inne woonwage woort t'r wie d'r achtieën waas zwaor-verlets ane linkse handj, wobie de pink en rinkvinger verlaamp en misvörmp bleve. Hiedoor mós t'r 'n nuuj gitaartechniek aanlieëre.

In 1931 kwaam Reinhardt veuren ieëste in aanraking mit jazz, door opname van Louis Armstrong en Duke Ellington. Same mit zie broor Joseph Reinhardt (slaaggitaar), Roger Chaput (slaaggitaar), Stéphane Grappelli (fjoeal) en Louis Vola (contrabas) richdje d'r 't Quintet du Hot Club de France op. Zie hawwe mit häör ieëste optraeje zoväöl succes det zie drek e platekóntrak kregen aangebaoje.

Django Reinhardt speeldje veural op groeate akoestische gitaar, óntwórpe door Mario Maccaferri en geboewdj bie Henri Selmer. Ziene meziek wuuert ómsjreven es virtueus en riek aan emoties.