Japans hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Japans hierevoetbalèlftal vertrejt Japan bij internationaol voetbalmatche. 't Is eint vaan de beter teams in Azië; sinds ind jaore negeteg is 't team vasten deilnummer aon wereldkampioensjappe. Rivaliteite kint 't team mèt Zuid-Korea en Australië; de ierste rivaliteit heet e sterk politiek karakter.
Historie
[bewirk | brón bewèrke]Al in 1917 späölde e Japans hoegsjaolteam matche tege China en de Filipijne, die mèt groete ciefers verlore gónge. De Japanse voetbalboond woort pas in 1921 opgeriech, en 't ierste officieel nationaol voetbalteam woort in 1930 opgestèld bij de Speule vaan 't Wied Ooste. In 1936 stoont 't team op de Olympische Speule in Berlijn. 't Land sjreef ziech in veur 't WK vaan 1938, meh trok ziech al ietot eine match gespäöld waor oet de kwalificatie trök. Wie 't land in oorlog verkierde, woorte gein matche vaan beteikenis mie gespäöld.
Nao d'n oorlog woort 't voetbal weer opgepak. Japan bleef ein vaan de bèste teams vaan de regio, meh maakde internationaol neet väöl indrök. Oetzundering waore de Olympische Speule vaan 1968 in Mexico-stad, boe Japan de broonze medaje pakde. Dit kaom veural umtot de Speule toen nog amateurvoetbal eisde, dewijl de groete voetballen al waore geprofessionaliseerd. Ouch op de Aziatische Speule haolde Japan soms gooj rizzeltaote. Veur de WK's wis 't land ziech neet te plaotse.
In de jaore negeteg kaom 't Japans voetbal in de lif. In 1988 plaotsde 't land ziech veur 't iers veur de AFC-cup; in 1992 wis 't die al veur d'n ierste vaan veer kier (per 2018) te winne. E paar jaor later waor 't team al zoeväöl verbeterd tot me ziech veur 't WK vaan 1998 in Fraankriek wis te plaotse. Veer jaor later, bij 't WK in eige land, kaom Japan tot de achste finales. Sindsdeen heet 't land aon alle WK's mètgedoon; noets kaom 't evels wijer es de achste finaal. De bèste prestatie lieverde 't team nog op 't WK vaan 2022. Nao spectaculair winste op Duitsland en Spaanje won 't de gróp, boenao 't land in de achste finaol nao penanties woort oetgesjakeld.