Maxime Verhagen
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Maxime Jacques Marcel Verhagen (Mestreech, 14 september 1956) is 'ne Nederlandse politicus. In 't kabinet-Balkenende IV is heer sinds 22 fibberwarie 2007 minister vaan Boetelandse Zake.
Verhagen woort gebore in Mestreech. Heer volgde dao 't atheneum aon 't Sint-Maartenscollege en góng daonao aon de Universiteit vaan Leie historie studere (aofstudeerriechting contemporain historie; doctoraolscriptie in 1986).
In 't begin waor heer fractiemètwèrker veur 't CDA en gemeinteraodslid in Oegstgeest. Vaan 1989 tot 1994 waor heer lid vaan 't Europees Parlemint, boenao heer in 1994 Twiede-Kamerlid woort. Op 11 juli 2002 woort heer fractieveurzitter, en nao 'n korte oonderbreking in 2003 es lid vaan 't oonderhandelingsteam veur 't kabinet-Balkenende II woort heer dat obbenuits. Nao d'n oetslaag vaan de Twiede-Kamerverkezinge vaan 2006 droeg heer zien veurzittersjap obbenuits euver aon Jan Peter Balkenende. In Balkenende IV woort Verhagen minister vaan Boetelandse Zake. Op 10 juni 2010 woort heer obbenuits tot fractieveurzitter verkoze, naotot Balkenende um veur 't CDA zier slechte verkezingsrizzeltaote tröktraoj.