Piatra Neamţ

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Piatra Neamţ is 'n stad in 't noeardjoeaste van Roemenië, in 't distrik Neamţ. De stad lègk in de regio Moldavië en tèltj 105.865 inwoeaners (2002).

Gesjiedenis

't Gebied róndj Piatra Neamţ wuuertj al bewoeandj sins d'n aje steintied. Róndj de twieëdjen ieëw veur Christus waas d'r 'n groeate Dacische stad genaamp Petrodava die zjuus boete de stad gelaenge had.

Meh dit gebied waerdje later pas bewoeandj tösje 1375 en 1391 door Petru I Muşat. De citadel van Piatra Neamţ is geboewdj óp 2 fibberwari 1395. De ieëste vermèljing van de stad is in e documènt van 20 april 1491, worin steit det Piatra lui Crăciun (zoea waerdje Piatra Neamţ doe genömp) geboewdj is tösje 1468 en 1475, tiedes d'n tied det Moldavië geregeerdj waerdje door Ştefan cel Mare (Stefan de Groeate). De kathedraol is geboewdj tösje 1497-1498 en de 20 maeter hoeage klokketoeare is geboewdj in 1499.

Lègking

Piatra Neamţ lègk aan de reveer Bistriţa en is ómrink door de berg Pietricica (590 m), Cozla (679 m), Cernegura (852 m), Bâtca Doamnei (462 m) en Cârloman (617 m). De stad lègk óp 'n gemiddeldje huuegdje van 345 m. Piatra Neamţ lègl zoeaget 350 km tèn noearje van de höidstad Boekares.

't Kórsbiezeendje vleegveldj lègk in Bacău, zoeaget 60 km tèn zuje van Piatra Neamţ. Piatra Neamţ is 'n belangrieke tösjehalt veur spaorlien 509 tösje Boekares en Iaşi. De stad is mit waeg verbónje mit de stej Bacău (richting Boekares), Suceava, Tîrgu Mureş en Iaşi.

Piatra Neamţ is ingedeildj in de vólgendje wieke:

Centru (Centrum)
Dărmăneşti
Precista
Mărăţei
1 Mai
Sarata
Valea Viei
Gara Veche
Speranţa