Astrofixica

ZE	Sta pàgina a l'é scrîta in zenéize

I resti de 'na stella (N 63A) dîta supernöva

L'astrofixica a l'é in rammo de l'astronomia ch'o l'esplòra l'Universo e i còrpi celesti co-e metodologîe e e tecniche sperimentæ da fixica moderna.

Nasciûa inta segonda meitæ de l'Euttoçento, a l'ha fîto assonto un ròllo fondamentâ studiando prezénpio a corelaçion tra luminoxitæ e tempiatûa superfiçiâ de stelle, l'espanscion de l'Universo e âtre cöse. A distinçion tra astronomîa e astrofìxica a l'è ancheu assæ meno netta che into passòu a caoza do grande progresso inta comprenscion raçionâ di fenòmeni còsmichi.

Astrofìxica relativistega

A l'é 'na disçiplinn-a ch'a studdia quelli fenòmeni còsmichi inti quæ l'è fondamentâ l'uzo da meccanica relativista, comme son quelli caraterizæ da-a libiaçion d'enormi quantitæ de energia e da de rapide variaçioin (comme e sorzénte squæxi stellæ quasar, e stelle X binâie e l'örìgine de l'Universo). Questi fenòmeni se peuan spiegâ faxendo ricorso a 'n'atra sorgénte de energia, a gravitaçion, ch'a diventa dominante solo quande o còrpo o razonze de dimenscioin assæ picinn-e, con di elevatiscimi valoî da denscitæ. Pe 'na stella de massa pægia de quella do Sô questa dimenscion a l'è pâ a 1,5 km. Inte queste condiçioin i effetti previsti da-a relativitæ, restreita e generâ, zeugan in ròllo essençiâ; alôa bezéugna deuviâ di lezze fixiche apropiæ e in formalismo matemàtico ciù complesso.

Un di doî prinçipæ modelli teòrichi de l'astrofixica relativistega o l'è o béuggio neigro, sàiva a dî 'na superfiçie, l'orizzonte, attraverso a quæ tùtte e partexelle, compreizo i fotoìn, peuan passâ sôlo inte 'n verso, verso l'interno; o béuggio neigro, donca, o l'è invixìbile, e da questo no peu sciortî nisciunn-a partexella e manco a radiaçion. O fenòmeno ciù importante arente a 'n còrpo collasòu o l'è a produçion de partexelle elementæ (sorvettutto elettroìn e protoìn) con âtiscima energîa. Queste interagiscan co-i campi elettrichi e magnettichi inti seu esterni e càozan de potente sorzente elettromagnetiche; in âtre paòlle, a so distribuçion spettrâ in fonçion da frequensa a no l'è quella da radiaçion emissa da 'n ordinâio còrpo cado.

O segondo modello de l'astrofixica relativistega o riguarda a strutûa globâ de l'Universo e o consciste inta cosmologia evolutiva basâ in sce-a teoria da relativitæ generâ de Albert Einstein. In questo modello l'Universo o l'ha avúo örìgine da 'na fase primordiâ de âtiscima tempiatûa e denscitæ da-a quæ, pe espanscion e collasci locæ, se son formæ i grandi agglomeræ galattichi de mateia che se vedan ancheu. E oservaçioin cosmològiche son inportànti pe-a determinaçion de l'etæ de l'Universo e da so prezente deceleraçion, e pe savéi de ciù de condiçioin fixiche preexistente a-a formaçion de galàscie. A ciù gran parte de informaçioin circa questa fâze a l'è dæta da-a radiaçion de fondo, ch'a s'inquaddra perfettamente into modello cosmologico relativistego. Questa a l'è stæta emissa quande o "raggio" de l'Universo o l'êa ciù o mêno mille vòtte ciù piccìn de l'attoâ (quande tùtta a mateia a l'ea ionizzâ); ancheu a radiaçion de fondo a l'appâ comme un fondo de onde elettromagnétiche inta banda de microonde provegninte co-a mæxima intenscitæ da tùtte e direçioìn.

Âtri progetti

Altri progetti

• Wikimedia Commons

• Wikimedia Commons a contêgne di files in sce astrofixica