Nichiozo Macciavello

ZE-P	Sta paggina chie a l'è scrita in zeneize, co' ina grafia tipo quella do Prian do 1745

Nichiozo di Macciavelli - Pensatô e lettiao (Firençe 3 mazzo 1469 - 21 zugno 1527).

Biografìa

Figgio de Benardo, dottô in lezze (1430 ò 1431-1500), e de Bærtomea di Nelli. O l'ebbe doe sœu ciu grende, Primaveja (1465-1500) e Margaita, nasciua do 1468, e un fræ menô, Totto, ecclexastego.

In vorgâ o se firmava Nicholò Machiavegli, in latin Nicolaus Machiavellus.

Graçie a-i "Regordi" do poæ relativi a-i anni 1474-87, semmo ch'o studiò grammatica da-o 1476, abaco da-o 1480, e che da-o 1481 o seguì e leçioin de grammatica de messê Paolo Sascio da Ronçiggion int'o Studio fiorentin. O conobbe scin da l'adolescença di clascichi latin comme Livio e Giustin e a-a piña zoeneçça doviæ appartegnî una lettua filozoficamente impegnativa comme quella de Lucreçio. L'è poscibile ascì che doppo o 1494 o Macciavello o frequentesse e leçioin de Marçello Vergilio a-o Studio. No gh'è prœuva ch'o conoscesse o grego.

Tra o 1492 e o 1494 o çercò de strenze rapporti con Giuian di Meghi, destinataio, foscia, do capitolo pastoâ in terça rimma Poscia che a l'ombra ("Pœuscia ch'a l'ombra") e da cançon a ballo Se avessi l'arco e l'ale ("Se gh'æse l'ærco e i ae"). Cheiti i Meghi e affermaase l'aotoritæ do Savonaola, o Macciavello o s'avvexinò a quelli settoî de l'aristocraçía che, doppo una fase de ambígo consenso, passon a l'opoxiçion averta inti confronti do fræ e ne provocon a roiña. In questa luxe se spiega comme, intrao in concorso fin da-o frevâ 1494 pe un minô ófiçio, subito doppo o supriççio do Savonaola (23 mazzo), o Macciavello o foise dexignao (28 mazzo) e nominao (19 zugno) segretaio da segonda cançelaja; da-o 15 zugno o fu ascì segretaio di Dexe. Pœu dâse che a nommina a foise ascì favoiia da Marçello Virgilio, da-o frevâ primmo cançelê.

L'attivitæ ófiçiâ do o Macciavello a l'è documentâ da un'imponente móle de scriti, pe o ciu corespondença tegnua, in nomme de di organi do goerno çentræ, co-i fonçionai e i comandanti militæ spantegæ pe-o dominnio fioentin. Ma ancon ciu importante, pe quella "espeiença de cose moderne" ch'a vegne rivendicâ inta primma pagina do Principe, l'è o serviççio diplomatico ch'a-o Macciavello toccò de desgœugge presso e prinçipæ corte italiañe e strangee. Poeiva ôtr'a ço avvegnî che a o Macciavello vegnissan recesti, da di membri da scignoria ò di organi assembleæ, di rapporti speciæ in sce de costioin do dominio, ossæ in sce-i risurtæ de miscioin otra confin: do mazzo 1499 l'è a primma próza politica conservâ, o Discorso sorve Piza, scrito foscia pe una Consurta. Into luggio o Macciavello o reçevette o primmo incarego diplomatico de rilevo, una miscion presso Cattæña Sforça, contessa de Forlì. L'anno doppo o fu inviao, con Françesco da Caza, in França pe richiede a l'alliao un mao impegno inta guæra pizaña (a miscion a duò da-o luggio 1500 a-o zenâ 1501). Fra i scriti ligæ a questo soggiorno françeize spiccan o Discursus de pace inter imperatorem et regem (prob. arv. 1501) e i aregordi De natura gallorum (elaborao fin a-o 1503).

Inte l'aotunno do 1501 o Macciavello o sposò a Maietta Corsciña (da-a quæ o l'ebbe Primiaña, Benardo, Lodovigo, Guiddo, Peo, Bacciña e Totto). Into zugno de l'anno seguente o fu coadiutô de Françesco Soderin inte l'ambasciâ a-o Cesare Borgia, alloa impadroniose de Urbin; da l'ottobre 1502 a-o zenâ 1503 o desgugette una segonda ligaçion a-o Valentin, in coincidença co-a rebellion di lœugotenenti che o Borgia o domò ricorindo a l'astuççia e a-a crudeltæ. Da l'ottobre a-o dexembre do 1503 o Macciavello o fu in miscion a Romma pe seguî o conclave da-o quæ sciortì eletto Giulio II; da-o zenâ a-o março 1504 o fu torna a-a corte do re de França. Intanto, into settembre 1502, l'ea stæto eletto confaonê perpetto da repubbrica fiorentiña Peo Soderin, a chi o Macciavello o se ligò de scincea, ma no acrittica, fedeltæ. Inta discuscion e inti confliti, ben fito aspi, fra o confaonê e i ottimati, o Macciavello o l'intervègne indirettamente attraverso a redaçion de promemoia e documenti consurtivi (comme e importante "Paole da dighe sorve a provixon di dinæ", março 1503, e o discorso "Do moddo de tratâ i popoli da Valdeciaña rebellæ", do luggio 1503) e in primma persoña co-o poemetto in terçiñe dantesche Compendium rerum decemnio in Italia gestarum (finio into novembre 1504, ma dæto a-e stampe solo che into 1506 co-o titolo Decemnale), ch'o l'è 'na vivaçe cronistoia di anni 1494-1504. comme prœuva ascì i urtimi versci do poemetto ("... ma saiæ o cammin façile e curto / se voi o tempio arvisci torna a Marte"), o Macciavello o se dedicò con speciâ pascion a-o progetto de una miliççia "proppia" da repubbrica, ossæ formâ da çitten e sudditi, no da di merçenai ni da di alliæ strangei.

A-o progetto ean fortemente avversi i ottimati; nonostante o sostegno do cardenâ Françesco Soderin, soltanto into dexembre 1505 se poette inandiâ o reclutamento e l'addestramento di primmi contingenti. A provvixon definitiva a fu votâ o 6 dexembre 1506, insci-â base de un documento steizo da-o Macciavello ("A caxon de l'ordenança"). Tra l'agosto e l'ottobre de quell'anno o Macciavello o l'aiva fæto un'âtra ligaçion de gran relevo, torna presso a corte papâ, ossæ a-o seguito do Giulio II in marcia a traverso l'Ombria e a Romagna pe 'na campagna contra i bacanetti do lœugo: a-i eventi de quella spediçion aludde l'importante epistola a Zane Batesto Soderin, nota comme Ghiribizzi (13-27 settembre), a quæ mateia a passa in gran parte into coevo capittolo Di Fortuna, in terçiñe, indriçao a-o mæximo Soderin. Nominao da pœu (12 zenâ 1507) cançelê di Nœuve ófiçiæ da miliççia fiorentiña, o Macciavello o s'ócupò ancon do reclutamento into contado. Into zugno o fu dexignao pe una miscion presso l'imperatô Mascimilian, ma subito doppo, pe l'ópoxiçion da parte aristocratica, revocao e sostituio da Françesco Vettoî (l'è foscia de questi tempi un capitolo in terçiñe intitolao apponto a lIngratitudine; motivi analoghi resegondan into Canto dei ciurmadori, scrito pe o carlevâ do 1509; fra o 1502 e o 1524 o Macciavello o scrisse âtri çinque canti carnascialeschi). Solo a-a fin do 1507 o confaonê o l'ariescì a fâ partî pe o Tirollo o Macciavello ascì, con fonçioin de segretaio. A-o ritorno in patria, into zugno 1508, questi o steize un Rapporto di cose della Magna (da pœu transformao into Ritracto di cose della Magna, 1509-12).

Tornao a-i so ófìççi militæ, o l'ebbe parte noteive inta riconquista de Piza (4 zugno 1509) doppo chinz'anni de rebellion. Into novembre-dexembre o fu a Veroña presso l'imperatô, ch'o l'ea intervegnuo personalmente inta guæra da liga de Cambrai contra Veneçia; a questo soggiorno apparten o capitolo "De l'ambiçion", dedicao a Luigi Guiççardin. Into zugno-ottobre o tornò pe a terça votta in França: a miscion concruza, o començò a elaboâ un Ritracto di cose di Francia (lasciao, imperfetto, doppo o 1512). Intanto o contrasto fra o pappa e i Françeixi o s'ea aggravao e a poxiçion da repubbrica fiorentiña a se fava sempre ciu difiççile. A o Macciavello toccò nœuve incombençe militæ e delicæ serviççi diplomateghi: in França (settembre-ottobre 1511), quindi a Piza (2-11 novembre) presso o conçilio di cardenæ contrai a Giulio II, pe induli a lasciâ o territoio fiorentin. Doppo a terribile battaggia de Ravenna e o retio di Françeixi da-a Lombardia, e forçe militæ spagnolle a-o seguito do cardenâ Zane, cappo da famiggia di Meghi e ligao pontifiçio, intron in Toscaña (agosto 1512). E fantaie fiorentiñe fun annintæ e Prao sottoposta a un spaventozo sacchezzo (29 agosto); doi giorni doppo Pê Soderin o dovette fuzzî da Firençe.

Doppo un breve interregno, i Meghi pigion o poei (16 settembre). O Macciavello o l'aiva exortao i vinçitoî a continuâ a linnia antiottimatiççia do Soderin (appello Ai Palleschi, fin d'ottobre - primmi de novembre), ma o 7 novembre o fu cassao da l'ófìççio e o 10 condannao a un anno de confin entr'o dominio fiorentin. Sospettao de avei pigiao parte a-a conzua ordia da A. Cappoin e P. Boscoi contra i Meghi, o 12 frevâ do 1513 o fu arrestao e tortuao. Pâ ch'o reizeghesse o càrçie perpetto e o l'evittesse graçie a Giuian di Meghi (a-o quæ o Macciavello o l'inviò da-a prexon doi sonetti), e o fu condannao a pagâ una manlevaja. Ma, doppo pochi giorni, o poette sciortî de prexon graçie a l'amnistia seguia a l'eleçion papâ de Zane di Meghi (Lion X, 11 março).

O Macciavello o se retiò inta tegnua de l'Abergaçço, a Sant'Andria in Percusciña. E chì, mentre o tentava in ogni moddo de ótegnî quarche incarego da-i nœuvi segnoî, specce attraverso l'amixiççia de doi faotoî mediçei comme i fræ Paolo e Françesco Vettoî, o compoze foscia un tratao in sce-e repubbriche (destinao a trasfondise inti "Discorsci"), un segondo "Dexennâ" (incompío), a "memoia", ò "novella tragica", insciô "Tradimento do ducca Valentin a-o Vitelloçço Vitelli, Olivioto da Fermo e atri" e sorvettutto o breve tratao De principatibus, universalmente notto co-o tittolo che gh'appricò a stampa romaña do 1532: Il Principe. A primma parte de l'opuscolo (captitoi I-XI) a spiega quæ seggian i generi di prinçipati: ereditai, nœuvi, mescci de una parte antiga e de uña nœuvamente aquixia; quæ i moddi de tâ accatto: virtù e forçe proprie, fortuña con forçe atrui (o settimo capittolo o l'è imperniao insciâ figua do Valentin, cho l'ebbe o prinçipato graçie a-o poæ, Lusciandro VI, e a-a morte de lê o-o perdette, nonostante i so gesti de eççellente virtù politica), o delitto, o favô di conçittadin. Doppo i trei capittoli dedicæ a-i despægi tipi de ezerçito (merçenaio, aoxiliaio, proppio, mesccio), o Macciavello o discutte e qualitæ pe-e quæ un prinçipe, ossæ, in generâ, un cappo politico, o l'è lódào ò vituperao: contra a tradiçion moralistega, l'aotô o l'afferma o valô supremmo da "veitæ effettuale", saiv'a dî a necescitæ de affrontâ i âtri ommi pe quello che son e no pe quello che dovieivan êse. Infin, spiegao percose i segnoî d'Italia han perso i so stati de fronte a-e invaxoin strangee (cap. XXIV) e riassonta a proppia complessa dotriña da fortuña (cap. XXV), o Macciavello o voze un'appascionâ exortaçion a-a caza di Meghi perché a ghie un rescatto italian contra o "barbaro dominio" de Spagnœu e Sviççei. O libretto o fu concepio e steizo tra l'aotunno do 1513 e l'arvî do 1514; o doveiva êse indriçao a-o Giuian, ma infin o-o dedicò a-o zoeno Loenço de Pê di Meghi, o futuo ducca d'Urbin, che da-a stæ do 1513 o rezeiva a segnoia mega in Firençe.

Doppo quarche poxitivo segno de riscontro (a-i primmi do 1515, o Macciavello o fu consurtao in mateia militâ e o compose i Ghiribizi d'ordinanza), da-o mæximo çentro do poei mediçeo, ossæ da-a corte de Romma, vègne un fermo denego a ogni riabilitaçion do Macciavello (frevâ do 1515). Inti meixi succescivi o Macciavello o s'accostò, pertanto, a un gruppo de zoeni lettiæ, de inspiaçion repubbricaña, ch'o se riuniva inti çellebri Orti Oriçellæ attorno a Coximo Ruxellæ. A quest'urtimo e a Zanobi Buondelmonti son dedicæ i "Discorsi sorve a primma deca de Tito Livio" (1513-17 circa), o caodœuvia maciavellian, grandioza œuvia de meditaçion storico-politica in forma de libera glósa a-o testo livian. I mæximi Coximo e Zenoggio, con Battesto da Balla e Luigi Alaman, son interlocutoî da-a rente a-o protagonista Fabriççio Colonna inti dialoghi De re militari (ciu noti comme "Arte da guæra", compii tra a fin do 1519 e a stæ do 1520), inta quæ a l'è ribadio a necescitæ de ritornâ a-i prinçippi de l'arte militâ romaña, e sorvettutto a-o modello da "popolaçion armâ" contra l'uzo moderno di merçenai, otr'a-o predominio de l'infantaja contra quello da cavallaja e de l'artaggiaja.

Insciô versante sccettamente lettiaio o Macciavello o l'atteize in questi anni a l'amâo poemetto in terçiñe "L'aze d'óo" (incompio) e a-o vorgaizamento de l'Andria do Terençio; o scrisse ôtr'a ço a splendida "Foa" mizogina de Belfagor arçidiao, e ascì una raffinâ serenata in ottave. Doppo a morte do Loenço (4 mazzo 1519) a diffidença da famiggia dominante inti confronti d'o Macciavello a parse finarmente amermâse. Graçie a-i boin ófìççi do Loenço Strozzi o fu riçevúo da-o Giulio di Meghi (março do 1520); a l'inçirca int'o mæximo periodo, fu rappresentao in Firençe a Mandragola, che subito doppo pappa Lion o vosse vedde a Romma ascì (comme aregorda P. Giovio). Quella ch'a l'è parsciua a tanti a megio comedia do nostro Renascimento a mette in scena a beffa zugâ da-o parascito Ligurio a-i danni do stolto messê Nicia, ch'o finisce pe mette, co-e proppie moen, into letto da moggê Lucreçia o zoeno Callimaco de lê iñamoao; attraverso una tramma ben serrâ, de estraçion decamioniaña, a Mandragola a se caratterizza pe-a rapprezentaçion grottesca de un mondo affæto spœuggio de valoî, into quæ l'ordenâia raçionalitæ di beffatoî a mette in amaa caregatua e "regole" da grande politica.

Inta stæ do 1520 o Macciavello o compì una miscion semiofiçiâ a Lucca, componendo in quell'ócaxon un "Sommaio de cose de Lucca" e un exerçiççio de proza storica, a "Vitta de Castruçço Castrachen", dedicâ a Z. Buondelmonti e Luigi Alamanni. L'8 de novembre, infin, o fu "conduto" da-o Studio pe compoñe i annali fiorentin e sbrigâ di atre incombençe politico-lettiaie (fra e quæ saiâ da consciderâ ascì o pai insce-a riforma constituçionâ, Discursus florentinarum rerum post mortem iunioris Laurentii Medices, 1520-21). Va registrao ascì a miscion do mazzo 1521 a-o capitolo di Fræ menoî in Carpi pe conto di Œutto de Pratica, sorvettutto perché in quella ócaxon s'approfondì l'amixiççia fra o Macciavello e Françesco Guiççardin, alloa governatô de Modena, e tra i doi commençò a intreççâse un scangio epistolâ strazordenaio pe fineçça psicologica e vivaçitæ lettiaia (atrettanto importante in questo senso son arcuñe lettie do Macciavello a Françesco Vettoî remontante a-i anni 1513-14).

Inte l'agosto seguente, o Macciavello o poette stampâ "L'arte da guæra", presso Zonti de Firençe, con dedica a Loenço Strozzi. Mentre o continoava a laoâ a-i annali fiorentin, o l'intervègne ancon into dibattito insciâ nœuva constituçion (Minuta di provvisione de l'arvî 1522); poco doppo, tâ dibattito o se concruze bruscamente co-a scoverta e a represcion de una conzua antimega ordia da Z. Buondelmonti e L. Alamanni: o mæximo Macciavello o n'ebbe quarche "imputaçion", se no un vêo e proppio sospetto de compliçitæ. O tornò a concentrâse in sce l'œuvia lettiaia e into zugno do 1525 o presentò a-o dedicataio Giulio di Meghi, che da-o novembre do 1523 o l'ea montao a-o sœuggio pontifiçio co-o nomme de Cremente VII, i œutto libbri de "Istoie fiorentiñe": queste van da-a fondaçion da çittæ a-o 1492, ma g'han pe vêo soggetto o conflito çivî in Firençe, da-o scontro fra guerfi e ghibellin a-a vittoia di Meghi; o Macciavello o ripensa a stoia da so çittæ, straçiâ da-a partexanaja, a contrasto con quella de Romma antiga.

Into zenâ do 1525 o Macciavello o l'aiva fæto rappresentâ a Firençe a commedia amooza Clizia, basâ insci-â Casina de Plaoto. A l'aotunno do 1524 poriæ invece remontâ un cuiozo "Dialogo" insci-ô "fiorentinismo" do Dante, co-o quæ o Macciavello o vosse intervegnî inte polemiche lengoisteghe do tempo (l'aotentiçitæ do testo a l'è stæta longamente discussa). A scitoaçion politica a l'andava intanto faxendose ciu luvega, doppo a sconfita di Françeixi a Pavia (24 frevâ 1525) da parte di Spagnolli e Impeiæ. O Macciavello fu inviao in Romagna, presso F. Guiççardin, pe organizzaghe a miliççia (zugno); inte l'arvî do 1526 o fu nominao cançelê di procuoei a-e miage. Into mazzo, a Cognac, se strenzette una liga tra o pappa, i Fiorentin, i Françeixi e i Veneçien contra l'imperatô Carlo: fito a guæra a s'aççeize inte l'Itallia settentrionâ e o Macciavello o seguì con varie incombençe e vexende belliche. Pâ ch'o s'attroese a Çivitavegia quande, into reverso generâ da liga (o 6 mazzo 1527 Romma a vègne missa a-o sacco), i Meghi fun scacciæ da Firençe e fu restaorâ a repubbrica (17 mazzo). I nœuvi governanti, de estraçion savonaoliaña, no ean favoeivi a o Macciavello, ch'o no fu reciammao in ófìçio. O l'ea, in effetti, za minao into fixico e o s'amortò ("burlando", segondo a lezendia) o 21 zugno tra i pochi amixi arestæ: Buondelmonti, Alamanni, Strozzi. O fu sepelio in Santa Croxe l'undeman.

Colegamenti esterni

Altri progetti

• Wikimedia Commons

• Wikimedia Commons a contêgne di files in sce Nichiozo Macciavello