Svært mange arbeidsplassar i Noreg er på kontor.
Arbeidslivet er den delen av samfunnet og livet som handlar om arbeid. Arbeid er i denne samanhengen det same som jobb.
Ordet arbeidsliv blir mellom anna brukt om korleis arbeid fungerer i eit land. Arbeidslivet i Noreg er for eksempel litt ulikt frå arbeidslivet i Frankrike.
Ein kan òg bruke ordet om den delen av ein person sitt liv som handlar om jobb. For eksempel kan ein seie at ein person har hatt «eit langt arbeidsliv som kokk».
I arbeidslivet snakkar ein ofte om forholdet mellom arbeidsgjevar og arbeidstakar. Ein arbeidsgjevar er den som gjev folk jobb og lønn. Arbeidsgjevar kan vere staten, ein kommune, ei bedrift eller ein person. For eksempel er kommunen arbeidsgjevar for rektor, lærarane og andre tilsette i grunnskulen. Rektor er sjef for lærarane, men hen er ikkje arbeidsgjevar.
Arbeidstakar er ein person som har eit arbeid. Hen har bestemde oppgåver. Oppgåvene til ein lærar er mellom anna å undervise elevar. Ein bussjåfør har som oppgåve å køyre buss.
Den viktigaste lova for arbeidslivet i Noreg heiter arbeidsmiljølova. Både arbeidsgjevar og arbeidstakar må ta omsyn til staten, arbeidsmiljølova og andre lover som gjeld for arbeidslivet.
Arbeidsmiljølova bestemmer mellom anna kor mange timar det er lov å jobbe i strekk, og kor ofte ein har krav på pause.
I Noreg er det vanleg å jobbe 37,5 timar til saman i løpet av ei veke. Nokre jobbar meir, nokre jobbar mindre.
Viss ein for eksempel jobbar i ein butikk, må ein vere på jobb når butikken har ope. På eit sjukehus må nokon jobbe på kvelden og natta, for å ta vare på pasientane.
Personer som har jobb får lønn. Lønn er pengar som blir betalte til arbeidstakaren. Det er mest vanleg å rekne lønn i timelønn, månadslønn eller årslønn.
Alle som har jobb har krav på ferie. I Noreg finst ei eiga lov som blir kalla ferielova.
Det er vanleg at arbeidstakar og arbeidsgjevar avtaler kva tid arbeidstakaren kan ha ferie.
Ein kan samarbeide med kollegaene sine om å løyse arbeidsoppgåver. Her samarbeider to kollegaer på ein bilverkstad.
Viss ein jobbar saman med andre, blir desse personane kalla kollegaer. Det er vanleg å samarbeide med kollegaene sine. For eksempel må to snikkarar samarbeide, når dei skal byggje ei hytte.
Ein kan ha mange kollegaer, få eller ingen kollegaer. Mange synest det er fint å ha kollegaer. Då kan ein samarbeide, diskutere oppgåver og ete matpakka si saman i pausen.
