Roing er ein idrett med konkurransar på vatn. Det er om å gjere å komme først frå start til mål. Roarane bruker spesiallaga båtar til ulike konkurransar.
roing
Birgit Skarstein var suveren, då ho vann gullmedalje i roing under Paralympics i Tokyo, 29. august 2021.
Av
Torstein Bøe/NTB.
Lisens:
Avgrensa gjenbruk
Australske roarar i båttypen åttar under OL i Tokyo i Japan. Coxen, James Rook, sit med ansiktet mot roarane Genevieve Horton, Olympia Aldersey, Bronwyn Cox, Giorgia Patten, Sarah Hawe, Georgina Rowe, Katrina Werry og Molly Goodman.
Båtar
Konkurransebåtane er lette og smale og laga av mellom anna karbonfiber. Båtane er mellom åtte og 20 meter lange og rundt 60 centimeter breie.
Åra har eit boge blad og er mellom tre og fire meter lange. Roarane sit på eit sete som går på skjener, for at utøvarane skal kunne bevege beina fram og tilbake, medan dei ror.
Dei fleste båtane har ein fast finne under båten, for å få betre stabilitet, og eit ror lengst bak, for å halde retninga i bana si.
Typar
Roarar bruker ulike båttypar, avhengig av kor mange som ror saman og kva for båt dei har.
I singelsculler er det ein roar i kvar båt, og seks båtar konkurrerar om gangen.
Det finst båtar med plass for to, fire eller åtte roarar. Då sit dei etter kvarandre i båten og ror. Nokre av desse båtane har ein styrmann (cox). Hen sit lengst bak i båten og ser framover, medan dei som ror, sit med ryggen mot målstreken. Ein cox kan mellom anna hjelpe roarane til å halde takta på roinga, så båten får bedre fart.
I det som blir kalla scullerbåtar, bruker roarane to årar kvar. I nokre båtar brukar roarane éi åre kvar. Coxen har ikkje årar.
I konkurransar ror dei som veg det same mot kvarandre. I lettvekt kan ikkje gjennomsnittsvekta for menn vere meir enn 70 kg for menn og 57 kg for kvinner. I tungvekt kan roarane vege så mykje dei vil.
Reglar i konkurransar
Ein konkurranse i roing blir òg kalla regatta. 2000 meter er den vanlegaste distansen.
Kvar båt har si bane, som går rett fram. Som oftast er det seks baner ved sidan av kvarandre, og seks båtar i kvar runde (heat).
Kvar bane er merkt med bøyer eller linjer, for å hjelpe roarane å halde seg i bana si. Under konkurransen må roarane halde seg innanfor bana si, og unngå å kollidere med andre båtar.
Dei som vinn i dei første rundane i ein konkurranse, går direkte til semifinale eller finale. Dei som ikkje vinn, får ein ny sjanse i noko som blir kalla oppsamlingsheat. Dei tre beste i kvar semifinale går til A-finale. Den som vinn A-finalen, vinn heile konkurransen.
Historie
Allereie på 1800-talet blei det arrangert rokonkurransar, mellom ulike universitet i både England og USA.
I Noreg blei den første roklubben, Fredrikstad Roklubb, skipa i 1877. Roing for menn har vore med i OL frå 1900, og for kvinner frå 1976.
Noreg har fleire verdsmeistrar og olympiske meistrar i roing. Mellom anna har Olaf Tufte to OL-gull, og Birgit Skarstein har gull frå dei paralympiske leikane.
