Cavitazion

Quest articol chì l'è scrivuu in lombard, grafia milanesa.

Schèma de la creazión d'on micro-gètt, manemán che la pression la va su la bolla la se redù di la se deforma. In del ponto quatter la bolla la se spartìss in dò boll pussée piscinìnn e 'l lìquid el ciappa denter la paréd in manera violenta.

Dagn de la cavitazion

La cavitazion a l’è la formazión de boll de vapór denter ind on flùìd, che poeu collàssen. La cavitazión l'è caosada de la sbassada locàl de la pressión fin a la tension de vapor del lìquid che per quèst el diventa vapór e ‘l fa su di boll (cavità). Poeu quand che la pressión la va su de noeuv i boll collàssen. La cavitazión la fà di dagn degià che 'l collàss el crea di variazión brusch de pressión. On caso tipich de la cavitazión a l’è quèll che ‘l pò capità in di pomp ‘doe el collàss di boll el càpita per via de l’aumént de la pressión caosàa de lor. I boll pòden formàss quand che ind on quàj sit de la condòtta de aspirazión la pressión la va giò sòta el valór de la pressión de vapór de l'acqua.

Com'a l'è ch'a se verifica l'assenza de la cavitazion in di pomp

Prevalenza nètta positiva de aspirazion

Introdusèmm el concètt de prevalenza nètta positiva de aspirazion (NPSH- “net positive suction head” in lengua inglesa) o ben la differenza infra la pressión ind on cèrt pont e la pressión de vapór del flùid, esprèssa in meter che la gh’hà de esìst a l'entrada de la pompa al fin de fa minga succéd di fenòmen de cavitazión.

L’NPSH el ven donca definida inscì:

$NPSH={\frac {(P_{1}-P_{v})}{\rho \cdot g}}$

indoe:

P₁ a l’è la pression in corrispondenza de la pompa;

P_v a l’è la pression de vapor satur de l'acqua

Ρ a l’è la densità de l'acqua e la var circa 100 kg/m3;

g a l’è l’accelerazion de gravità e la var pressappòch 9,81 m/s².

La pression del flùid in corrispondenza de la pompa la pò vèss trada foeura per mèzz del teorema del Bernoulli, quant a la pressión de vapor satùr del’acqua inveci a gh’hinn di fórmol empìrich (varda ► pression de vapor satur de l'acqua).

Verifica de l'NPSH

Al fin che che la succeda nò la cavitazión el gh’hà de vèss:

$NPSH(a)>NPSH(r)$

NPSH(r) a l’è l’NPSH che gh’è besògn, anca ciamàa “depression dinamica totál”:

$NPSH_{r}={\frac {v^{2}}{2g}}-\Delta H_{p}$

indoe:

v a l’è la velocità in del ramm de aspirazión de la pompa (in m/s);

∆H_p a l’è la crodada de la pressión a l’entrada de la palettadura (in meter de càregh idràulich).

NPSH (a) a l’è invece l’NPSH disponìbil che ‘l ven calcolà per mèzz del teorema del Bernoulli, per esempi in del caso che la pompa l’aspira d’on serbatòi a superfice lìbera:

$NPSH(a)={\frac {P_{o}}{\gamma }}-H_{a}-{\frac {P_{v}}{\gamma }}-H_{w}$

Indoe:

Po l’è la pressión superficiàl del lìquid, esprèssa in Pascal; in del caso che Po l’è la pressión atmosferega P/γ=10,33m

H_a a l’è el dislivèll infra la bocca de aspirazion e la superfice libera in del serbatòi de indoe el lìquid el ven apiràa de la pompa (in meter) e l’è positiva in del caso che la pompa la staga sora el serbatòi, diversamént negativa;

γ a l’è el pes specifich de l’acqua γ=ρg in N/m3

P_v a l’è la pressión de vapor satur de l’acqua, o ben la pressión del passagg de stat de l’acqua a la temperadura del flùid in Pascal

H_w hinn i pèrdit de càregh idràulich in del tratt de aspirazión (in meter).

Se ved che el problèma de la cavitazión a l’è on lìmit a l’altèzza massima de aspirazión H_a, con l’aumént de la temperadura del flùid el se redùss l’NPSH (Ha) e donca la massima altèzza de aspirazión ammissìbil per fa nò succèd la cavitazión.

Vos correlad

• Prevalenza nètta de aspirazion positiva